Pidato Pasambahan Panitahan Maanta Marapulai

Sutan Sinaro :

(Dari kaum laki laki) Manitah kapado niniak mamak kaum perempuan..... Maa mak Datuak Putiah,

kamanitah jo mamak...

Datuak putiah :

(Niniak mamak kaum perempuan) ...laiSutan Sinaro, manitah lah....

Sutan Sinaro:

Sungguah mak datuak nan disambah, tagak dek adat jo pusako, dek barih cupak jo gantang, batinnyo

kapado sagalo niniak jo mamak. Karajo nan bapokok, silang nan bapangka. Adopun panitahan nan

ditibokan pado mamak, pihak dikaminan datang, salangkah turun dari janjang, dari tanggo rumah

kampuang kami, barih tabantang kami turuik, labuah nangadang kami tampauh masuak ka jorong

kampuang nangko. Kok tibo alah baduduakan, lah tarunjak siriah dicarano,tando lah sudah minum jo

makan. Pihak didiri marapulai, lah duduak diateh rumah. Dilingkuang niniak jo mamak,dihadapan ibu

jo bapak sarato ipa nan jo bisan. Kok tumbuah ditangah rumah, kajadi adat bijo nan baiak, katungkek

pamani jalan, kakarih pamaga diri, kok elok ratak tangannyo, panjang bao pangarek, singkek bao

kamauleh, senteng bao kapambilai. Kok elok ratak lidahnyo, kusuik bao kamanyalasai, karuah dapek

mampajaniah. Tapi samantangpun baitu, pihak diri marapulai, raso manetek niro pinang, antah

baraie antah tidak, nan bak alu patah batimpo, musim pabilo kabaturak. Iyo nan bak padi salibu,

awak tumbuah musim talampau, urek tagantuang kajarami, rangkiang tinggi nandicinto. Hanyo

sabuah pintak kami supayo ditarimo di mamak datuak elok elok, iyo didalam tapak tangan, ikolah

sambah nan ditibokan ka mak datuak

Datuak Putiah :

Lah sampai tu di sutan

Sutan Sinaro :

Alah mak datuak

Datuak Sati :

Panitahan sutan nan taanta kapado ambo, lompek dibari basitumpu, sambah tarapak batujuan,

batinnyo kapado niniak jo mamak Karajo nan bapokok, silang nan bapangka. Adopun panitahan nan

ditibokan pado mamak, pihak dikami nandatang, salangkah turun dari janjang, dari tanggo rumah

kampuang kami, barih tabantang kami turuik, labuah nan gadang kami tampauh masuak ka jorong

kampuang nangko. Kok tibo alah baduduakan, lah tarunjak siriah dicarano, tando lah sudah minum

jo makan. Pihak didiri marapulai, lah duduak diateh rumah. Dilingkuang niniak jo mamak, dihadapan

ibu jo bapak sarato ipa parabisan. Kok tumbuah ditangah rumah, kajadi adat bijo nan baiak,

katungkek pamani jalan, kakarih pamaga diri, kok elok ratak tangannyo, panjang bao pangarek,

singkek bao kamauleh, senteng bao kapambilai. Kok elok ratak lidahnyo, kusuik bao kamanyalasai,

karuah dapek mampajaniah. Tapi samantangpun baitu, pihak diri marapulai, raso manetek niro

pinang, antah baraie antah tidak,nan bak alu patah batimpo, musim pabilo kabaturak. Ibo nan bak

padi salibu, awak tumbuah musim talampau, urek tagantuang kajarami, rangkiang tinggi nan dicinto.

sabuah pintak dari sutan supayo batarimo elok elok, iyo didalam tapak tangan,kan baitu lalunyo di

Sutan

Sutan Sinaro :

Iyo baitu bana lalunyo mak datuak

Datuak Sati :

Panitahan Sutan nantun , alah diadat nan bapakai, alah talingka di pusako. Sungguahpun nan baitu,

karano laidihadapan niniak mamak nan basamo, ambo ambiak kato baiyo, mananti sutan sakutiko,

kan lai didalam adat tu Sutan..?

