MINISTERIO DA EDUCAÇÃ

O

UNIÃO EUROPEIA

MARTA SALVA NIA ALIN MATEUS

Marta ne’e labarik feto ida ne’ebé mai husi família simples, hela iha fatin dook husi sidade iha Timor-Leste. Aleinde nia inan-aman, Marta mós iha nia alin mane ida naran Atoi, no mós alin mane bebé ida no nia manu fuik hakiak ida ne’ebé sempre akompaña nia iha tempu hotu.

Marta mak labarik feto ida ne’ebé sempre haksolok no kontente, sempre hanoin pozitivu kona-ba moris ne’e. Nia mós labarik feto ida ne’ebé matenek iha nia família laran nune’e mós iha eskola. Maske nia família ki’ak no dala barak hasoru problema barak, Marta sempre rezolve ho di’ak, nunka lakon nia direitu no nunka halo nia inan-aman hirus.

Marta sai hanesan modelu ne’ebé di’ak, no sai eroína ba labarik no feto foin-sa’e sira hotu iha Timor-Leste. Nia mak riku soin ema hotu nian ne’ebé persiza nia tulun atu ko’alia ba sira. Nia lian murak mak “Hakarak Kaer Ba Fitun”, inspira labarik no foin-sa’e sira hotu atu halo hanesan nia.

Mai ho Marta, hamutuk ita lori ksolok ba labarik no foin-sa’e sira hotu!

© Departamentu Promosaun no Edukasaun Saúde, Ministériu Saúde 2018

Livru ne’e prodús husi Ministério da Saúde, ho apoiu tékniku no fundu husi UNICEF no Uniaun Europeia.

Marta Salva Nia Alin Mateus

4

Sesta dadeer, Marta ho ninia kolega sira halimar hela berlindu iha jardin eskola.

“Marta, aban ita sei halo saida iha uma?” Marta nia kolega husu.

“Ha’u nia Apa dehan nia atu lori ami ba tasi-ibun!” Marta hatán.

6

Mestra bolu Marta sira atu tama ona aula laran.

Mestra dehan ba sira, “Ohin loron ita sei kontinua aprende kona-ba saúde!”

8

Marta tuur besik ninia kolega ida naran Nino. Nino matenek loos no sempre halo Marta hamnasa.

“Aban Marta ba tasi karik, keta haluha lori sipu ida fó mai ha’u!” Nino dehan.

“Ha’u sei buka ida di’ak nian!” Marta hatán.

10

Horseik Marta sira rona kona-ba importánsia fó susubeen inan nian ba bebé. Ohin loron ita atu aprende saida tan?

“Ohin loron ita sei aprende kona-ba oinsá atu ajuda bebé bainhira nia moras! Sé mak iha alin ki’ik iha uma?” Mestra husu.

“Ha’u-nia alin Mateus!” Marta dehan.

“Ha’u mós iha alin,” Nino dehan.

12

Mestra ko’alia kona-ba oinsá atu kuidadu bebé bainhira sira tee-been.

“Importante inan kontinua fó-susubeen inan nian ba bebé dala-barak. No fó hahán been hanesan soupa ka sasoro-been beibeik bainhira bebé han ona hahán seluk. Presiza fó mós oralit,” Mestra esplika.

14

Mestra dehan katak tee-been perigu tebes tanba bebé sira bele lakon bee barak husi sira-nia isin (dezidratasaun).

“Se bebé lakon bee barak, ne’e bele halo bebé mate,” nia dehan.

16

Marta husu ba Mestra, “Saida mak oralit? Ne’e ita bele halo iha uma ka?” Mestra hatán, “Oralit ne’e ai-moruk ne’ebé bele halo tee-been di’ak lalais no prevene ita-nia isin atu lakon bee barak.” Ai-moruk hirak ne’e ita hetan iha fasilidade saúde. Maibé bainhira ai-moruk ne’e laiha atu ajuda lalais, ita bele kahur bee, masin no masin-midar hodi hemu. “Bainhira mak ita tenke lori alin ne’e ba konsulta?” Nino husu.“Pergunta di’ak, Nino. Bainhira bebé tee-been, loron ne’e kedas tenke lori kedas ba fasilidade saúde. No la’ós tee-been de’it maibé mós bainhira sira hatudu sinál perigu seluk hanesan isin-manas, me’ar maka’as, isin kulit mean, nst. atu nune’e sira bele hetan tratamentu própriu husi pesoál saúde”, Mestra dehan.

18

Hafoin eskola, Marta ho Atoi to’o uma no ajuda sira nia Ama prepara meja ba han-kalan.

“Mmm, soupa fore-mungu ho na’an-manu!” Marta dehan.

Atoi mós kontente, “Ha’u-nia favoritu!”.

20

Marta ho ninia família han hamutuk no halo planu kona-ba aban.

