A. Tembung dolanan

CUBLAK-CUBLAK SUWENG cublak cublak suweng

suwenge ting gelenter

mambu ketundung gudel

pak empong lera-lere

sopo ngguyu ndelikkake

sir sir pong dhele gosong

sir sir pong dhele gosong

JARANAN

jaranan-jaranan… jarane jaran teji

sing numpak ndara bei

sing ngiring para mantri

jeg jeg nong..jeg jeg gung

prok prok turut lurung

gedebug krincing gedebug krincing

prok prok gedebug jedher

JAMURAN

Jamuran jamuran ya ge ge thok

jamur apa ya ge ge thok

Jamur payung, ngrembuyung kaya lembayung

sira badhe jamur apa?

PITIK TUKUNG

Aku duwe pitik, pitik tukung

saben dina, tak pakani jagung

petok gogok petok petok ngendhog siji

tak teteske,kabeh trondhol dhol dhol

tanpa wulu,megal-megol gol gol gawe guyu

PADANG MBULAN

Yo, poro konco dolanan ning jobo

Padang mbulan, padange koyo rino

Rembulane sing ngawe-awe

Ngelingake ojo podo turu sore

B. Tembung Macapat

Tembang macapat iku tetembangan klasik jawa kang mula bukane jaman para Wali. Mulane isi

lan cerita kang ana ing sakjroning tembang-tembang macapat akeh kang isine budi luhur, akhlak,

lan kabudayan agung. Tembang macapat kabehe ana sewelas. Awake dhewe akeh kang wis tau

krungu tembang macapat, nanging akeh sing durung ngerti ana filsafat lan urutaning tembang

macapat iku. Sak durunge, ana ing tembang macapat, ana istilah Guru gatra, guru wilangan, lan

guru lagu. Guru gatra yaiku cacahing baris ana ing sak pada (bait), guru wilangan yaiku cacahing

suku kata ana ing saben gatra (baris), lan guru lagu yaiku tibaning swara (vokal) ana ing

pungkasaning gatra/baris.

1. Maskumambang.

Guru gatra (baris) : 4 gatra, guru wilangan lan guru lagu-ne yaiku: 10i, 6a, 8i, 8a. Contone

tembang maskumambang:

Klek-klek biyung sira aneng ngendi (10i : guru wilangan 10, guru lagu ”i”)

Enggal tulungana (6a)

Awakku kecemplung warih (8i)

Gulagepan wus meh pejah (8a)

Maskumambang nggambarake menungsa isih ana ing alam Ruh lan durung lahir, terus ruh

dititisake ana ing gua garbaning ibune awake dhewe. Kumambang artine kemampul, terapung-

apung. Nggambarake menunggo ana ing njero rahim. Watak tembang iki, umume isine kaya

wong kang lagi sambat lara, ketula-tula, lan sengsara

2. Mijil

Mijil kuwi artine lahir utawa bahasa inggrise mbrojol. Contone:

Mijil ing donya siniwi ratri (10-i)

Kabeh durung katon (6-o)

Amung anjali soca ing tembé (10-é)

Lelaku alon siniji-siji (10-i)

Nunggu mring wartaning (6-i)

Sesotya satuhu (6-u)

Alhamdulillah awake dhewe lahir ono ing bumi Pertiwi kang jarene Gemah Ripah Loh Jinawi

Tata Tentrem Kerta Raharja Lir Saka Sambikala, kathah ingkang korupsi, pemimpin ayem

rakyate sengsara, lir mulya kebak durjana.

3. Sinom

Gambaran menungsa nduwe sipat kang isih enom. Kaya dene bocah cilik kang lagi ngerti

ndonya. Sinom nduwe 9 gatra, guru wilangan lan guru lagune yaiku: 8 – a, 8 – i, 8 – a, 8 – i, 7 –

i, 8 – u, 7 – a, 8 – i, 12 – a

4. Kinanthi

Kinanthi iku salah sijine tembang macapat kang umume kanggo nggambarake rasa seneng,

katresnan, lan kawicaksanan. Kinanthi bisa nduwe arti gegandhengan tangan lan bisa uga jeneng

sawijining kembang. Kinanti saka ukara kanthi utawa tuntun kang maknane awake dhewe butuh

tuntunan utawa dalan kang bener supaya cita-cita lang pangarep-arepe awake dhewe bisa

kawujud lan kaleksanan. Contone golek ngilmu kanuragan nganti tekan Taiwan, direwangi dadi

TKI, sing penting entuk ilmu lan nge-net gratis.:D. Kinanthi nduweni 6 gatra,

8-u

8-i

8-a

8-i

8-a

8-i

5. Asmarandana

Tembang Asmarandana umume kanggo wong sing lagi gandrung. Yen dideleng wantah,

Asmarandana dijupuk seka asmara kang artine tresna, lan dahana kang artine geni. Mula saka

kuwi, Asmarandana isine wuyung lan samubarang kang magepokan karo tresna. Dadi saiki yen

mas-mas lan mbak mbak lagi gandrung, ojo mung nyanyi lagune ST12 utawa Kangen Band..

saiki jamane macapat.. (ngimpi entuk to?). Mungkin yen macapat trus diiringi Erwin Gutawa,

dadi mantep…OYEEE!!