Sutan Sinaro :

Alah didalam adat tu mak Datuak, mananti lah ambo

Datuak Putiah :

(Baiyo kamambari jo niniak mamak lain), dan mangumbalikan, ma.... Sutan Sinaro, kumbali

panitahan pada Sutan Sinaro. Nan sapanjang kato Sutan, iyolah kato sabananyo, satantang diri

marapulai, alah rancak ditimpo baiak, basi baiak diringgiti, alah talatak didalam adat, alahnyo duduak

di pusako. Anak ciek lah jadi duo, tampaiak baiyo jo batido, alah ditarimo elok-elok. Itulah nan kajadi

barinyo di ambo pado Sutan.

Sutan Sinaro :

Lah sampai di mak Datuak ..?

Datuak Putiah :

Alah Sutan

Sutan Sinaro :

Sapanjang pambarian mak Datuak, rundiang nan alah kami danga, rupo nan alah kami liek.

Satantang diri marapulai, alah rancak ditimpo baiak, basi baiak diringgiti, alah talatak didalam adat,

alahnyo duduak di pusako. Anak ciek lah jadi duo, tampaiak baiyo jo batido, alah ditarimo elok-

elok.kan baitu barinyo tadi di mak Datuak.

Datuak Putiah :

Iyo baitu bana Sutan

Sutan Sinaro :

Karano pintak alah buliah kandak alah balaku, Alhamdulillah kajawabnyo mak Datuak.

Datuak Putiah :

Sutan kato Alhamdulillah, panitahan bateh kito lai Sutan

Sutan Sinaro :

Sakiro-kiro babateh dulu mak datuak. (Sutan Sinaro baiyo jo sialek untuak manitah kapulang )

Maa malin mudo, kamanitah jo Malin.

Malin Mudo :

(Sipangka) Lai Sutan Sinaro manitah lah.

Sutan Sinaro :

Sungguahpun Malin nan dihimbau, lompek dibari basitumpu, batinnyo kapado niniak jo mamak,

karajo nan bapokok, silang nan bapangka. Panitahan nan ditibokan pado Malin, dihari nan bak kini,

nan dimukasuik alah sampai, nan diama alah pacah, kok satantang minum jo makan, minum alah

ubek auih, makan alah ubek litak, Alhamdulillah kabarinyo. Baa lai diateh nantun, bulek lah sagiliang,

pipih alah satapiak dek niniak jo mamak, sarato sarato sudaro nan datang, bak ibarat urang

manyumpik: Kapeh tabang mambao angin, panulak damak kalua, damak lah rintang didaun,

kumbang lah rintang dibungo, buruang lah rintang dibuah, kapeh nak babaliak katanah, ikolah bana

dianta bakeh Malin.

Malin Mudo :

A pulo nan manjadi kato di Sutan ka ambo, batinnyo kapado niniak jo mamak, karajo nan bapokok,

silang nan bapangka. Panitahan nan ditibokan pado Malin, dihari nan bak kini, nan dimukasuik alah

sampai, nan diama alah pacah, kok satantang minum jo makan, minum alah ubek auih, makan alah

ubek litak, Alhamdulillah kabarinyo. Baa lai diateh nantun, bulek lah sagiliang, pipih alah satapiak dek

niniak jo mamak, sarato sudaro nan datang, bak ibarat urang manyumpik: Kapeh tabang mambao

angin, panulak damak kalua, damak lah rintang didaun, kumbang lah rintang dibungo, buruang lah

rintang dibuah, kapeh nak babaliak katanah, kan baitu lalunyo di Sutan..?

Sutan Sinaro :

Iyo baitu bana lalunyo Malin.

Malin Mudo :

Buah panitahan Sutan tadi, alah taracak diadat, alah talingka di pusako, tapi karano lai pulo nan

manuruik undang,

bakato baiyo bajalan bamolah, ambo bao kato jo mupakat, kapado niniak mamak, karajo nan

bapokok, silang nan bapangka, mananti Sutan sakutiko, kan lai didalam adat tu sutan.

Sutan Sinaro:

Iyo lah tibo bana nan baitu nan diadatkan Malin, mananti malah ambo

Malin Mudo :

(Mupakat jo niniak mamak, mamak nan pangka)...... maa mak Datuak Putiah, kabarundiang jo

mamak...