“Ita atu ba tasi ibun ka, Apa?” Atoi husu.

“Loos duni! Oras tan, imi kose nehan lalais no ba toba ona para aban ita hadeer sedu!” Apa dehan.

22

Molok atu toba, Marta rei bebé Mateus nia liman.

“Ha’u hadomi loos ó, bonito!” Marta dehan ba Mateus.

24

Dadeersan, Marta ho Atoi hadeer no hatais sedu hodi ba tasi.

“Ha’u ho Mateus hela de’it. Ate logo!” Ama dehan.

“Loos ona. Ami ba lai!” Marta hatán ba ninia Ama.

26

Bainhira to’o iha tasi-ibun, Marta ho Atoi komesa duni malu.

“Ita ba buka sipu!“ Marta dehan ba Atoi.

“Ha’u mós hakarak buka kadiuk!” Atoi hatán.

28

Hafoin buka kleur loos, Marta hetan sipu boot rua ho kór mean.

“Aiya! Rua kedas ne’e. Nino sei gosta loos!” Marta kontente loos.

Atoi mós gosta, “kór jeitu loos,” nia dehan.

30

Loron komesa manas liu no sira nia Apa bolu sira.

“Marta! Atoi! Mai ita ba uma ona!”

32

Iha dalan ba uma, sira hola sabraka hodi han.

Midar loos!” Atoi dehan ho hamnasa.

“Vitamina mós barak!” Marta dehan.

34

Marta sira to’o uma no rona Mateus tanis maka’as loos.

“Nusa, Mateus?” Apa husu.

Ama dehan ho tauk, “Nia tanis la para, no nia mós tee-been hela.”

36

Marta hanoin katak Mestra ko’alia kona-ba oinsá atu ajuda bebé ho moras tee-been.

“Nia tenke hemu barak!” Marta esplika.

“Ne’e ka, Marta?” hatan Marta nia Ama.

38

Kakatua mós hanoin Mestra nia hanorin, no fó hanoin ba Marta kona-ba bee kahur ho masin no masin-midar.

“Apa! Ami-nia Mestra dehan tenke prepara bee kahur ho masin no masin-midar hodi fó ba nia. No mós Ama presiza fó-susu ba nia dala-barak”.

40

Marta nia Apa kahur bee, masin no masin-midar no komesa fó-hemu ba Mateus

Marta esplika ba sira, “Tenke fó neineik ba nia. Nia tenke hemu duni tanba nia lakon bee barak.”

Atoi hanoin barak, “Mateus atu di’ak ona ka, Marta?” nia husu.

42

Mateus hemu duni maibé nia sei tee-been nafatin no komesa muta, no Marta dehan sira tenke lori nia ba fasilidade saúde.

“Muta no tee-been ne’e sinál perigu! Ita presiza lori nia ba kedas fasilidade saúde atu hetan tratementu!” nia dehan.

Apa mós konkorda, “Ne’e loos, Marta, mai ita ba lalais.”

44

To’o iha fasilidade saúde, pesoál saúde fó atendimentu ba Mateus.

“Ama, nia di’ak hela ka?” Atoi hanoin loos ninia alin.

������������� ������������������������������������ � ���loos,” Ama hatán.

46

Hafoin tratamentu, Marta haree katak Mateus komesa di’ak.

“Bebé Mateus sei di’ak lalais tanba imi lori nia mai iha ne’e ho tempu ne’ebé loos,” dehan pesoál saúde.

Marta nia inan-aman sente kaman uitoan.

48

� ��������� �� �������� � ���������������

“Ita sorte Marta hatene oinsá atu salva ninia alin Mateus!” dehan Apa ho orgullu.

Derepente, Marta sente buat ida iha ninia bolsu.

“Aiya ha’u atu haluha! Segunda ha’u sei fó ida ba kolega Nino.

Ida ne’e ba ha’u nia alin Mateus!” Marta fó Mateus sipu boot hodi nia halimar.

50

Mateus di’ak ona no Marta nia família ki’ik kontente loos.

“Ha’u-nia bin ne’e matenek mak ne’e! Nia hatene buat barak kona-ba bebé nia saúde!” Atoi dehan ba Marta.

“Ha’u sempre kontente ha’u bele ajuda ha’u-nia alin sira!” Marta dehan.

52

© Departamentu Promosaun no Edukasaun Saúde, Ministériu Saúde 2018

Livru ne’e prodús husi Ministério da Saúde, ho apoiu tékniku no fundu husi UNICEF

no Uniaun Europeia.

VIII GOVERNO CONSTITUCIONALMINISTÉRIO da SAÚDE

DIRECÇÃO NACIONAL DE SAÚDE PÚBLICADEPARTAMENTU PROMOSAUN NO EDUKASAUN SAÚDE

Rua: CaicoliDili, Timor-Leste