Asmarandana nduweni 7 gatra (larik) ana ing saben pada (bait):

8-i

8-a

8-é

8-a

7-a

8-u

8-a

6. Gambuh

Tembung iki biasane yen ditakoni tapi ora ngerti jawabe, Gambuh!!! (eh kleru, Lha mBuh!!)..

ngguyu sik, ben ga sepaneng.

Awalaning ukara gambuh yaiku jumbuh / sawiji,dadi siji sing artine komitmen nyawijikake

tresno ana ing kulawarga.

Gambuh iki salah sawijining tembang macapat sing paling akeh kanca-kancaku bisa. Isih eling

karo tembang :

Sekar gambuh ping catur

Kang cinatur

Polah kang kalantur

Tanpa tutur katula-tula katali

Kadaluwarsa katutur

Katutuh pan dadi awon

Tembang Gambuh mbok menawa pancèn kebak ing pitutur. Pitutur kang nggiring manungsa

supaya éling marang tumindak-tumindaké. Manungsa dielingaké yènta kabèh tingkah polah

manungsa iku ana akibaté. Adigang, adigung, adiguna, bakal nyilakaké urip manungsa sing duwé

patrap kaya mangkono iku

7. Dhandanggula

Gambaran urip kang wis mapan, manis, lan mulya. Cukup sandang, papan, lan pangan.

Dhandhanggula isine pengarepan utawa pengajap kang becik. Dhandhang iku pengarep-arep.

Akeh pitutur becik ono ing tembang iki. Salah sawijining tembang macapat sing paling disenengi

almarhum bapak yaiku Dhandanggula. Aku isih kelingan bapakku ngajari aku tembang iki, kang

cinipta dening Sunan Kalijaga :

Ana kidung rumeksa ing wengi

teguh hayu luputa ing lara

luputa bilahi kabeh

jim setan datan purun

paneluhan tan ana wani

miwah panggawe ala

gunaning wong luput

geni atemahan tirta

maling adoh tan ana ngarah ing mami

guna duduk pan sirna

Dhandhanggula saben pada (bait) ana 10 gatra (larik).

10-i

10-a

8 -é

7 -u

9 -i

7 -a

6 -u

8 -a

12-i

7 -a

Pokoke tembang iki top markotop caahh!!! Liyer-liyer karo ngantuk-ngantuk .

8. Durma

Durma kuwi nggambarake kahanan kang wis mapan. Sakwise mapan, ojo lali nindakake Darma

(Durma asale saka darma/sedhekah utawa derma). Saben pada (bait) ana 7 gatra (larik).

12-a

7 -i

6 -a

7 -a

8 -i

5 -a

7 -i

9. Pangkur

Saka tembung mungkur, ngedohi awisanipun gusti ingkang maha kuwasa. Yen pangkur, macapat

sing paling tak senengi.

jinejer neng Wedhatama

mrih tan kemba kembenganing pambudi

mangka nadyan tuwa pikun

yen tan mikani rasa

yekti sepi asepa lir sepah samun

samangsane pasamuwan

gonyak-ganyuk nglelingsemi.

Tembang pangkur rinakit pitung gatra (larik) saben pada (bait)

8 – a

11- i

8 – u

7 – a

12- u

8 – a

8 – i

10. Megatruh

Saka tembung Megat : pisah, Ruh : nyawa / roh. Nggambarake menungsa kang lagi sakaratul

maut. Saka rahim, lahir, dewasa, lan urip mulya, ana ing pungkasaning cerita menungsa mesthi

mati. (Serius lho cah… cerita Twilight saga, sing jarene ora mati-mati kuwi ngapusi cahh..!!)

Saben pada, tembang iki ana limang gatra (larik), kanthi guru wilangan lan guru lagu :

12u, 8i, 8u, 8i, 8o.

Tembang iki mendayu-ndayu..

11. Pocung

Iki uga macapat kang paling akeh kanca-kancaku bisa nembangake. Lumrahe tembang pocung

isine cangkriman (tebak-tebakan). Tembang iki nggambarake sak uwise menungsa mati banjur

di-pocong (pocung : pocong, dikafani). “ Innaka Mayyitun Wainnahum Mayyituuna “, “ Sejatine

kowe kabeh bakal mati lan wong liyane mati uga”. Ana uga tembang pocong kang isine pitedah

becik, contone:

Ngelmu iku kelakone kanthi laku

Lekase lawan kas

Tegese kas nyantosani

setya budya pangekesing dur angkara

Tembang macapat kuwi dudu tembang kaya tembang padha umume. Kowe lan aku uga bisa

nggawe tembang macapat. Kang wigati, kudu manut karo guru gatra, guru wilangan, lan guru

lagu ana ing saben-saben tembang macapat mau. Muga-muga bisa kanggo renungan. Para

leluhur ing tanah jawi nggawe tembang kang kebak ilmu, pituwuh, lan filsafat kang agung. Ayo

dilestarikake lan diuri-uri kabudayane dhewe…

Cekap semanten, tulisan punika dipunsariaken saking kathah sumber. Mugi-mugi saget manfaat

tumrap kula panjenengan sami… Nuwun

Ketua : Yasir abdillah

Raedita pandu W

Binar kukuh

Ilham atha