Datuak Putiah :

Lai Malin laluanlah...

Malin Mudo :

Nan kajadi parundiangan jo mamak, kok bunyi lah samo didanga, nan kabarinyo ambo japuikan ka

mamak Datuak

Datuak Putiah :

Samo samalam sajolah kito disiko. Malin

Malin Mudo :

Maa Sutan Sinaro, panitahan kumbali pado Sutan

Sutan Sinaro: Lai Malin

Malin Mudo :

Dimaso cako Sutan mananti, ambo manjapuikan nan kabarinyo kapado niniak jo mamak, karajo nan

bapokok, silang nan bapangka. Nan kabarinyo dibaliau, manuruik pasa nan biaso, rumah dibuek

tampaik bamalam, sumua digali tampaik mandi, kayu gadang tampaik balinduang. Iyo mamintak

karajo nan bapokok, silang nan bapangka, samo samo bamalamlah kito disiko. Ikolah nan kabuah

barinyo pado Sutan.

Sutan Sinaro ;

Dimaso nan cako ambo mananti , Malin manjapuikan nan kabarinyo kapado niniak jo mamak, karajo

nan bapokok, silang nan bapangka. Nan kabarinyo dibaliau, manuruik pasa nan biaso, rumah dibuek

tampaik bamalam, sumua digali tampaik mandi, kayu gadang tampaik balinduang. Iyo mamintak

karajo nan bapokok, silang nan bapangka, samo samo bamalamlah kito disiko. Kan baitu barinyo di

Malin.

Malin Mudo : Iyo baitu bana Sutan.

Sutan Sinaro :

Sabanyak rundiangan Malin nan katangah, alah manuruik alua jo patuik. Tapi sungguahpun baitu.

Karano rumah gadang lai duo tigo, bamalam bana kami disiko, tantu nan ciek katingga pulo. Ikolah

saboknyo, mangko kami mamintak juo, dilapeh jo hati nan suci. Itulah bana dijamboan bakeh Malin

Malin Mudo;

Sabanyak pambarian Sutan nan katangah alah dirasuak manjariau, alah dilaie lakek atok. Tapi

sungguahpun baitu, mangko tabik juo kabanaran dikami, hari kalam bulan kok kabua, dihilie jalan

kok runtuah, dimudiak jalan kok taban, kami maanta tak saleso. Kok ado maro malintang, tantu nan

pangka kaberatan, ikolah mangko nak mamintak juo malam disiko. Sakian bana dianta bakeh sutan.

Sutan Sinaro ;

A pulo nan manjadi pambarian di Malin cako, hari kalam bulan kok kabua, dihilie jalan kok runtuah,

dimudiak jalan kok taban. Kok tumbuah maro malintang, nan pangka maanta tak saleso. Kan baitu

lalunyo di Malin

Malin Mudo :

Iyo baitu bana, sutan

Sutan Sinaro :

Sapanjang pambarian Malin, alah manuruik pasa nan biaso. Tapi mangko manjadi parmintaan juo

bagi kami, karano dihilie jalan lai luruih, dimudiak jalan lai pasa, kok ado bana maro nan malintang,

kami sairiang lai basamo. Nak lapeh juo lah kami jo hati nan suci jo muko nan janiah. Ikolah bana nan

dijapuikan juo bakeh Malin

Malin Mudo :

Maa.. Sutan Sinaro, ruponyo ciek di ambo panahan, duo di Sutan Sinaro pambarinyo, mako nak

ambo bao baliak bakato baiyo bajalan baamuah, kapado niniak mamak, karajo nan bapokok, silang

nan bapangka, mananti Sutan sakutiko, kan lai bana nan baitu Sutan.

Sutan Sinaro :

Asa lai pintak kabuliah, kandak kabalaku, mananti malah ambo Malin...

Malin Mudo :

Maa mamak Datuak Putiah , kabarundiang baliak jo mamak.

Datuak Putiah : Rancak Malin laluanlah..

Malin Mudo :

Nan kajadi rundiangan jo mamak , rasonyo iyo nan maurak selo, nak maasak langkah juo sialek

katampaik masiang masiang. Nan kajadi barinyo, ambo japuikkan baliak ka mamak datuak

Datuak Putiah :

(Baiyo jo nan pangka), dan mangumbalikan . Maa Malin Mudo, kok marosoklah sahabih raso, kok

mangaruak lah sahabis gauang. Kini baato hanyo lai, kito lapeh juolah jo hati nan suci,jo muko nan

janiah. Itulah nan kabarinyo di ambo pado Malin.

Malin Mudo :

Karano nan dijapuik alah tabao, nan dijuluak alah lareh, ambo kumbalikan kaasanyo, mak Datuak

Datuak Putiah :

Kumbalikan lah Malin.

Malin Mudo:

Maa Sutan Sinaro, panitahan kumbali pado Sutan

Sutan Sinaro : Lai, Malin.....

Malin Mudo :

Dimaso nan cako Sutan mananti, ambo manjapuikan nan kabarinyo kapado niniak jo mamak karajo

nan bapokok, silang nan bapangka. Kok adatlah timbang bajawek, bana lah timbang balewai, pintak

kami nan alun kabalaku, pintak Sutan juo baru nan kabuliah. Dilapeh juo jo hati nan suci, sarato

muko nan janiah, itulah nan kabuah barinyo pado Sutan

Sutan Sinaro

Dimaso nan cako ambo mananti, Malin manjapuikan nan kabarinyo kapado niniak jo mamak silang

nan bapangka. Lah dapek nan kabarinyo, pintak buliah kandak balaku. Dilapeh juo jo hati nan suci,

sarato muko nan janiah, kan baitu barinyo di Malin

Malin Mudo :

Iyo baitu bana , Sutan

Sutan Sinaro :

Karano pintak alah buliah, kandak alah balaku, basugiro malah kami lai Malin

Malin Mudo

Tantang basugiro, parundiangan bateh kito lai sutan

Sutan Sinaro :

Karano Malin alah takiro kiro, diamboalah manjadi agak-agak pulo, eloklah rundiangkito batehi

Maanta Marapulai

ALEK

Angku Dt. Sinaro Nan Gamuak ?….

DT. Sinaro Nan Gamuak

Sampaikanlah Sutan !….

ALEK

Tangan ba-angkek jari basusun, rila jo maaf dipuhunkan pado Angku ….

DT. Sinaro Nan Gamuak

Kapado Allah ….

ALEK

Mak St. Sari Alam ? …..

ST. Sari Alam

Manitahlah !…..

ALEK

Salam batibokan pado Mamak ….

St. Sari Alam

Wa-alikum salaaam…..

ALEK

Maa-nyo St. Sinaro?…..

PANGKA

Sabuiklah ….

ALEK

Kasampurnaan sambah….. Walaupun kinitu Angku surang, baduo jo batigo sajo nan taimbaukan gala

talewakan tuah; nan ba-angkekkan tangan basusunkan jari ba-aturkan rila dengan maaf … Akan

tetapi, kamanolah ujuik-mungkasuiknyo, iyo kapado silang nan bapangka pakarajaan nan bapokok;

ditampek hujan barasah paneh bapuhun, urang nan manjinjiang tampuak-karajo diateh Rumah

Gadang nangko.—-

Saluak ado detapun banyak

Babaju suto nak-rang Padang

Disasah dimalah diampaikan

Dilangkan nangkolah juo….

Datuak ado Sutanpun banyak

Ragulah mato dek mamandang

Sambah dimano disampaikan

Iyo di Sutan nangkolah juo

A-yo maa nyo St. Sinaro?…….

PANGKA : Yooolah

ALEK

Jokok diagak dikanang-kanang.- Ditimbang sahabih patuik, manakua ambo kabumi, maningadah

ambo kalangik.—- Dek kito majilih-karapatan kini nangko, lah ampek ko-mah Adat nan bapakai.-

Manolah 4 nan bapakai : Partamu sambah-manyambah, kaduo baso jo basi, katigo siriah jo pinang,

cukuik kaampek minum-makan.—-

Satantang minum jo makan, iyolah bana kato urang: Elok lenggang dihari paneh, maradeso diparuik

kanyang, sinan tabukak kiro-kiro… kok makan lah tibo dinan sadang, kok minum lah tibo dinan

sajuak.- kini, aiya baransua Jadi darah, nasi barensuik jadi dagiang, syukur nikmat pado Allah, puji di

Sutan tatonggoknyo.—-

Sasuai bak undang Sutan juo, baa-lah bunyi Undangnyo :

“Kok batanyo kan iyo salapeh urak, kok barundiang sasudah makan”.—- Mako, kinilah basuonyo

mungkin jo patuik, maso jo kutiko ambo kamatangahkan parundiangan kabakeh silang nan

bapangka.- Tembak ba-alamat cancang balandaskan, ka St. Bandaro juo muaronyo….

PANGKA

Yooolah….

ALEK

Apolah nan kamanjadi buah parundiangan ambo : cancang kan duo sagaragai Sutan, kapa nan duo

salabuahan.- Kok Adat alah tabatu-intan, kabawahnyo takasiak bulan. – Syarak alah taujudulah,

katehnyo taambun-jantan…. Saukua hukum sasuai, sadundun Adat jo Agamo, Adat kawi syaraklah

lazim, undang manuruik dibulakang.—-

Kini bakabek jo akad-nikah, babuhua-mati ijab kabul, babuhua-sintak jo bagian, katangga raso tak

mungkin, antah kok Allah manggarakkan.—–

Mako tasalanggarolah nikah-kawin antaro si Herman bin Mukhtar St. Maruhun, Suku Sikumbang

dibawah payuang Datuak Palindih; dengan Murniati binti Abdul Wahab kamanakan Sutan Parmato,

suku Jambak dikalupak Dt. Rajo Ameh.—-

Satantang dek diri marapulai; karano biaso pulai bapangkek naiak maninggikan ruweh jo buku,

manusia bapangkek turun maninggakan adat jo pusako; maso keteknyo dibari Bapak namo, lah

gadang diagiah mamak gala, kini bagala : Sutan Kulipah… Tolong maimbaukan dipasa nan rami,

malewakan dilabuah nan golong.—-

Maliyek luruih batujuan, mamandang adat bajukalo; kok luruih makanan tiliak, ballabeh manahan

cubo, bantuak dimakan siku-siku; bungka ganok manahan asah, hukum adia manahan bandiang,

kato bana manahan liyek, banamo japuik jo anta, basambia ara jo iriang…. Arak-iriang sapanjang

jalan, dombak dombai sapanjang labuah, aguang calemong jadi tapuang, sorak jo sorai jadi bungo.-

Salatuih badia-pusako, pusako Pangulu dinagari, masuak kakorong kampuang Sutan…. Masuuak

kakorong-kampuang Sutan, kinilah duduak ateh rumah, duduak diruang Rumah Gadang,

dilingkungan niniak jo mamaak, dimuko Ibu jo Bapo, sarato ipa denga bisan, cukuik-sarato mudo

matah.—-

Adopun kamudian dari pado itu, sapihak dek kamiko nan datang; ado mamacik pitaruah jo amanah,

alah tasuruah tasarayo, dek mamak sabalah sinan; untuak mahanta-mairiangkan St. Kalipah, naik ka-

ateh rumah-tanggonyo; ko-mah lah tibo kami siko Stan, tibo sarato jo Adatnyo.- Mahanta sampai

kateh rumah, baulua-jawek amo jo Sutan, batumpu-tapak samo Mamak.—–

Jokok diliyek simarapulai, dicaliak anak-daronyo; nan bak parmato jo pangarang, bak cincin pulaang

kajari.- Surang ikan surang kulari, samo tapukek kaduonyo, surang bulan surang mantari, samo

caredek kaduonyo.—– Pandang-pandang malah dek Sutan, dalea dikasua kabasaran, dilingkuang

andam baliak-balah, langkok sarato pangiriangnyo, niniak mamak samo di dalam.- Mamakai baju

balah-buluah, siba batanti timba baliak, langan bakatak banang-makauh, salo manyalo banang

ameh.- Bacawek bajambua-suto, bapandiang mangko bapilin, takanak sakin-pangidam.- Lakek

sarawa kipeh-duanggo, baturap duo ditangah , elo maelo pisak turang, sajangka pucuak rabuangnyo.

—- Silaulah pulo anak-daro; Nan bak padi siranik-jintan, paneh tibo dilingkuik-lingkuik, hujan datang

dikaka-kaka, sauleh haram kok diayam, lah tandeh mangkodigaro.- disegehilah sianak-daro,

dilakekkan baju suto baralun, nan baukia bagajah-meno, salendang kain kapunuik, abuaknyo katua-

barkatua.- Badapak subang dipipih, abuaknyo katua-barkatua.- Badapak subang dipipih badariang

galang ditangan, buatan tukang jolong pandai, kilek-kumilek cahayonyo.—–

Salimbak nan dari pado itu: Dimaso sakarang iko kini, dimalam samalam nangko; nak kami latakanlah

baban nan baju-juang, dibaiyakan utang tapabuek; disampaikan pasan nan babaok, padolah badan

disesonyo.—- Yaitu: Adok kadiri Tan Kalipah: Nyampang kok tumbuah tangah rumah, kajadi Adat

bijo-baiak, katungkek pamani jalan, kakarih pamaga Adat, dalam adat baradat pulo …. Kok elok ratak

tangannyo, baolah manukuak jo manambah, bao manyisik jo mambilai, — Kok elok ratak lidahnyo:

Kusuik baolah manyalasai, karuah baolah manjaniahi.- Kamudiak nak sarantak galah, kailia nak

sarangkuah dayuang, bajalan samo mairiang, baiyua samo maisi.—- Apun baa-to hanyo lai, salampih

nan dari pado itu, ko-mah jinihnyo marapulai Stan: Raso manetek niro pinang, nan bak alu patah

patigo, musim pabilo kabataruak.- Nyato ibaraik padi salibu: Awak tumbuah musiim talampau, urek

bagantuang kajarami, rangkiang tinggi nan dihadang… Mohon ditarimo dek mamak urang disiko, iyo

didalam tapak-tangan, diganggam adat jo Pusako.—- Putiah kapeeh nak mancaliak Stan, putiah hati

bakaadaan, kaadaannyo: Kato bajawab gayuang basambuik sambah bakumbalikan sakito sambah

pado Sutan…..

PANGKA

Lah sampai dek Sutan ? …..

ALEK

Sakiro-kiro

PANGKA

Salorong dibadan ambo kini, nan bak ibaraik urang mamanciang: Sadang dirintang aiya-ilia, dalam

dimabuak dek galombang, iyo dialun-alun buiah; tali tagang piapuang ilang kaiya disemba dek

gurami…. Duduak takajuik tukang panciang, kaiya putuih bananglah kusuik.- Kini, manjalang banang

kagumpalan, kato dilatak dalam barih, bana disimpan kalimbago, diganjua rundiang jo mupakaik,

mananti Sutan Sakutiko?….

ALEK

Asahkan kandak lai kabuliah, pintak kok lai kabalaku, ia lamo jo lambek kami nanti, Stan….

PANGKA

St. Paarpatiah??…. Sambah bapulangkan.-

ALEK

Manitah Sutan.-

PANGKA

Laiya jo batin saukuran, isi kulik umpamo labiah, ganggam arek pagangan taguah, tibolah lukih

dilimbago.- Digiliang kato dipabuek, dapeklah run diang nan sabuah, diantakan kabakeh Sutan….

Apolaah nan kamanjadi buah antanyo, iyolah dihari sahari nangko, dimalam samalam kini :

Jokok disulam disuji-suji

Bakilin sangkuik kain banta

Jokok dikanang dikaji kaji

Disabuik asa jo muasa

Takalo maso dahulunyo, kutiko alun barabalun, bunga alun bijopun alun, niat tasimpan dalam hati,

iyo dihati ibu jo Bapo…

Nan jadi niat jo nasa dek balliau; dimintak sungguah pado Allah, mamuhun pado illahi, kironyo

dapeklah anak katurunan, diwarih nan kamanjawek, pusako nan kabatolong…..

Kok buliah anak laki-laki, ibaraik cincin dikalingking; kapanjapuik dagang nan jauah, kapanyonsong

panggilan tibo, pambangkik batang tarandam, palawan onjak dunia urang.- Kok buliah anak

parampuan, kaibarat bungo dilaman; limpapeh rumah nan gadang, sumarak anjuang paranginan,

acang-acang dalam nagari.—- Mako tiboleh maso kutikonyo, nan bak bida-bida urang kini, bak andai-

andai rang dahulu;

Ditabang batang talantak

Dikuduang sambilan jari

Barakaik do’a jo pamintak

Masonyo Allah kamambari

Baruliahlah anak parampuan, sari laiya sari banamo, banamo si Murniati.- Lalu diinang jo diasuah,

dijunjuang bagaimangkuto, ditanai gumalo, pamenan pagi jo patang…..

Dibalikan subang jo galang

Baganto ameh balampih

Dari ketek kinilah gadang

Sampai manjadi anak gadih

Lalu ditunjuak diajari, dididik adat sopan-santun, sacaro urang basuami… Umua cukuik bilangan

sudah, kini baumua 17, siriahlah patuik naiak junjuang.- Mako tabiklah niat jo nasa, handak

maminang jo mangacak, mancarikan judu tunangannyo… Dipikia-pikia dalam hati, dipikia lalu

dimanuangkan.- Pandangan jauah dilayangkan, pandangan dakok ditukiakan, nampaklah urang nan

sapadan.- Pandang lakek patuiklah sudah, jatuah piliahan ka-nan surang, si Herman urang namokan,

kini bagala St. Kalipah.- Urang ba-asa balimbago, baso baiak roman katuju, muluik manih paramah

pulo.- dek harok dinan kabuliah, dek cameh dinan kaindak, mako ditingkeklah janjang rang

sikumbang, ditapiak malah banduanyo.- Mamintak kapado nan kabuliah, bakaua kapado nan

kiramaik; makonyo Allah manggarakkan, batamu ruweh jo buku, saukua batang kajunjuangan, pintak

buliah kandak balaku, disinan niaik dilansuangkan.—- Sapakaik sugalo mamak, sasuai pulo jo bako,

saizin Datuak Panghulu; dihadirkan sapiah-balahan, dihimpun korong jo kampuang.- Nan jauah

dilapeh panggia, nan hampia makanan imbau, lalu dijapuiklah simarapulai, japuik sarat jo adaiknyo.

—-Alah basuluah mato hari, bagalanggang mato rang banyak, kok alek lah sapanuah rummah, kok

jamu lah salingkuang kampuang.- Sananglah hati Niniak Mamak, panuahlah runggo hati bundo,

mangucap syukur Ibu Bapo, dek utang alah talansaikan.—- Maa-nyo St. Parpatiah ???…..

ALEK

Sampaikan Stan !….

PANGKA

Adopun pintak jo pinto Sutan cako: Iyolah mohon ditarimo marapulai, ditarimo ditapak-tangan

diganggam Adat jo Pusako, kan iyo Baitu panitahan Sutan?…..

ALEK

Yo bana….

PANGKA

Syukur kapado Allah….. Dek pihak kami sipangka, sukolah bana manarimo; batampuang jo tapak-

tangan, diganggam jari nan sapuluah; kok ndak cukuik jo tapak tangan, bumi jo langik ditadahkan….

ALEK

Alhamdulillah …..

PANGKA

Salorong kapado anak-daro, ibaraik rabuang jolong mambacuik ba-umua bilangan hari, gadang

disiram ambun-malam, batang gampa sambilu indak.- Urek alun mancakam tanah, pucuak alun

mandapek angin, antah pabilo kabasaga…. Tapi, untuang kok elok pamintonyo, dek masin lidah Tan

Kalipah, dek dingin tangan suaminya, talakik rabuang jadi batuang.- Nyo baurek-bagumpa gadang,

nyo babatang baruweh-ruweh, badaun rimbun jo rampak.- Tabiang diagak jan-nyo runtuah, lurah

mamuji kalinduangan.- Samantang tinggi diawan, pucuaknyo runduak kabumi, manyilau tanah nan

manggadangkan.—–

Salimbak nan dari pado itu: karano tasuruah diagamo, tasabuik di dalam Ayat, apolah garan bunyi

Ayat: “Wa-in syakartum, la-aziidannakum”….Barang siapo nan pandai basyukur mako nikmatnyo

akan ditambah-tambah.- Dek sabab karano itu, kok iyo syarak mangato Adat mamakai, mako mintak

pulo dek kami siko : Supayo cupak tatagak kito isi, limbago samo kito tuang, dilansaikan utang ka-

agamo; ma-nyo ruponyo: Mintak dibacokan Do’a-Salamat sarato Do’a-Kasyukuran; kadari sinan

katumbuahnyo, kami disiko ma-aminkan, sakitu sambah pado Sutan…..

ALEK

Maa-nyo St. Bandaro ?.-

PANGKA

Manitah Sutan ….

ALEK

Sapanjang panitahan Sutan tadi nan tatumpu kapado ombo untuak mambacokan doa syukur doa

salamaik, itulah kato sabananyo.- kok syarak nyato lah manyuruah, adat wajib mambaiyakan.- Tapi

sungguahpun nan baitu, sapihak dibadan diri ambo kiniko, dikatokan manih alun dapek malulua

surang.- Lamak lauak kan dikunyah-kunyah, lamak-kato dipakatokan.—- Ba-a sabab dek baitu: Sasuai

bak undang Sutan juo; Dek gunuang tapatan kabuik, disungai jalo bamain, kapandang barantang tali,

kahutan bakarek-kayu; tabiang ditingkek dengan janji, rimbo dialah jo mupakaik, tagak dek duduak

dalam rapek, limbago basidang dalam adat.- Supayo rantak nak-nyo saragam, baiak lenggang nak

sahayun, suto jo turak nak salasai, nak samo naiak ka-antakan, dielah kato jo mupakaik, mananti

sutan agak sabanta…..

PANGKA

Asa kandak buliah pintak balaku, lambek sabanta ambo tunggu, Sutan…

ALEK

St. Bandaro ?…..

PANGKA

Sampaikan Sutan….

ALEK

Nak-nyo tarang nan bak hari, siang nan bak bulan, nak ambo titih sambah jo titah Sutan tadi….. Apo

garangan kabunyinyo, supaya cupak tatagak kito isi, limbago samo kito tuang, dilansaikan utang ka-

agamo…. Kan iyo baitu kajalehnyo Sutan???…..

PANGKA

Itu bana

ALEK

Ruponyo tantang mambacokan doa-ko, dek alek manjadi baban, dek pangka manjadi utang….

Adopun dari-ma katumbuahnyo, indak basibak jo basisiah, indak bainggo jo babateh.- Sabab baa-lah

dek baitu, tapek bak undang Sutan juo: Kurang tukang binaso kayu, kurang cadiak binaso adat,

kurang malin binaso kitab.- Ba-a kalaluannyo bana: Samo kito sarahkan ka-ahlinyo, kami nan indak

tau-pandai…. Sakitu sambah pado Sutan Bandaro.-

PANGKA

Sampai Sutan ?.-

ALEK

Sampai

PANGKA

Dek alek manjadi baban, dek pangka manjadi utang.- Kato bana nan Sutan sabuik, jalan luruih nan

Sutan tampuah.- Namun samantangpun baitu, kami-ko pihak nan bakandak, Sutan pihak nan

mambari…. Sakian sambah bakeh Sutan.-

ALEK

Jadilaah St. Bandaro ?.-

PANGKA

Yooooo…..

ALEK

Kok kabatulak-batundo baelo baunjun bana antaro kito baduo, nan utang kautang juo…. Supayo

golek nak tibo dinan data, insya Allah ka-ambo jalankan pintak jo pinto dari Sutan….Sungguahpun

katumbuahnyo dari ambo, tapi kok salaah basapo, sasek baulangkan, lupo bakanakan.-

PANGKA

Insya Allah Sutan ….. Asa-kan usah doa babisiak, kami simakkan dari siko.-

ALEK

Jadilah, kito mandoa basamo-samo: