PASAMBAHAN KA MAKAN 1

PANGKAMa-nyo St. Maruhun ?….

ALEKLai ….

PANGKASambah batibokan pado Sutan.-

ALEKManitahlah …..

PANGKAIyo kabakeh Sutan sambah sapatah.- Sungguahpun Sutan nan diimbau, dalam saariat jo hakikat, atau dizahir dengan batin, samo didalam ampun.—– Ampun jo maaf dipabanyak, suko jo rila dipalabiah, dek kato banyak nan salah, dek rundiang banyak nan sasek, namun kito basipat gawa, Allah nan basipat kadim, lai jo parundiangan Sutan dijalang.—-

ALEKYoooooolah …..

PANGKAMangko jo parundingan Sutan dijalang: Pihak dihari sahari nangko, antah hari koh nan baiak, antah kutiko koh nan elok, sadang wakatu bungo kambang, ajuang balaiya dimusimnyo, sauah tatagak angin tibo, kok jamulah datang babondong, sipokok mananti basamo janang, kami manatiang sangat suko, panawa sagalo runggo hati.—-Tumbuah sarupo iko kini, utang dek kami sipangkalan, iyolah silang nan bapangka, karajo nan bapokok, minum jo makan basadiokan… Jikok salorong tantang itu, nan bak pituah Sutan juo, adat limbago dalam alek, mamakai sirajo-janang.- Tasabuik sirajo janang, tau dihereng dengan gendeng, tau dicakah dengan kaik, mato nyalang talingo nyariang, manjago labiah dengan kurang…. Dek pandai janang manatiang, nan tau digarak dengan raso, lah tadanga piriang babunyi, iyo didalam padapuran.- Alah dicaliak alah dipandang, cukuik barisi cawan-pinggan.- Tagak badiri bujang jo janang,- tangan manatiang kuruang selo, – Takanak kupiah dikapalo, lakek sisampiang tanun Arab, bugih Makassar rang namokan.- Manatiang nasi dengan gulai, jawek-bajawek cando piriang, lego-balego cawan gulai, nan bak santano pajar tabantang.- Teko gadang mamacah ruang, cangkia ketek babilang tangan, heranlah mato mamandangi, umpamo ombak dilautan.—- Pihak kapado susunannyo, ditangah awan bajomba, ditapi samuik baririang, nago bahoyak kiri-kanan, barisi langkok-kasadonyo.—- Limbak nan dari pado itu: Aluran nasi nan katangah, jikok diinok dimanuangkan, asa mulo dahulunyo.- Paadi siranak rambun tulang, tumbuah dilereng kadataran, dijamua dek puti linduang Bulan.- Hari paneh jamua balingkuik, hari hujan jamua takaka, masiak nan bukan alang-alang, kariang dek singgah paneh patang.—- Lalu ditumbuak jamua kakincia, etan karanah Bungo Tanjuang, iyo kalurah Sungai Janiah.- Kalau dicaliak candonyo kincia, aiya gadang banda batumbuak, nan bak umpamo sianak roda, bapaliang tingkah batingkah, bunyi alu sawik-sawiktan, cando ditingah talempon jawo…. Jamua ditumbuah pantang basakam, diindang mangko baratah, ditampi mangko badadak, putiah bak putiah bijo limau.—- Takalo maso dahulunyo, sasuwok bareh dijalang, panuahlah kancah jo kuali.- Nan litak makan dahulu, salo-manyalo alek datang, namun nasi kausak tido ….

Urang Padang mahanyi banangDianyi lalu diparampekParampek lalu dipatigoKalau dirantang namuah panjangBia dikumpa nak-nyo singkekSingkek sakiro kapaguno…..

Naak ilia ka Batang HariNak mudiak ka Pauah KambaBabelok jalan ka Piaman

Minumlah aiya nan taisiSantok juadah nan katangah

Nak sanang hati sipangkalanSakian sambah pado Sutan…ALEKMa-nyo St. Sinaro?…..

PANGKAManitahlah ….

ALEKSambah taujuak pado Sutan.-

PANGKASampaikanlah.-

ALEKSutanlah juo ambo jalang…. Karano Sutan urang nan tinggi tampak jauah, dakok jolong basuo, tampek ambo manibokan-sambah.—- Apolah sambah nan kaditibokan:Nan sapanjang rundiangan Sutan tadi, nan talimpah kapado kami, muaronyo kaambo surang: Kalau ditareh disalisiak, jokok diindang dipaberai; dicaliak kaujuik paham, lah nyato titian budi, tarang dibatin kaarifan.—- Tapi samantangpun baitu : Ambua-sahambua kato tibo, langkah-salangkah kato sampai, allahualam pagantuangan.- Basulik bamain budi, nan rusuah kilauh kok tibo, senjang kababaliak ka-nan-bantuan-Naak jan basuo nan bak kian, elok dituruik barih adat, patuik diganggam kato bana, papatah Adat nan kawi: “Urang-tuo sabuah hukum, Panghulu saundang-undang, Ulama samo sakitab.- Nak-nyo satali sajinjiang, nak-nyo saikek sabarumbuang; satimbang laiya jo batin, saukua mangko manjadi, sasuai mangko takanak… Samantaro kami baiyo, sambah disimpan dalam barih, diwalakkan kato samantaro, mananti Sutan Sakutiko ….

PANGKAAmbo nanti jo suko hati, Satan, asa kan usah lamo bana.-

ALEKSt. Sinaro ?….

PANGKASampaikan Sutan….

ALEKSambah ambo ka Niniak Mamaak, nan pai tampek batanyo, pulang kabakeh babarito, langkok jo Alim jo Ulama, sarato urang cadiak-pandai, ujuang parsambahan ka St. Sinaro juo.

PANGKAManiathlah St. Maruhun….

ALEKSalorong jamba nan lah katangah; elok susunnyo nan bak siriah, elok atoknyo nan bak gambia, gamak sadang kacak tabao, tampan ado lelo tapakai, indak bacacek jo bacata, alah lah cukuik samparono…. Taniak hati nak mamuji, taragak nak manyanjuangnyo; tapi taraso-kalu lidah manyabuik, pacah makripaik dek tuahnyo, jo batin sajo disukuri.—- Adopun kamudian dari pada itu, apolah nan manjadi pintak jo pinto Sutan tadi, yaitu: Aiya taisi mintak diminum, nasi tahedang mintak dimakan, supayo diparenai dek kami sugalo alek, nan duduak saedaran tagak sapamatang… kan iyo baitu bunyi panitahan, Sutan ?.—-

PANGKAYooolah….

ALEKNdak doh laai, ba-a dek kami pihak sialek-jamu kiniko:

Pandai Sikek jo sungai buluahSalirik jalan nak ka PadangSadang babuek kami lai namuahKok kunun mamakan nan tahedang

Tapi samaantangpun baitu Stan: Ulah dek duduak bapamenan, ulah dek tagak baparintang, rintang jo baso sipangkalan; mako lah sajuak kami tak rago minum, lah kanyang tak rago makan…. Pulang partimbangan kapado Sutan?….

PANGKALah sampai dek St. Maruhun?.-

ALEKDibilang alah ….

PANGKASapanjang panitahan Sutan nan tarapak tadi, indak kadikilin ditikam jajak, ujuangnyo sajo ambo japuik: “Ulah dek duduak bapamenan, ulah dek tagak baparintang, rintang dek baso sipangkalan, mako lah sajuak kami tak rago minum, lah kanyang tak tago maakan”…. Kan iyo baitu tadi Sutan ?.-

ALEKSabananyo….

PANGKAApolah nan kamanjadi sawik-saponyo dek ambo kini :

Huujanlah hari parak siangTalambek ayam bakukuakMurai bakicau manjagokanMarentak padi rangkiangBacakak sanduak jo pariuakMandanga baso bapanjangkan

Batenggang Sutan tantang itu, sakian sajo sambah ambo.-

ALEKLah sampai St. Sinaro?.-

PANGKALah sampai ….

ALEKAmbo ulang kato sapatah, diambiak isi-tarehnyo: “Marentak padi dirangkiang, bacakak sanduak jo pariuak, mandanga baso bapanjangan”…. Iyo baitu tadi Sutan???.-

PANGKAYo bana …..

ALEKSutan tagamang kami tacameh, ba-itu tando rang sahati, alamaik tando badunsanak….Mako kiniko: Kok kilek kan iyo lah barapi-api, patuih lah badantam-dantam, gabak diulu lah manapi, kahujan juo moh-kironyo…. Ndak do-lai sutan : Kok iyo lai kahujan, nak diraoknyo kito sabalik, saralun riak jo galombang, samo makan alek jo pangka, alaah kasanang hati sutan.

PANGKASt. Maruhun?….

ALEKAmbo St. Sinaro….

PANGKASapanjang rundiang Sutan tadi : “Kok iyo lai kahujan, nak diraoknyo kito sabalik, saralun riak jo galombang, samo makan alek jo pangka”…. Ka baitu bana kajalehnyo Stan?

ALEKBana …..

PANGKAKok itu malah pintak Sutan, sapatah pulo kajaweknyo :

Ditabang batang kayu kalekJatuah batimpo katapianMaarok kadalam danauJamba ditatiang untuak alekPangka biaso takudianPatambuahan kakami silau, Sutan???….

ALEKLah sampai dek St. Sinaro

PANGKASakiro alah ….

ALEKAmbo piliah rundiangan Sutan, ambo ganggam ma-ana kato:“Jamba ditatiang untuak alek, pangka biaso takudian, patambuahan kakami silau”… Iyo baitu kasaiahnyo Sutan ?.-

PANGKAIyo baitu bana ….

ALEKRang Guguak pai kapakanMailia manajun labuahBakain basaruang batiakAlek makan pangka kaduduakBapikia kami kabatambuahKok baetongkan suwok turun-naiak, Stan ?.-

PANGKAYo maa-iyo St. Maruhun.-

ALEKSampaikan St. Sinaro

PANGKASalorong bunyi kato Sutan, ba-a lah bunyi nan tadanga :“Alek makan pangka kaduduak, bapikia kami kabatambuah, kok baetongkan suwok turun-naiak”…. Kan baitu tadi ?.-

ALEKIyo itu bana….

PANGKAKok baitu malah di Sutan, iyo pulo tu-mah kironyo…Kabajolak-bajolai bana antaro ambo jo Sutan, kasinan juo katibonyo… Baa nan kini :

Dibaruah aiya katiaganPimpiang sarumpun disubarangBasuah tangan isilah pingganKami mairiang dibulakang…..

ALEKA-nyo maa nyo St. Sinaro ?.-

PANGKALai….

ALEKKok kaambo ulang pulo agak sapatah: “Basuah tangan isilah pinggan, kami mairiang dibulakang”…. Iyo baitu taditu ?

PANGKAYooooo……

ALEKBiya dimuko-dibulakang, asahkan jalan sairiang, tujuan samo disampaikan.—- Limbak nan dari pado itu :

Taba bagabun cando asokUurang mamarun rantiang paloKok iyo nan harun kakami singkokTunjuakkan ikua-kapalonyo, Stan…..PANGKAMa-nyo St. Maruhun?-

ALEKSampaikan !.-

PANGKAAngku kapalo MandianginBasisik karih sabilahKapalonyo bismillahirahmanirahimIkuanyo Alhamdulillah…..

PASAMBAHAN SIRIAH

PANGKAIyo kabakeh Sutan juo sambah dipohonkan.-

ALEKManitahlah….

PANGKASungguahpun iyo kabakeh Sutan dipohonkan sambah jo panitahan, nak sarapeknyolah Angku Pangulu nan gadang basa-batuah, karapatan dunsanak jo sudaro, ipa dengan bisan, ahli nan saisi rumah-gadang nangko.—-Sakali ambo mandatangkan sambah, indak kadiatok dibilang gala, hanyo kapa-tok pambilang gala, jo ma’af sajo dimuliakan …. Sapihak sambah jo panitahan diparirikkan kahadapan silang nan bapangka karajo nan bapokok, ujuang panitahan kahadapan Sutan.-

ALEKYoooooolah ….

PANGKAAdat kato nan kadipasambahkan: Talatak putiang diulu, dibawah kumpalan tali, samulo kato nan

dahulu, tigo limbago nan tajadi.- Manolah tigo nan tajadi, partamu sambah manyambah, kaduo baso jo basi. Katigo siriah jo pinang.- Sambah manyambah dalam adat, tali batali undang-undang, tasabuik jo muluik manih, tapakai jo baso baiak. – Muluik manih calempong kato, baso baiak gulo dibibia, didalam cupak nan piawai, banamo adat sopan santun.—Adat dilawik bajuru-mudi, adat disabuang bajuaro, adat dialek barajo janang.- Kok dikaji tantang juru mudi, tau di angin nan basiru, tau diombak nan basabuang, tau dipasang turun naiak. – Kok dikaji tantang si-juaro, tau dituah sisiak ayam, tau dibulang nan bakicuah, pandai managah manampin taruah.- Kok dikaji tantang sirajo janang, tau diereng dengan gendeng, tau dicakak dengan baik, manjago labiah dengan kurang. —- Ba-a sakarang iko kini :

Ramo-ramo tabang malayangMalayok kakoto tangahBanyaknyo ampek puluah ampekEndah carano bukan kapalangTalatak ditangah tangahDilingkungan urang nan rapekBuruang sinurak buruang nuriSiculiak ateh pamatangSiriah galak pinang maanariMancaliak alek nan lah datang

Lorong kapado caranonyo, carano Banja Renoali, buatan tukan Kotogadang.- Nan rimbun bungo kalikih, nan ranggah bungo kacubuang, nan kungkun gagak kainggok, nan lantiak alang bamain.- Sataun dipanggang Bugih, samumsim dilingka Cino, usahkan ratak, rangehpun tido.—Pihak kapado songkok carano; dalamak urang namokan : Tanun banamo silang suto, baukia bubungo rampai, baturap jo banang ameh, balukih bak kaluak paku, ragi nan samo baliak –balah. – Baratuih camin dipinggia, batabua kaco ditangah, kileek kumilek cahanyonyo, sarupo bintang ateh langik, bintang kujarah bakuliliang.—-Pihak kapado sisiriahnyo, siriah udang tampa hari; tampuaknyobak buku balam, gagangnyo bagai suaso, buah diambiak katinaman, batang diambika katiruan, sataun dalam guluangan, usahkan masiak layua tido, malah batambah mudo juo, –konon pulo pinangnyo, pinang sierak-ero manih, tumbuahnyo dikida rumah, tingginyo panjek-panjekan, randahnyo jangkau-jangkauan, pucuak malepai awan putiah, sataun tupai dek mamanjek, jarang basuo jo buahnyo.—Salorong kapado digambianyo, gambia kuniang sarupo dadiah, buatan puti Sarilamak, manihnyo tingga dilidah, kaleknyo tingga dirankuangan, daun malayok kalautan, tibo dipulau batebaran. —- Kok kunun pulo disadahnyo, sadah putiah ambun bajano, dibasuah jo aiya bungo, dipati jo pati santan, dikipeh jo ambai-ambai. – Dipalik jo jari manih, bakisa kajari tunjuak, mambayang katapak tangan, sapalik sapuluah ameh, sakadam sakati limo. – Harago nan tidak taragoi, harago satimbang jo nagari, makanan anak rajo-rajo, pamenan bibia puti-puti. —- Pihak kapado timbakaunyo, timbakau aluih ambun bajelo, bijonyo datang dari Ruhum, pakirin dayang dilautan, diabo anak Sutan Bantan, diracik anak garagasi.- Saheto panjang jaluanyo, bajamua dibiliak dalam, bapantang masiak dek paneh, masiak dek ambun tangah malam.

Tanam siriah tanamlah udangTanam karakok dihalamanCabiak siriah gatoklah pinangGuuluanglah rokok pamenan tanganMudiakkan sawah dialaiHiliakan sawah tarukoKok banyak siriah dibalaiSado iko dalam carano

Ayam putiah tabang bataliDilurah mangko maraokBatalua dirumpun sariakAnaknyo turun salapanMakanlah siriah pinang kamiBapapatah mangko disingkokBaibarat mangko dicabiakSapahnyo bari bajunjuangan

Sakianlah sambah ditibokan, kahadapan Niniak dengan Mamak, sarato alek tangah rumah, alamat titah ka St. Parpatiah.—

ALEKAlah sampai dek St. Sinaro ?.-

PANGKADibilang alah ….

ALEKRuponyo sapanjang buah panitahan Sutan, nan tatabua kenan banyak, nan talayang katangah-tangah, tatumpah kapado ambo;Kalau didangalah baiak Bunyi, dipandang lah rancak rupo.- lah bunta sawah nan sapiriang, lah masak sando padinyo.-Tapi samantangpun baitu, dek padi bukan satangkai, dek pipik bukan saiku.- Dek padi bukan satangkai, masak indak sakali ambiak, dek pipik bukan saikua, tabang indak sakali inggok, apolah sabab dek baitu : karano kami lai baduo batigo dihadapan niniak jo mamak, sarato imam dengan khatib, cukuik jo alek nan banyaakko.- Mako ka-ambo cubo marantang panjang, untuang taserak jalo suto; kok untuang ikan nan kabuliah, kok indak am eh tantangannyo…. Sakironyo ambo bao bakato baiyo bajalan bamulah, laikoh adat nan baitu, laikoh pusako nan bak kian, nak bapambarian St. tantang itu….

PANGKALah banamo sampai dek St. Maruhun?.-

ALEKSakiro alah ….

PANGKATapi tantangan sambah-manyambah, randah nan dianjuang tinggi, ketek nan diamba gadang, jo maaf dimintak parundingan dikumbalikan kapado Sutan?…

ALEKManitah Sutan ….

PANGKARuponyo parundingan nan kadikumbalikan kabakeh Sutan; nan manjadi kabanaran dek sutan madok kabadan diri ambo: Dek karano kami lai baduo jo batigo, dihadapan ado Niniak Mamak, sarato alek nan banyakko, nank cubo mampaiyo-patidokan, ditantangan kato nan kamanjawab, ditantangan gayuang nan kamanyambuik, lai koh adat nan baitu, lai koh pasa nan bak kian, kan baitu kato Sutan tadi ???….

ALEKIyo bana….

PANGKAYo baitu biaso nan bapakai, alah digarih makan paek.-Dapek surang dibuleti, dapek baduo-batigo dipaiyokan.- Baa-tonyo lai kini, asa dapek surang dibuleti, dapek baduo batigo dipaiyokan, lah rancak bana nan baitu Sutan.-

ALEKSampai dek St. Sinaro ?.

PANGKASampai ….

ALEKDek ambo muluik sapatah itu bana nan ambo nanti Stan, rundiang sabuah-tu nan ambo tunggu.— Baa-

tu nyo lai : Uumpamolah gugua dari tampuak, umpamolah sakah dari dahan, Insya Allah ambo paiyokan, lai kasaba Sutan Mananti ?.-

PANGKAJo saba hati Sutan ….

ALEKNan parundiangan kito kini ?.-

PANGKADibateh ….

ST. MARUHUNImam Sinaro ?.-

Imam SinaroManitahlaah…

ST. MARUHUNDek awa kato nan sapatah, salam tajelo ka nan rapek, kato tatabua dinan banyak, jo parsambahan Mamak ambo jalang.- Ujuiknyo sambah nan tatimpo pada mamak, nyato tawalak di ukuran, tabayang barih dibalabeh, bana bak andai kato bida :

Dek curiang barih dahuluDiawa kato nan sapatahSambah tibo dialek jamuNan datang dari pihak sipangka.-

Ba-a tu nyo lai kini : Karano sasuai juo bak undang kato Mamak: Babiduak kan iyo banangkodoh, kok bajalan banantuo.- Mako taradok sambah jo titah dari sapangka kpd alek ambo tatiangkan kanan tuo, kato bajawab, gayuang manyambuik kadari Mamak tarabiknyo…. Sakitu sambah Mak ?…..

ALEKA-yo maa-nyo St.Sinaro ?…. Sambah tibo pado Su tan.-

PANGKAMani tahlah….

PANGKAJo kabanaran Sutan ambo jalang, tapi sungguahh jo kabanaran, rilaRila jo maaf dipohonkan. —- Adopun antaro ambo jo Sutan cako, panek nak jadi parantian, patang nak jadi pamalaman, iyo disatantang bakato baiyo, bamulah. —- ulunyo lah ambo mudiak-I, muaronyo lah ambo iliri, ditapak sapanjang alua. Tagah dek patuah kanan tuo sutan, nan tuo patuah ka Pangulu, ruponyo satantangan kato kabajawab, gayuang, kamanyambuik, tatumpah juo kadiri ambo.—-Tapi sawajah dari pado itu, saketek nan marusuah nan manggamang diambo kiniko sutan.- Kalao nan sa-andaknyo, kan iyo sabanyak tanyo sabanyak jawab, sabanyak gayuang sebanyak sambuik.- Baa tu nyo kini, kok indak taulang bak manyapuah ndak tabaliak bak mamanggang, kaba-a ko lah???-A-iko ambo pulangkan ka Sutan.-

PANGKALah banamo sampai dek St. Maruhun?.-

ALEKSakiro alah ….

PANGKARuponyo nan manjadi buah panitahan dek Sutan mahadok kaateh badan diri ambo, iyo malah jikok bak diateh andaknyo, diukuran nan sampai, dibilangan nan cukuik, iyo sabanyak gayuang sabanyak

sambuik, sabanyak kato sabanyak jawab.- Baa-tu-nyo kini, kok indak taulang bak manyapuah, kok indak tabaliak bak mamanggang, kabaa-kolah, kan baitu Sutan?

ALEKYooooolah ….

PANGKADiambo kaji nan marusuah nan manggamang, iyo kaji nan saganok itu; gauyuang kok indak disambuik, kato kok indak dijawab…. Baa satantang itu, asa kan kato lai kabajawab, kadisambuik, indak kadiuji samo merah, indak kadikati samo barek.- Panjang jo singkek pado Allah disarahkan.—

ALEKAlhamdulillah kajaweknyo Sutan… Ambo sangko taditu: Kok kabalari samo kancang, baramuak samo dalam.- Ndak doh lai : Diateh kami alek, sebagai tagak nan bapusu, duduak nan baropok, nak ambo baiyakan amanah nan bapagang, nak ambo lansaikan utang tapabuek….

Sairing balam jo barabahBalam tabang barabah mandiSairiang salam dengan sambahSalam datang sambah kumbaliKumbali juo kapado Sutan

Yoo, maa-nyo St, Sinaro???….

Anak ayam pandai baranangDapek kakinyo dek buayoDuduaklah Sutan jo batanangAmbo kamulai jo bicaro

Adopun satantang buah panitahan Sutan cako: Taserak nak ambo piliah, dipiliah lalu dikampuangkan; kok anyuik nak ambo sonsong, disonsong lalu kaulunyo, apolah jinih panitahan sutan tadi : “Dek carano alah katangah, sarek barisi kalangkapan, mako jokok maliyek diateh rupo, basiang di ateh tumbuah, tumbuah sarupo iko kini: Siriah sacabiak mintak dikunyah, pinang sagaiyang mintak digatok, dipipia gambia dipalik sadah, dek kami alek nan datang, kan iyo baitu bana kasaiyahnyo Sutan ??? …..

PANGKAYoooooolah….

ALEKTakilek camin diudaroJatuah kalawik batu karangHilang disemba ikan iyuDek bana sambah nan tiboLaiyanyo kapado ambo surangBatin kaado alek jamu

Kato warih kato bajawek, kato pusako kabatolong, manuruik papatah jo patitih, basuo pamenan adat :

Baatanun kulindan sutoSajalan ragi jo banangTimpo batim po salam tiboBatanun kulindan sutoSajalan ragi jo banangSuri dimano talataknyoLayang malayang sambah tiboTimpo-batimpo sambah datangTitah ka-ambo tahantaknyo

Kato tapegang dek Pangulu, rundiang tasimpan dinan rapek, awa jo akia kok sapakai, laiya jo batin kok sasuai.- Pihak jok kato kamanjawab, iyo jo gayuang kamanyambuik, tapek di ambo tarabiknyo.—–

Sungguah diambo tarabiknyo, nyato adat barati tumbuah, nyato pusako bainggiran,- Bacupak talago panuah, Bagantangan simahar jolelo, undang-undang maisi kandak.- Karano sabab nan baitu, kato iyo kato-baturuik, kato indak kato mati, kato antah kato tatagun, luwiakato umum kato suhabat kato mambunuah, usah basuo nan bak kian.- Mako digilinglah kato jo mupakaik, dikaka rundiang jo nan patuik, dapeklah kato sabulek, nan buleknyo indak bapasagi, kini lah buliah digolongkan.- kok picaknyo indak basuduik, picaklah dapek dilayangkan.—-Tibo kami dipabasokan, basapu laman nan sabidang, takuwak pintu bakeh lalu, tabantang lapiak paradani; talatak siriah dicarano, tando alamat putiah hati… Sananglah bana dalam hati Sutan: Baa-lah bana sanang hati, dek malin indak tabacokan, dek tukang alun talukihkan, Allah lah sajo nan ka-tau.—- Nak bak sakarang iko kini : Pihak dek kami alek Sutan, alah lah saujo lah salapeh, satanai salatakkan, salalah sakaja untuak manarimo siriah Sutan…. Tapi samantangpun baitu Sutan : Adopun masak siriah-ko 3 parakaro: Partamu masak digagang, kaduo masak dimakan, katigo masak jo mupakaik…. Nan dikatokan masak digagang: Rononya kuniang mangarisiak, tampuak layua daunlah kucuik, dek ulek indak talamakkan, dek samuik haram manjalari.- Nyampang gugua menjalang tanah, jan dicito kajunjuang lai, tampan kajadi sorak sajo, dalea nan sakah siriah masak.— Tasabuik masak dimakan: Sadang tangkai lai bagatah, maso daun lai baminyak, gilo dikijo pinang mudo, dirayu sadah jo gambia, bararak lalu kacarano.- Diupam manjadi satu, dikunyah bamerah bibia, kaleknyo ditingga dirakuangan, sarinyo naiak kaparoman.-Kok dikatokan masak jo mupakaik: Alun dicaliak lah tapandang, lah jaleh bangun rawiknyo.- Alun dikicok lah taraso, la nyato lamak manihnyo:—-St, Sinaro???.-

PANGKATaruihkan Sutan….

ALEKSalorong siriah Suriah nan katangah, nyato bukan masak di-gagang…. Tapi indak pulo kadimasakkan bamerah bibia.—- Izin jo rila dari sutan, siriah kamasak jo mupakaik:

Alun bakililleklah bakalamBulan lah sangkap tigo puluahAlun diliyeklah dimakanRaso lah tibo dalam tubuah

Sakian sambah dipuhunkan

PANGKALah sampai dek Sutan Maruhun?….

ALEKSampai …..

PANGKASapanjang parundiangan Sutan tadi, kok siriah kami alah batarimo, ditarimo bukan dimakan, dimaakan sajo jo mupakaik : “Alun diliyek lah bamakan, raso lah tibo dalam tubua”…. Kan iyo baitu tadi sutan ???.-

ALEKSabananyo…..

PANGKAUrek sinyali-nyali ratehPucuak suruan mudo-mudoDilangik Sutan lalu-lintehAmbo dibaliak itu pulo

Alhamdulillah, kok kandak iyo-lah buliah, namun pitak indak balaku.- Sanang lai saleso tido, tatungkai indak tarabahkan, lah rabah indak tadabiah…. Walau samantangpun nan bak itu, biya panuahnyo panuah kabawah, ambo lapehkan Sutan dari utang.— Hanyo kaganti pamujuak-mujuak tangih, tagamang kok raso kabajawek, tolong tarimo tanyo kami:

ALEKSutan Sinaro ?….

PANGKALalu Sutan

ALEKAhamdulillah pado Allah, puji jo sanjuang pado Sutan.- dek maaf gadang paidah, dek rila gadang munpaat, lapehlah kami dari utang, siriahlah masak jo mupakaik.-Adopun kamudian dari pado itu, lah tibo pulo sudi jo siasek sarato tanyo jo da-awa dari Sutan, apolah jinih bunyinyo:Kok siriah dimakan jo mupakaik, sapahnyoKama Sutan buang, Aiyanyo kama diludahkan,Kan iyo baitu kasaiyahnyo Sutan ???…PANGKAYoooolah….

ALEKPanggia bakandak turuik, Sutan;kok imbau bakandak jalang, tanyo tantu bakandak jawab…. Kajawabnyo pulo dari ambo:

Anam koto babalai akaikUrang manjua cawan pingganLangang kutiko hari hujanSiriah dimakan jo mupakaikSapah dibuang jo rundianganAiyanyo ditampuang karilahanSakian jawab dari ambo.-

PANGKABa-a satantang siriah-manyiriah, lah patuik kito tuhuakan?

ALEKKito tuhuakan sampai siko.-

Maanta   Marapulai ALEK

Angku Dt. Sinaro Nan Gamuak ?….

DT. Sinaro Nan Gamuak

Sampaikanlah Sutan !….

ALEK

Tangan ba-angkek jari basusun, rila jo maaf dipuhunkan pado Angku ….

DT. Sinaro Nan Gamuak

Kapado Allah ….

ALEK

Mak St. Sari Alam ? …..

ST. Sari Alam

Manitahlah !…..

ALEK

Salam batibokan pado Mamak ….

St. Sari Alam

Wa-alikum salaaam…..

ALEK

Maa-nyo St. Sinaro?…..

PANGKA

Sabuiklah ….

ALEK

Kasampurnaan sambah….. Walaupun kinitu Angku surang, baduo jo batigo sajo nan taimbaukan gala talewakan

tuah; nan ba-angkekkan tangan basusunkan jari ba-aturkan rila dengan maaf … Akan tetapi, kamanolah ujuik-

mungkasuiknyo, iyo kapado silang nan bapangka pakarajaan nan bapokok; ditampek hujan barasah paneh bapuhun,

urang nan manjinjiang tampuak-karajo diateh Rumah Gadang nangko.—-

Saluak ado detapun banyak

Babaju suto nak-rang Padang

Disasah dimalah diampaikan

Dilangkan nangkolah juo….

Datuak ado Sutanpun banyak

Ragulah mato dek mamandang

Sambah dimano disampaikan

Iyo di Sutan nangkolah juo

A-yo maa nyo St. Sinaro?…….

PANGKA : Yooolah

ALEK

Jokok diagak dikanang-kanang.- Ditimbang sahabih patuik, manakua ambo kabumi, maningadah ambo kalangik.—-

Dek kito majilih-karapatan kini nangko, lah ampek  ko-mah Adat nan bapakai.- Manolah 4 nan bapakai : Partamu

sambah-manyambah, kaduo baso jo basi, katigo siriah jo pinang, cukuik kaampek minum-makan.—-

Satantang minum jo makan, iyolah bana kato urang: Elok lenggang dihari paneh, maradeso diparuik kanyang, sinan

tabukak kiro-kiro… kok makan lah tibo dinan sadang, kok minum lah tibo dinan sajuak.- kini, aiya baransua

Jadi darah, nasi barensuik jadi dagiang, syukur nikmat pado Allah, puji di Sutan tatonggoknyo.—-

Sasuai bak undnag Sutan juo, baa-lah bunyi Undangnyo :

“Kok batanyo kan iyo salapeh urak, kok barundiang sasudah makan”.—- Mako, kinilah basuonyo mungkin jo patuik,

maso jo kutiko ambo kamatangahkan parundiangan kabakeh silang nan bapangka.- Tembak ba-alamat cancang

balandaskan, ka St. Bandaro juo muaronyo….

PANGKA

Yooolah….

ALEK

Apolah nan kamanjadi buah parundiangan ambo : cancang kan duo sagaragai Stan, kapa nan duo salabuahan.- Kok

Adat alah tabatu-intan, kabawahnyo takasiak bulan. – Syarak alah taujudulah, katehnyo taambun-jantan…. Saukua

hukum sasuai, sadundun Adat jo Agamo, Adat kawi syaraklah lazim, undang manuruik dibulakang.—-

Kini bakabek jo akad-nikah, babuhua-mati ijab kabul, babuhua-sintak jo bagian, katangga raso tak mungkin, antah

kok Allah manggarakkan.—–

Mako tasalanggarolah nikah-kawin antaro si Herman bin Mukhtar St. Maruhun, Suku Sikumbang dibawah payuang

Datuak Palindih; dengan Murniati binti Abdul Wahab kamanakan Sutan Parmato, suku Jambak dikalupak Dt. Rajo

Ameh.—-

Satantang dek diri marapulai; karano biaso pulai bapangkek naiak maninggikan ruweh jo buku, manusia bapangkek

turun maninggakan adat jo pusako; maso keteknyo dibari Bapak namo, lah gadang diagiah mamak gala, kini bagala :

Sutan Kulipah… Tolong maimbaukan dipasa nan rami, malewakan dilabuah nan golong.—-

Maliyek luruih batujuan, mamandang adat bajukalo; kok luruih makanan tiliak, ballabeh manahan cubo, bantuak

dimakan siku-siku; bungka ganok manahan asah, hukum adia manahan bandiang, kato bana manahan liyek,

banamo japuik jo anta, basambia ara jo iriang…. Arak-iriang sapanjang jalan, dombak dombai sapanjang labuah,

aguang calemong jadi tapuang, sorak jo sorai jadi bungo.- Salatuih badia-pusako, pusako Pangulu dinagari, masuak

kakorong kampuang Sutan…. Masuuak kakorong-kampuang Sutan, kinilah duduak ateh rumah, duduak diruang

Rumah Gadang, dilingkungan niniak jo mamaak, dimuko Ibu jo Bapo, sarato ipa denga bisan, cukuik-sarato mudo

matah.—-

Adopun kamudian dari pado itu, sapihak dek kamiko nan datang; ado mamacik pitaruah jo amanah, alah tasuruah

tasarayo, dek mamak sabalah sinan; untuak mahanta-mairiangkan St. Kalipah, naik ka-ateh rumah-tanggonyo; ko-

mah lah tibo kami siko Stan, tibo sarato jo Adatnyo.- Mahanta sampai kateh rumah, baulua-jawek amo jo Sutan,

batumpu-tapak samo Mamak.—–

Jokok diliyek simarapulai, dicaliak anak-daronyo; nan bak parmato jo pangarang, bak cincin pulaang kajari.- Surang

ikan surang kulari, samo tapukek kaduonyo, surang bulan surang mantari, samo caredek kaduonyo.—– Pandang-

pandang malah dek Sutan, dalea dikasua kabasaran, dilingkuang andam baliak-balah, langkok sarato pangiriangnyo,

niniak mamak samo di dalam.- Mamakai baju balah-buluah, siba batanti timba baliak, langan bakatak banang-

makauh, salo manyalo banang ameh.- Bacawek bajambua-suto, bapandiang mangko bapilin, takanak sakin-

pangidam.- Lakek sarawa kipeh-duanggo, baturap duo ditangah , elo maelo pisak turang, sajangka pucuak

rabuangnyo.—- Silaulah pulo anak-daro; Nan bak padi siranik-jintan, paneh tibo dilingkuik-lingkuik, hujan datang

dikaka-kaka, sauleh haram kok diayam, lah tandeh mangkodigaro.- disegehilah sianak-daro, dilakekkan baju suto

baralun, nan baukia bagajah-meno, salendang kain kapunuik, abuaknyo katua-barkatua.- Badapak subang dipipih,

abuaknyo katua-barkatua.- Badapak subang dipipih badariang galang ditangan, buatan tukang jolong pandai, kilek-

kumilek cahayonyo.—–

Salimbak nan dari pado itu: Dimaso sakarang iko kini, dimalam samalam nangko; nak kami latakanlah baban nan

baju-juang, dibaiyakan utang tapabuek; disampaikan pasan nan babaok, padolah badan disesonyo.—- Yaitu: Adok

kadiri Tan Kalipah: Nyampang kok tumbuah tangah rumah, kajadi Adat bijo-baiak, katungkek pamani jalan, kakarih

pamaga Adat, dalam adat baradat pulo …. Kok elok ratak tangannyo, baolah manukuak jo manambah, bao manyisik

jo mambilai, — Kok elok ratak lidahnyo: Kusuik baolah manyalasai, karuah baolah manjaniahi.- Kamudiak nak

sarantak galah, kailia nak sarangkuah dayuang, bajalan samo mairiang, baiyua samo maisi.—- Apun baa-to hanyo

lai, salampih nan dari pado itu, ko-mah jinihnyo marapulai Stan: Raso manetek niro pinang, nan bak alu patah patigo,

musim pabilo kabataruak.- Nyato ibaraik padi salibu: Awak tumbuah musiim talampau, urek bagantuang kajarami,

rangkiang tinggi nan dihadang… Mohon ditarimo dek mamak urang disiko, iyo didalam tapak-tangan, diganggam

adat jo Pusako.—- Putiah kapeeh nak mancaliak Stan, putiah hati bakaadaan, kaadaannyo: Kato bajawab gayuang

basambuik sambah bakumbalikan sakito sambah pado Sutan…..

PANGKA

Lah sampai dek Sutan ? …..

ALEK

Sakiro-kiro

PANGKA

Salorong dibadan ambo kini, nan bak ibaraik urang mamanciang: Sadang dirintang aiya-ilia, dalam dimabuak dek

galombang, iyo dialun-alun buiah; tali tagang piapuang ilang kaiya disemba dek gurami…. Duduak takajuik tukang

panciang, kaiya putuih bananglah kusuik.- Kini, manjalang banang kagumpalan, kato dilatak dalam barih, bana

disimpan kalimbago, diganjua rundiang jo mupakaik, mananti Sutan Sakutiko?….

ALEK

Asahkan kandak lai kabuliah, pintak kok lai kabalaku, ia lamo jo lambek kami nanti, Stan….

PANGKA

St. Paarpatiah??…. Sambah bapulangkan.-

ALEK

Manitah Sutan.-

PANGKA

Laiya jo batin saukuran, isi kulik umpamo labiah, ganggam arek pagangan taguah, tibolah lukih dilimbago.- Digiliang

kato dipabuek, dapeklah run diang nan sabuah, diantakan kabakeh Sutan…. Apolaah nan kamanjadi buah antanyo,

iyolah dihari sahari nangko, dimalam samalam kini :

Jokok disulam disuji-suji

Bakilin sangkuik kain banta

Jokok dikanang dikaji kaji

Disabuik asa jo muasa

Takalo maso dahulunyo, kutiko alun barabalun, bunga alun bijopun alun, niat tasimpan dalam hati, iyo dihati ibu jo

Bapo…

Nan jadi niat jo nasa dek balliau; dimintak sungguah pado Allah, mamuhun pado illahi, kironyo dapeklah anak

katurunan, diwarih nan kamanjawek, pusako nan kabatolong…..

Kok buliah anak laki-laki, ibaraik cincin dikalingking; kapanjapuik dagang nan jauah, kapanyonsong panggilan tibo,

pambangkik batang tarandam, palawan onjak dunia urang.- Kok buliah anak parampuan, kaibarat bungo dilaman;

limpapeh rumah nan gadang, sumarak anjuang paranginan, acang-acang dalam nagari.—- Mako tiboleh maso

kutikonyo, nan bak bida-bida urang kini, bak andai-andai rang dahulu;

Ditabang batang talantak

Dikuduang sambilan jari

Barakaik do’a jo pamintak

Masonyo Allah kamambari

Baruliahlah anak parampuan, sari laiya sari banamo, banamo si Murniati.- Lalu diinang jo diasuah, dijunjuang

bagaimangkuto, ditanai gumalo, pamenan pagi jo patang…..

Dibalikan subang jo galang

Baganto ameh balampih

Dari ketek kinilah gadang

Sampai manjadi anak gadih

Lalu ditunjuak diajari, dididik adat sopan-santun, sacaro urang basuami… Umua cukuik bilangan sudah, kini baumua

17, siriahlah patuik naiak junjuang.- Mako tabiklah niat jo nasa, handak maminang jo mangacak, mancarikan judu

tunangannyo… Dipikia-pikia dalam hati, dipikia lalu dimanuangkan.- Pandangan jauah dilayangkan, pandangan

dakok ditukiakan, nampaklah urang nan sapadan.- Pandang lakek patuiklah sudah, jatuah piliahan ka-nan surang, si

Herman urang namokan, kini bagala St. Kalipah.- Urang ba-asa balimbago, baso baiak roman katuju, muluik manih

paramah pulo.- dek harok dinan kabuliah, dek cameh dinan kaindak, mako ditingkeklah janjang rang sikumbang,

ditapiak malah banduanyo.- Mamintak kapado nan kabuliah, bakaua kapado nan kiramaik; makonyo Allah

manggarakkan, batamu ruweh jo buku, saukua batang kajunjuangan, pintak buliah kandak balaku, disinan niaik

dilansuangkan.—- Sapakaik sugalo mamak, sasuai pulo jo bako, saizin Datuak Panghulu; dihadirkan sapiah-balahan,

dihimpun korong jo kampuang.- Nan jauah dilapeh panggia, nan hampia makanan imbau, lalu dijapuiklah

simarapulai, japuik sarat jo adaiknyo.—-Alah basuluah mato hari, bagalanggang mato rang banyak, kok alek lah

sapanuah rummah, kok jamu lah salingkuang kampuang.- Sananglah hati Niniak Mamak, panuahlah runggo hati

bundo, mangucap syukur Ibu Bapo, dek utang alah talansaikan.—- Maa-nyo St. Parpatiah ???…..

ALEK

Sampaikan Stan !….

PANGKA

Adopun pintak jo pinto Sutan cako: Iyolah mohon ditarimo marapulai, ditarimo ditapak-tangan diganggam Adat jo

Pusako, kan iyo Baitu panitahan Sutan?…..

ALEK

Yo bana….

PANGKA

Syukur kapado Allah….. Dek pihak kami sipangka, sukolah bana manarimo; batampuang jo tapak-tangan,

diganggam jari nan sapuluah; kok ndak cukuik jo tapak tangan, bumi jo langik ditadahkan….

ALEK

Alhamdulillah …..

PANGKA

Salorong kapado anak-daro, ibaraik rabuang jolong mambacuik ba-umua bilangan hari, gadang disiram ambun-

malam, batang gampa sambilu indak.- Urek alun mancakam tanah, pucuak alun mandapek angin, antah pabilo

kabasaga…. Tapi, untuang kok elok pamintonyo, dek masin lidah Tan Kalipah, dek dingin tangan suaminya, talakik

rabuang jadi batuang.- Nyo baurek-bagumpa gadang, nyo babatang baruweh-ruweh, badaun rimbun jo rampak.-

Tabiang diagak jan-nyo runtuah, lurah mamuji kalinduangan.- Samantang tinggi diawan, pucuaknyo runduak kabumi,

manyilau tanah nan manggadangkan.—–

Salimbak nan dari pado itu: karano tasuruah diagamo, tasabuik di dalam Ayat, apolah garan bunyi Ayat: “Wa-in

syakartum, la-aziidannakum”….Barang siapo nan pandai basyukur mako nikmatnyo akan ditambah-tambah.- Dek

sabab karano itu, kok iyo syarak mangato Adat mamakai, mako mintak pulo dek kami siko : Supayo cupak tatagak

kito isi, limbago samo kito tuang, dilansaikan utang ka-agamo; ma-nyo ruponyo: Mintak dibacokan Do’a-Salamat

sarato Do’a-Kasyukuran; kadari sinan katumbuahnyo, kami disiko ma-aminkan, sakitu sambah pado Sutan…..

ALEK

Maa-nyo St. Bandaro ?.-

PANGKA

Manitah Sutan ….

ALEK

Sapanjang panitahan Sutan tadi nan tatumpu kapado ombo untuak mambacokan doa syukur doa salamaik, itulah

kato sabananyo.- kok syarak nyato lah manyuruah, adat wajib mambaiyakan.- Tapi sungguahpun nan baitu, sapihak

dibadan diri ambo kiniko, dikatokan manih alun dapek malulua surang.- Lamak lauak kan dikunyah-kunyah, lamak-

kato dipakatokan.—- Ba-a sabab dek baitu: Sasuai bak undang Sutan juo; Dek gunuang tapatan kabuik, disungai jalo

bamain, kapandang barantang tali, kahutan bakarek-kayu; tabiang ditingkek dengan janji, rimbo dialah jo mupakaik,

tagak dek duduak dalam rapek, limbago basidang dalam adat.- Supayo rantak nak-nyo saragam, baiak lenggang nak

sahayun, suto jo turak nak salasai, nak samo naiak ka-antakan, dielah kato jo mupakaik, mananti sutan agak

sabanta…..

PANGKA

Asa kandak buliah pintak balaku, lambek sabanta ambo tunggu, Sutan…

ALEK

St. Bandaro ?…..

PANGKA

Sampaikan Sutan….

ALEK

Nak-nyo tarang nan bak hari, siang nan bak bulan, nak ambo titih sambah jo titah Sutan tadi….. Apo garangan

kabunyinyo, supaya cupak tatagak kito isi, limbago samo kito tuang, dilansaikan utang ka-agamo…. Kan iyo baitu

kajalehnyo Sutan???…..

PANGKA

Itu bana

ALEK

Ruponyo tantang mambacokan doa-ko, dek alek manjadi baban, dek pangka manjadi utang…. Adopun dari-ma

katumbuahnyo, indak basibak jo basisiah, indak bainggo jo babateh.- Sabab baa-lah dek baitu, tapek bak undang

Sutan juo: Kurang tukang binaso kayu, kurang cadiak binaso adat, kurang malin binaso kitab.- Ba-a kalaluannyo

bana: Samo kito sarahkan ka-ahlinyo, kami nan indak tau-pandai…. Sakitu sambah pado Sutan Bandaro.-

PANGKA

Sampai Sutan ?.-

ALEK

Sampai

PANGKA

Dek alek manjadi baban, dek pangka manjadi utang.- Kato bana nan Sutan sabuik, jalan luruih nan Sutan tampuah.-

Namun samantangpun baitu, kami-ko pihak nan bakandak, Sutan pihak nan mambari…. Sakian sambah bakeh

Sutan.-

ALEK

Jadilaah St. Bandaro ?.-

PANGKA

Yooooo…..

ALEK

Kok kabatulak-batundo baelo baunjun bana antaro kito baduo, nan utang kautang juo…. Supayo golek nak tibo dinan

data, insya Allah ka-ambo jalankan pintak jo pinto dari Sutan….Sungguahpun katumbuahnyo dari ambo, tapi kok

salaah basapo, sasek baulangkan, lupo bakanakan.-

PANGKA

Insya Allah Sutan ….. Asa-kan usah doa babisiak, kami simakkan dari siko.-

ALEK

Jadilah, kito mandoa basamo-samo:

PASAMBAHAN KA MAKAN 2Naro !

Ambo Tuan Malin

Barundiiang sapatah Naro

Rancak Tuan

Sungguahpun ka Naro tibonyo nak sarapeknyolah Rang Gaek salingka duduak sarato Dunsanak bakarapatan,

Sambah manyambah kito pulangkan kapado Allah, salawat kapado Nabi lai nan kato sajo kito pakatokan.

Apo nan kamanjadi buah kato kinitu, maagak dihari nan kapatang tibonyo di Silang Nan Bapangka Karajo nan

Bapokok Manaruah niek jo nasa, apolah nan kamanjadi niek jonasa tantu kok siriahnyo bacabiak pinangnyo bagatok,

kulansiang lapeh padah talayang kabakeh Urang Gaek sarato dunsanak, baa dek Rang Gaek jo Dunsanak dihari

nan sahari nagko kok janji batapati kara bamuliakan, tumah labuah nan panjang lah baturuik, halaman nan laweh lah

bapijak, janjang takanak lah batingkek, bandua tarantang lah batapiak, kini lah hadir tangah rumah. Kok duduak lah

saangek lapiak, maisok lah sapadam baro, mangunyah lah sakariang sapah. Pun baanyo kinilai, lai dijoaro sipangka

nan lah bacapek kaki baringan tangan nan pandai maatak maatunkan maagak maagiahkan kok bilangannyo cukuik

susunan sampai, juadah nan diatap di kumbuak nan tabatua kok ai taganang nak bailiakan kapa tatumbuak

bakelokkan karano rumah baujuang bapangka duduak nak baiyo tagak nak baramuah jo Naro

Sampai Tuan

Sampai

Maanyo Tuan

Ambo Naro

Sabalun kato bajawab gayuang basambuik baiyo sapatah dulu Tuan.

Rancak Naro

Tuan Malin !

Ambo Naro

Dikumbalikan Pasambahan Kabakeh Tuan Malin

Kumbalikanlah Naro

Sungguahpun ka Tuan kumbalinyo Nak sarapeknyolah Rang Gaek salingka duduak sarato dunsanak bakarapatan,

dibaliak-baliak bak mamanggang di ulang-ulang bak manyapuah lai nan kato Tuan Juo nan kadiamba Gadang

dianjuang tinggi apo nan kato Tuan cako tantu Sambah manyambah kito pulangkan kapado Allah, salawat kapado

Nabi lai nan kato sajo kito pakatokan.

Apo nan kamanjadi buah kato kinitu, maagak dihari nan kapatang tibonyo di Silang Nan Bapangka Karajo nan

Bapokok Manaruah niek jo nasa, apolah nan kamanjadi niek jonasa tantu kok siriahnyo bacabiak pinangnyo bagatok,

kulansiang lapeh padah talayang kabakeh Urang Gaek sarato dunsanak, baa dek Rang Gaek jo Dunsanak dihari

nan sahari nagko kok janji batapati kara bamuliakan, tumah labuah nan panjang lah baturuik, halaman nan laweh lah

bapijak, janjang takanak lah batingkek, banduatarantang lah batapiak, kini lah hadir tangah rumah. Kok duduak lah

saangek lapiak, maisok lah dsapadam baro, mangunyah lah sakariang sapah. Pun baanyo kinilai lai lai dijoaro

sipangka nan lah bacapek kaki baringan tangan nan pandai maatak maatunkan maagak maagiahkan kok

bilangannyo cukuik susunan sampai, juadah nan diatap di kumbuak nan tabatua kok ai taganang nak bailiakan kapa

tatumbuak bakelokkan karano rumah baujuang bapangka duduak nak baiyo tagak nak baramuah jo Naro kan baitu

banatu Tuan

Io sabana baitu Naro

Tuan Malin

Ambo Naro

Dek kito nan baadok batunggalan bana sasuai paham saukua tapi samantangpun baitu lamak siriah lego carano

lamak kato balega bunyi nan bana kato baiyo nan rajo kato mupakat, dek karano rang gaek lai samo diadok ambo

bao kato Tuan tu jo mupakat Tuan mananti baanyo kolah.

Sampai Naro

Sampai Tuan

Samulo Kato kadianta kabakeh Naro io bana, kailia nak sarangkuah dayuang ka mudiak nak satumpu galah kato io

nak tabao jo mupakat bana tu Naro.

Ambo kamambao kato jo Mupakat Tuan mananti lai kasaba ?

Sakiro kiro Naro

Nan kito baa Tuan

Baranti Naro

MAMBAO BAIYO

Lenggang !

Ambo Tuan Naro

Barudiang jo Lenggang sapatah

Rancak Tuan Naro

Sungguahpun ka Lenggang tibonyo nak sarapeknyolah Rang Gaek salingka duduak sarato Dunsanak bakarapatan,

Sambah manyambah kito pulangkan kapado Allah, salawat kapado Nabi lai nan kato sajo kito pakatokan.

Apo an kamanjadi buah kato ka Lenggang kinitu satantangan di bisiak nan kadangaran imbau nan kalampauan

maagak nan ka buah barino iko nan kadijapuikkan ka Lenggang kiniko.

Sampai Naro

Sampai Lenggang

Sabalun kato ba jawab gayuang batangkih baiyo sapatah Naro

Rancak

Tuan Naro

Ambo Lenggang

Dikumbalikan Parundiangan ka Tuan Lenggang

Rancak

Sungguapun Katuan Lenggang tibono nak arapeknyolah Rang Gaek salingka Duduak sarato Dunsanak karapatan,

dibaliak-baliak bak mamanggang diulang ulang bak manyapuah nan diTuan juo nan ka diamba gadang danjuang

tinggi, apo nan kato Tuan cako tantu sambah manyabah dipulangkan kapado Allah , salawat kapado Nabi lai nan

kato sajo kito pakatokan, apolah nan kamanjadi buah kato di Naro tu kini satantangan di Imbau nan kalampaan bisiak

nan kadangaran maagak nan ka buah barinyo bajapuikkan ka Lenggang kan baitu bana Naro

Io sabana baitu Lenggang

Naro

Ambo Lenggang

Dek kito nan baadok batunggalan bana sasuai paham saukua tapi samantangpun baitu lamak siriah lego carano

lamak kato balega bunyi nan bana kato baiyo nan rajo kato mupakat, dek karano rang gaek lai samo diadok ambo

bao kato Tuan tu jo mupakat Tuan mananti baanyo kolah.

Samulo Kato kadianta kabakeh Lenggang io bana kailia nak sarangkuah dayuan kamudiak nak satumpu galah, kato

io nak tabao jo mupakat bana tu Lenggang.

Ambo mambao kato jo mupakat Naro mananti lai kasaba

Sakiro-kiro lenggang

Nan kito Naro

Baranti

Naro

Ambo Lenggang

Dihari nan cako Naro ambo sabakan manuruik Adat manauang manuruik Undang samantaro ambo manjapuikkan

nan ka bua barinyo ka Urang Gaek salingka Duduak sarato Dunsanak, baa dek Urang Gaek sarato dunsanak

karapatan ndak sasak bintang di langik ndak gambuang lukah di aia tumah tiok kandak tiok buliah tiok pintak tiok

balaku, lah ado nan kabuah barinyo dek baliau, dek baliau baanta ka Ambo dek Ambo kabaanta ka bakeh Naro Alah

koh rancak dianta Naro ?

Nan dijapuik Lenggang

Apolah nan kaantanyo kinitu satantangan di Aia taganang nak bailiakan biduak tatumbuak nak bakelokkan,

bapambarianlah Naro disinan nan kami disiko tinggi maanjuang gadang maamba, itulah nan kabuah barinotu Naro

Sampai lenggang

Sampai Naro

Dihari nan Cako ambo Lenggang sabakan manuruik adat manaung manuruik Undang samantaro Lenggang

manjapuikkan aia nan janiah sayak nan landai kaakeh Rang Gaek salingka duduak sarato Dunsanak , tumah lah

dapek nan kabuah barinyo dek baliau, dek baliau baana ka Lenggang, dek Lenggang baanta kabekeh ambo, alah

nan kaantanyo kinitu satantangan, aia taganang nak bailiakan, biduak tatumbuak nak bakelokkan, bapambarianlah

Naro disinan nan kami disiko tinggi maanjuang gadang maamba , kan baitu banatu Le3nggang ?

Io sabana baitu Naro

Lenggang ?

Ambo Naro

Dek karono panehko bapuhun ujanko barasa disagoan roan ka ureknyo kato ke nan tabik baako baitu Lenggang ?

Nak tampak pasa bakeh bamalam, bateh tampek baranti, rantiang tampek enggok, pulau tampek banang, iolah

rancak rotan disagokan kaureknyo kato ke nan tabik Naro

Nan kito Lenggang

Baranti Naro

Tuan Malin

Ambo Naro

Dikumbalikan Pasambahan kabakeh Tuan Malin

Rancak Naro

Dihari nan cako Tuan Ambo sabakan manuruik adat manaung manuruik undang samantaro ambu mancarikan aia

nan janiah sayak nan landai kabakeh rang gaek sarato dunsanak , ruponyo dak gambuang lukah diaia ndak sasak

bintang di langik tiok kandak tiok bulaku tiok pintak tiok buliah pucuak dicinto ulam tibo sumua dikali aia tabik tumah

lah ado nan kabuah barinyo di balau, di baliau baanta kaambo di ambo kabaanta ka Tuan, alahko rancak diaata

Tuan ?

Rancak Naro

Apolah nan kaantanyo kinitu tantangan aia taganang nak bailiakan biduak tatumbuak nak bakelokkan , rasonyo

kandak lai kabuliah pintak lai kabalaku , lah taracak dikudo lah tatampuah di jalan , titiak ujan di langik bumi lah suko

manarimo , ikolah nan kaantanyo Tuan ?

Sampai Naro

Sampai Tuan

Dek karano pintak lah buliah kandak labalaku alah sanang rasonyo ati Naro

Jo Bismikllah sajo kito muloi Tuan

Nan kito baa Naro

Baranti Tuan

PASAMBAHAN MAMINANG

Sutan Batuah

Ambo Sutan Kayo

Dimuliakan Tuah jo Pasambahan

Rancak

Sungguahpun ka Tuah tibonyo nak sarapeknyolah Rang Gaek salingka duduak sarato Dunsanak bakarapatan,Sambah manyambah kito pulangkan kapado Allah, salawat kapado Nabi lai nan kato sajo kito pakatokan.Apo nan kamanjadi buah kato kinitu, maagak dihari nan dahulu batamu di labuah nan golong di pasa nan rami disinan diikek janji diukua padan rosok aia lah ka pambuluah rosok minyak lah ka kuali kok barasio di nan galap adat lalu di nan tarang, baa diadat lalu di nan tarang tumah labuah nan panjang lah baturuik halaman nan leba lah bapijak janjang takanak lah batingkek bandua tarantang lah batapiak, kini lah alia ditangah rumah, lapiak takambang lah bakaduduaki , rokok sabatang lah baisok siriah sakapua lah bakunyah , pun baatonyolai maagak dihari nan dahulu di janji nan dipabuek di padan nan baukua,Lai dimalam nan samalam nangko janji ditapati kara di muliakan, tumah dasok nan kabapalun di daun tabu nan ka basauah nak mamasuakkan Sutan Sinaro ka biliak nan dalam ka kunci nan taguah dek karano rumah baujuang bapangka duduak nak baiyo tagak nak baramuah Tuah

Sampai Kayo

Sampai

Maanyo Kayo

Ambo Tuah

Sabalun kato bajawab gayuang basambuik baiyo sapatah dulu Kayo

Rancak Tuah

Kayo !

Ambo Tuah

Dikumbalikan Pasambahan Kabakeh Kayo

Kumbalikanlah Tuah

Sungguahpun ka Kayo kumbalinyo Nak sarapeknyolah Rang Gaek salingka duduak sarato dunsanak bakarapatan, dibaliak-baliak bak mamanggang di ulang-ulang bak manyapuah lai nan kato Kayo Jua nan kadiamba Gadang dianjuang tinggi apo nan kato Kayo cako tantu Sambah manyambah kito pulangkan kapado Allah, salawat kapado Nabi lai nan kato sajo kito pakatokan.

Apo nan kamanjadi buah kato kinitu, magak dihari nan dahulu batamu di labuah nan golong di pasa nan rami disinan diikek janji diukua padan rosok aia lah ka pambuluah rosok minyak lah ka kuali kok barasio di nan galap adat lalu di nan tarang, baa diadat lalu di nan tarang tumah labuah nan panjang lah baturuik halaman nan leba lah bapijak janjang takanak lah batingkek bandua tarantang lah batapiak, kini lah alia ditangah rumah, lapiak takambang lah bakaduduaki , rokok sabatang lah baisok siriah sakapua lah bakunyah , pun baatonyolai maagak dihari nan dahulu di janji nan dipabuek di padan nan baukua,Lai dimalam nan samalam nangko janji ditapati kara di muliakan, tumah diasok nan kabapalun di daun tabu nan ka basauah nak mamasuakkan Sutan Sinaro ka biliak nan dalam ka kunci nan taguah dek karano rumah baujuang bapangka duduak nak baiyo tagak nak baramuah Tuah kan baitu bana kalaluan parundiangan Kayo

Io sabana baitu Tuah

Kayo

Ambo Tuah

Dek kito nan baadok batunggalan bana sasuai paham saukua tapi samantangpun baitu lamak siriah lego carano lamak kato balega bunyi nan bana kato baiyo nan rajo kato mupakat, dek karano rang gaek lai samo diadok ambo bao kato Naro tu jo mupakat Naro mananti baanyo kolah.

Sampai Tuah

Sampai

Samulo Kato kadianta kabakeh Tuan io bana nak sarangkai bak labu nak satali bak papeh kateh nak sapucuak kabawah nak saurek kato io nak tabao jo mupakat nana tu Tuan.

Ambo kamambao kato jo Mupakat Kayo mananti lai kasaba ?

Sakiro kiro Tuah

Nan kito baa Kayo

Baranti

MAMBAO BAIYO

Muncak !

Ambo Tuan Tuah

Barudiang jo Muncak sapatah

Rancak Tuan Tuah

Sungguahpun ka Muncak tibonyo nak sarapeknyolah Rang Gaek salingka duduak sarato Dunsanak bakarapatan,

Sambah manyambah kito pulangkan kapado Allah, salawat kapado Nabi lai nan kato sajo kito pakatokan.Apo an kamanjadi buah kato ka Muncak kinitu satantangan di bisiak nan kadangaran imbau nan kalampauan maagak nan ka buah barinao iko nan kadijapuikkan ka Muncak kinigo.

Sampai Tuan

Sampai Muncak

Sabalun kato ba jawab gayuang batangkih baiyo sapatah tuah

Rancak

Kayo

Ambo Muncak

Dikumbalikan Parundiangan ka Tuah

Rancak

Sungguapun Ka Tuah tibono nak arapeknyolah Rang Gaek salingka Duduak sarato Dunsanak karapatan, dibaliak-baliak bak mamanggang diulang ulang bak manyapuah nan diTuah juo nan ka diamba gadang danjuang tinggi, apo nan kato Tuah cako tantu sambah manyabah dipulangkan kapado Allah , salawat kapado Nabi lai nan kato sajo kito pakatokan, apolah nan kamanjadi buah kato di Tuan tu kini satantangan di asok nan kabapalun dauntabu nan kabasauah maagak nan ka buah barinyo bajapuikkan ka Muncak kan baitu bana Tuah

Io sabana baitu Muncak

Tuah

Ambo Muncak

Dek kito nan baadok batunggalan bana sasuai paham saukua tapi samantangpun baitu lamak siriah lego carano lamak kato balega bunyi nan bana kato baiyo nan rajo kato mupakat, dek karano rang gaek lai samo diadok ambo bao kato Tuah tu jo mupakat Tuah mananti baanyo kolah.

Samulo Kato kadianta kabakeh Muncak io bana kailia nak sarangkuah dayuan kamudiak nak satumpu galah, kato io nak tabao jo mupakat bana tu Muncak.

Ambo mambao kato jo mupakat Tuah mananti lai kasaba

Sakiro-kiro Muncak

Nan kito Tuan

Baranti

Tuah

Ambo Muncak

Dihari nan cako Tuah ambo sabakan manuruik Adat manauang manuruik Undang samantaro ambo manjapuikkan nan ka bua barinyo ka Urang Gaek salingka Duduak sarato Dunsanak, baa dek Urang Gaek sarato dunsanak karapatan ndak sasak bintang di langik ndak gambuang lukah di aia tumah tiok kandak tiok buliah tiok pintak tiok balaku, lah ado nan kabuah barinyo dek baliau, dek baliau baanta ka Ambo dek Ambo kabaanta ka bakeh Tuah Alah koh rancak dianta Tuah ?

Nan dijapuik Muncak

Apolah nan kaantanyo kinitu satantangan diasok nan kabapalun di daun tabu nan kabasauh , bapambarianlah Tuah disinan nan kami disiko tinggi maanjuang gadang maamba, itulah nan kabuah barino tu Tuah

Sampai Muncak

Sampai Tuah

Dihari nan Cako Ambo Muncak sabakan manuruik adat manaung manuruik Undang samantaro muncak manjapuikkan aia nan janiah sayak nan landai kaakeh Rang Gaek salingka duduak sarato Dunsanak , tumah lah dapek nan kabuah barinyo dek baliau, dek baliau baanta kamuncak, dek Muncak baanta kabekehambo, alah nan kaantanyo kinitu satantangan, diasok nan kabapalun didaun tabu nan kabasauah, bapambarianlah Tuah disinan nan kami disiko tinggi maanjuang gadang maamba , kan baitu banatu Muncak ?

Io sabana baitu tuah

Muncak !

Ambo Tuah

Dek karono panehko bapuhun ujanko barasa disagoan roan ka ureknyo kato ke nan tabik baako baitu Muncak ?

Nak tampak pasa bakeh bamalam, bateh tampek baranti, rantiang tampek enggok, pulau tampek banang, iolah rancak rotan disagokan kaurekyokato ke nan tabik Tuah.

Nan kito Muncak

Baranti Tuah

Kayo

Ambo Tuah

Dikumbalikan Pasambahan kabakeh Kayo

Rancak Tuah

Dihari nan cako Kayo Ambo sabakan manuruik adat manaung manuruik undang samantaro ambo mancarikan aia nan janiah sayak nan landai kabakeh rang gaek sarato dunsanak , ruponyo dak gambuang lukah diaia ndak sasak bintang di langik tiok kandak tiok bulaku tiok pintak tiok buliah pucuak dicinto ulam tibo sumua dikali aia tabik tumah lah ado nan kabuah barinyo di balau, di baliau baanta kaambo di ambo kabaanta ka Kayo, alahko rancak dianata Kayo ?

Rancak Tuah

Apolah nan kaantanyo kinitu tantangan diasok nan kabapalun di daun tabu nan kabasauh lah gunjai nan bauleh lah suri nan batuladan adat lamo pusako usang alah pasa nan biaso jano baliau ikolah nan kabuah barinogo Kayo ?

Sampai Tuah

Sampai Kayo

Ndak lai Tuan dek karano kandak lah buliah pintak lah balaku lah manyanagkan ati rasonyo Tuah,

Nan kito Tuan

Baranti Naro

PASAMBAHAN BATUNANGAN

Sutan Batuah

Ambo Sutan Kayo

Dimuliakan Tuah jo Pasambahan

Rancak

Sungguahpun ka Tuah tibonyo nak sarapeknyolah Rang Gaek salingka duduak sarato Dunsanak bakarapatan,Sambah manyambah kito pulangkan kapado Allah, salawat kapado Nabi lai nan kato sajo kito pakatokan.Apo nan kamanjadi buah kato kinitu, maagak diaji kito nan partamu cako jalannyo baranti katonyo basudah kauik abih pancuang putuih bajalan baranti kato basudah, lai dihari nan kini di gunjai nan bauleh disuri nan batuladan diadat nan bapakai dicupak nan baisi tantu arekko bapamacik taguahko bapangajang kok tali dapek diirik kok tambang dapek diasak ka apuang-apuang di lauik ka tungkek-tungkek di darat, kok kaciak namoi tando kok gadang namoi ikatan lai diadat nan katangah nak mintak ditarimo suko goah dek karano rumah baujuang bapangka duduak nak baiyo tagak nak baramuah Tuah

Sampai Kayo

Sampai

Maanyo Kayo

Ambo Tuah

Sabalun kato bajawab gayuang basambuik baiyo sapatah dulu Kayo

Rancak Tuah

Kayo !

Ambo Tuah

Dikumbalikan Pasambahan Kabakeh Kayo

Kumbalikanlah Tuah

Sungguahpun ka Kayo kumbalinyo Nak sarapeknyolah Rang Gaek salingka duduak sarato dunsanak bakarapatan, dibaliak-baliak bak mamanggang di ulang-ulang bak manyapuah lai nan kato Kayo Jua nan kadiamba Gadang dianjuang tinggi apo nan kato Kayo cako tantu Sambah manyambah kito pulangkan kapado Allah, salawat kapado Nabi lai nan kato sajo kito pakatokan.Apo nan kamanjadi buah kato kinitu, magak maagak diaji kito nan partamu cako jalannyo baranti katonyo basudah kauik abih pancuang putuih bajalan baranti kato basudah, lai dihari nan kini di gunjai nan bauleh disuri nan batuladan diadat nan bapakai dicupak nan baisi tantu arekko bapamacik taguahko

bapangajang kok tali dapek diirik kok tambang dapek diasak ka apuang-apuang di lauik ka tungkek-tungkek di darat, kok kaciak namoi tando kok gadang namoi ikatan lai diadat nan katangah nak mintak ditarimo suko goah dek karano rumah baujuang bapangka duduak nak baiyo tagak nak baramuah Tuah kan baitu bana tu Kayo

Io sabana baitu Tuah

Kayo

Ambo Tuah

Dek kito nan baadok batunggalan bana sasuai paham saukua tapi samantangpun baitu lamak siriah lego carano lamak kato balega bunyi nan bana kato baiyo nan rajo kato mupakat, dek karano rang gaek lai samo diadok ambo bao kato Naro tu jo mupakat Naro mananti baanyo kolah.

Sampai Tuah

Sampai

Samulo Kato kadianta kabakeh Tuan io bana nak sarangkai bak labu nak satali bak papeh kateh nak sapucuak kabawah nak saurek kato io nak tabao jo mupakat nana tu Tuan.

Ambo kamambao kato jo Mupakat Kayo mananti lai kasaba ?

Sakiro kiro Tuah

Nan kito baa Kayo

Baranti

MAMBAO BAIYO

Muncak !

Ambo Tuan Tuah

Barudiang jo Muncak sapatah

Rancak Tuan Tuah

Sungguahpun ka Muncak tibonyo nak sarapeknyolah Rang Gaek salingka duduak sarato Dunsanak bakarapatan,Sambah manyambah kito pulangkan kapado Allah, salawat kapado Nabi lai nan kato sajo kito pakatokan.Apo an kamanjadi buah kato ka Muncak kinitu satantangan di bisiak nan kadangaran imbau nan kalampauan maagak nan ka buah barinao iko nan kadijapuikkan ka Muncak kinigo.

Sampai Tuan

Sampai Muncak

Sabalun kato ba jawab gayuang batangkih baiyo sapatah tuah

Rancak

Kayo

Ambo Muncak

Dikumbalikan Parundiangan ka Tuah

Rancak

Sungguapun Ka Tuah tibono nak arapeknyolah Rang Gaek salingka Duduak sarato Dunsanak karapatan, dibaliak-baliak bak mamanggang diulang ulang bak manyapuah nan diTuah juo nan ka diamba gadang danjuang tinggi, apo nan kato Tuah cako tantu sambah manyabah dipulangkan kapado Allah , salawat kapado Nabi lai nan kato sajo kito pakatokan, apolah nan kamanjadi buah kato di Tuah tu kini satantangan di bisiak nan kadangaran imbau nan kalampauan, maagak nan ka buah barinyo bajapuikkan ka Muncak kan baitu bana Tuah

Io sabana baitu Muncak

Tuah

Ambo Muncak

Dek kito nan baadok batunggalan bana sasuai paham saukua tapi samantangpun baitu lamak siriah lego carano lamak kato balega bunyi nan bana kato baiyo nan rajo kato mupakat, dek karano rang gaek lai samo diadok ambo bao kato Tuah tu jo mupakat Tuah mananti baanyo kolah.

Samulo Kato kadianta kabakeh Muncak io bana kailia nak sarangkuah dayuang kamudiak nak satumpu galah, kato io nak tabao jo mupakat bana tu Muncak.

Ambo mambao kato jo mupakat Tuah mananti lai kasaba

Sakiro-kiro Muncak

Nan kito Tuah

Baranti

Tuah

Ambo Muncak

Dihari nan cako Tuah ambo sabakan manuruik Adat manauang manuruik Undang samantaro ambo manjapuikkan nan ka buah barinyo ka Urang Gaek salingka Duduak sarato Dunsanak, baa dek Urang

Gaek sarato dunsanak karapatan ndak sasak bintang di langik ndak gambuang lukah di aia tumah tiok kandak tiok buliah tiok pintak tiok balaku, lah ado nan kabuah barinyo dek baliau, dek baliau baanta ka Ambo dek Ambo kabaanta ka bakeh Tuah Alah koh rancak dianta Tuah ?

Nan dijapuik Muncak

Apolah nan kaantanyo kinitu satantangan dibisiak nan kadangaran imbau nan kalampauan , bapambarianlah Tuah disinan nan kami disiko tinggi maanjuang gadang maamba, itulah nan kabuah barino tu Tuah

Sampai Muncak

Sampai Tuah

Dihari nan Cako Ambo Muncak sabakan manuruik adat manaung manuruik Undang samantaro muncak manjapuikkan aia nan janiah sayak nan landai kaakeh Rang Gaek salingka duduak sarato Dunsanak , tumah lah dapek nan kabuah barinyo dek baliau, dek baliau baanta kamuncak, dek Muncak baanta kabekehambo, alah nan kaantanyo kinitu satantangan, dibisiak nan kadangaran imbau kalampauan, bapambarianlah Tuah disinan nan kami disiko tinggi maanjuang gadang maamba , kan baitu banatu Muncak ?

Io sabana baitu tuah

Muncak !

Ambo Tuah

Dek karono panehko bapuhun ujanko barasa disagoan roan ka ureknyo kato ke nan tabik baako baitu Muncak ?

Nak tampak pasa bakeh bamalam, bateh tampek baranti, rantiang tampek enggok, pulau tampek banang, iolah rancak rotan disagokan kaurekyokato ke nan tabik Tuah.

Nan kito Muncak

Baranti Tuah

Kayo

Ambo Tuah

Dikumbalikan Pasambahan kabakeh Kayo

Rancak Tuah

Dihari nan cako Kayo Ambo sabakan manuruik adat manaung manuruik undang samantaro ambo mancarikan aia nan janiah sayak nan landai kabakeh rang gaek sarato dunsanak , ruponyo dak gambuang lukah diaia ndak sasak bintang di langik tiok kandak tiok bulaku tiok pintak tiok buliah pucuak

dicinto ulam tibo sumua dikali aia tabik tumah lah ado nan kabuah barinyo di balau, di baliau baanta kaambo di ambo kabaanta ka Kayo, alahko rancak dianata Kayo ?

Rancak Tuah

Apolah nan kaantanyo kinitu tantangan diadat Kayo nan katangah lah gunjai nan bauleh lah suri nan batuladan adat lamo pusako usang alah batarimo suko jano baliau limbak nan dari pado itu manuruik kato hati diateh tabangko batimbalan kalo-kalo jan putuih titian jan lapuak sambah lalu sal;am kumbali nan kumbalinyo io nak batarimo suko pulo koah ikolah nan kabuah barinogo Kayo ?

Sampai Tuah

Sampai Kayo

Sambah lalu salam kumbali nan kumbalinyo lah batarimo suko pulo kan Tuah

Tuah

Ambo Kayo

Dek kandak lah samo buliah pintak lah samo balaku lah manyanagkan ati rasonyo Tuah,

Nan kito Tuan

Baranti Kayo

Sutan Batuah

Ambo Sutan Kayo

Nak Kabarundiang jo Tuah sapatah lai.

Sampaikanlah Sutan Kayo

Nan paja kanlah batunangan , dimalam nan samalam nangko tiok-tiok nan dimukasuik alah sampai nan dama alah pacah , bana nan kadianta ka bakeh Kayo kiniko silang nan bapangka karajo nan bapokok, koknyo barueh nak tampak bukunyo, koknyo laweh nak tampak tapinyo, koknyo panjang nak tampak ujuangnyo, diharinyo nan baikak kotikonyo nan elok ikolah bana nan kadianta ka Kayo kinikoah .

Sampai Tuah

Sampai

Dek karano Ambo lai duduak jo niniak mamaksarato ibu jo bapo ambo jaopuikkan nan ka buah barinyo Tuah mananti baanyo kolah

Sampai Kayo

Samulo kato kadianta ka Kayo kok mamaek nak tibo dibarih kok bakato nak tibo di alua kato nak tabao jo mupakat tu Kayo

Nan kito kayo

Baranti

Tuah

Ambo Kayo

Dikumbalikan parundiangan ka Tuah

Rancak

Dihari nan cako Tuah mananti Ambo mambao kato baiyo jo niniak mamak , dunsanak sarato ibu jo bapo, lah dapek nan kabuah barino dek baliau baanta kaambo dek ambo kaba anta ka Tuah alahkoh rancak dianta Tuah ?

Nan di japuik Kayo

Apolah nan kaantanyo kinitu satantangan di arinyo nan baiak kutikonyo nan elok, manti lai kabarulang iko nan kabuah barinyo ko Tuah

Sampai Kayo, dek karano kandak lah buliah pintak lah balaku lah manyanangkan hati rasonyo KayoNan kito TuahBaranti

PASAMBAHAN KA MAKAN 3

(Dilangsungkan di atas rumah)Sutan Parmato : (juru bicara pihak keluarga calon mempelai wanita berdiri sambil mengangkat sembah). Ma angku Sutan Sinaro ? Sambah tibo ka haribaan angku !Sutan Sinaro : (juru bicara pihak keluarga calon mempelai pria berdiri juga sambil mengangkat sembah). Manitahlah angku Sutan Permato.Sutan Parmato : Sungguahpun angku surang - tampek ambo manibokan sambah - nan sarapeknyolah niniak mamak nan gadang basa batuah - alim ulama cadiak pandai - suluah bendang dalam nagari langkok jo Bundo Kanduang - amban puro limpapaeh rumah nan gadang - sarato nan mudo-mudo - nan capek kakiringan tangan - parik paga dalam nagari Ketek indak disabuik namo - Gadang indak diimbaukan gala - nak jo sambah sajo kasadonyo - kami muliakan…(Kembali mengangkat Sembah dan melanjutkan lagi kata-katanya).Apo nan manjadi isi pasambahan - iolah tantangan kami alek nan tibo - Nan sabondong lalu - satampuah suruik - sasuai jo janji nan dikarang - sarato padan nan lah diukue - iolah tibo kami disiko - Kok datang alah basambuik - kok tibo alah basonsong - lah dibao naiak kateh rumah - kok duduaklah bakambangkan lapiak - alah kami balapeh angah.Baa nan sakarang kini nangko - Kok dirantang namuah panjang - Elok dipunta naknyo singkek - Batanyo kami ka sipangka - Kok ado nan taraso diati - nan ta ilan dimato - alahko buliah dikatangahkan ?Sutan Sinaro : Alah sampai di angku Parmato ?Sutan Parmato : Alah, Sutan!Sutan Sinaro : Apo nan manjadi panitahan dek angku Sutan Parmato tadi - alah dalam adaik dalam pusako - alah taracak diundang alah tasungkuik di limbago - Ibaraik urang batukang - alah dibarih makan pahek - alah dirasuak manjariau - Tapi samatang pun baitu - iyo juo bak pangaja urang tuo-tuo kito - Jikok babiduak banakodo - Jikok bajalan banan tuo - Nak ambo elo kato jo mupakaik - mancari rundiang nan saangguak - Basaba malah angku mananti !Sutan Sinaro : yo ambo nanti malah ?Sutan Sinaro : (menunjukkan sembah kepada ninik mamak rumah : Dt. Batuah)Ma angku Datuak Batuah? sambah tibo kaharibaan angku datuak !Sutan Sinaro : Tantangan rundiang alek nan tibo indaklah raso kadiulang - Kok bisiak lah kadangaran - kok imbau lah samo kalampauan - Baa di kito kini nangko - kok kato alun bajawek - kok gayuang alun basambuik - iyo nak mintak sipaik bakeh angku Datuak - Baa po dikito pambarinyo ?Dt. Batuah : Apo nan manjadi panitahan dek Sutan tadi - iyolah kato sabananyo - adaik tanyo iyo bajawek - adaik gayuang iyo basambuik - Tantang jawek bakeh si alek - jalan nan pasa kito turuik - labuah nan golong kito tampuah - Jikok batanyo lapeh arak jikok barundiang sudah makan - Pulang maklum bakeh Sutan !Sutan Sinaro : Baa nyo kalau angku Datuak nan manyampaikan…?Datuak Batuah : Karano Sutan nan manabang - eloklah Sutan juo nan manutuah!Sutan Sinaro : Jadi malah angku. (Lalu menunjukkan sembah kembali kepada St. Parmato) Ma angku Sutan Parmato? Maaf dimintak sapuluah jari - karano lah rasah angku tagak mananti - maklumlah bajalan indak sadang salangkah - jalan babelok bakeh lalu - Baa nan kini nanko - manjawek tanyo angku tadi - lah kami cari rundiang nan saangguak - sarato kato nan sagumam - kok bulek lah buliah

digolongkan - picaklah buliah dilayangkan - iyo jalan nan pasa juo nan batampuah - labuah nan golong juo kito turuik - Jikok batanyo lapeh arak - jikok barundiang sudah makan - Sakitu sambah bakeh Sutan!Sutan Parmato : Kalau baitu putusan kato - tingga dikami manjalani - Bismillahkan lah diangku disitu - nak kami turuikkan pulo di siko !(Acara “sambah Manyambah” terhenti sejenak untuk makan dan setelah selesai makan, barulah Sutan Parmato kembali mengangkat sembah)Sutan Parmato : Ma angku Sutan Sinaro ? Sambah tibo kaharibaan angku…!Sutan Sinaro : Manitahlah angku Sutan ParmatoSutan Parmato : Kok makan iyolah sampai kanan kanyang - Kok minum iyolah tibo dinan sajuak - Manjapuik kato nan tingga - Maulang rundiang nan tadi - Kok ado nan tailan dimato - nan takano di ati - alah koh kini buliah kami katangahkan…?Sutan Sinaro : Katangahkanlah angku Sutan ParmatoSutan Parmato : Kok makan iyolah tibo dinan sajuak - Manjapuik kato nan tingga - Maulang rundiang nan tadi - Kok ado nan tailan dimato - nan takano di ati - alah koh kini buliah kami katangahkan…?Sutan Sinaro : Dahalu bakapa rang ka Makah - kini lah tabang jo pasawek - Dahulu kato baistinah - kiniko kato basicapek - Disabuik sajo nan paralu - Iyolah tantangan kami nagko - nan sabondong lalu satampuah suruik - namonyo urang tasarayo - tasuruah dek angku…(sebutkan nama, suku dan kampung ayah calon pengantin wanita) - Datang kamari basamo-samo - untuak manjapuik marapulai - calon rang sumando jo minantu kami nan banamo…. (sebutkan nama calon pengantin pria) anak dari …(sebutkan nama ayahnya serta suku dan kampungnya) - Kok datang kami datang batadaik - ditingkek janjang - ditampiak bandua - langkok jo siriah bacarano - Kok japuik kami japuik tabao - sarato jo urang nan kamairingkan…!Awak baralek yo baabih ari - tapi pangulu yo baukatu - Karano itu pintak indak kabaulang - kandak indak kamanduo - Tarimolah baju pambaokan kami - nak mintak dipakaikan kapado rang sumando kami…!

PASAMBAHAN MAMINANG 2

Pesambahan Maminang dilangsungkan diatas rumah pemuda yang akan dipinang.Sutan Mudo: (juru bicara pihak keluarga wanita yang datang mengangkat sembah lebih dahulu) Ma angku Sutan Diateh?Sairiang balam jo barabahBarabah juo inggok dahuluSairing salam jo sambahSambah juo tibo bakeh angkuSutan Diateh : (juru bicara pihak keluarga pria membalas sembah) Manitahlah angku Sutan MudoSutan Mudo : Sungguahpun Sutan surang nan dituhuak, nan sarapeknyolah niniak mamak - amai jo bapak - sarato karajo nan bapokok - silang nan bapangka - nan barado diateh rumah nangko tampek ambo manibokan sambah. Panitahan nan ditibokan bakeh Sutan, iolah tantangan pihak kami nan datang. Datang bukan sumbarang datang, datang mahanta siriah jo pinang - mamuhun kami ka niniak mamak - sarato saganok sipangka : Kok siriah kami yo mintak dikunyah, pinang kami mintak digatok - sakitu sambah bakeh Sutan…!(Langsung setelah itu Sutan Mudo menyodorkan Carano sirih kepada Sutan Diateh dan Sutan Diateh mengedarkan carano kepada yang patut-patut diatas rumah. Setelah selesai acara memakan atau mencuil atau hanya memegang saja sirih itu, maka barulah Sutan Diateh membalas sambah)Sutan Diateh : Ma angku Sutan Mudo? Sambah babaliak bakeh angku !Sutan Mudo : Manitahlah angku Sutan Diateh.Sutan Diateh : Siriah Sutan nan katangah - alah samo kami kunyah. Pinang sagatok alah kami makan - manih lah tingga diujuang lidah - pahik lah luluih karakuangan - namun samantangpun baitu - manuruik pasa na biaso - kok tembak tantu baalamaik - kok cancang tantu balandasan - siriah katangah bakaadaan - kato katangah baurusan - tantangan siriah Sutan nan katangah - yo nak mintak basiangkan nan bak hari - batarangkan nan bak bulan !Sutan Mudo : Alah sampai di Sutan ?Sutan Diateh : Alah SutanSutan Mudo : Apo nan manjadi pasambahan dek Sutan tadi - alah dalam adaik dalam pusako - lah taracak di undanglah tasungkuik di limbago - tantangan siriah nan katangah - pihak di kami nan datang. Iyo juo bak kato urang - gadiah bakandak pado ragi - putiak bakandak jadi buah - Sutan manaruah balam mau - kami manaruah sangkak suto. Laikuh mungkin disatukan ? Ikolah niaik nan dianta bakeh Sutan !Sutan Diateh : Sapanjang niaik Sutan nan katangahlah tatampuah di labuah golong - lah tapijak di jalan pasa - lah samo diagak dikiro-kiro. Tapi sungguahpun nan baitu - jauah nak mintak dijambokan - dakek nak mintak dikakokkan. Ikolah bana nan dimintak bakeh Sutan !Sutan Mudo : Ma angku Sutan Diateh - sapanjang jauah nak dijambokan - sapanjang dakek nak dikakokkan - maagak dihari nan dahulu - kok bisiak kanlah samo kadangaran - kok imbau kanlah samo kalampuan - niaik di ati nan dihadang iyo nak maminang anak kamanakan Sutan nan banamo : …..(Sebutkan nama pemuda yang dituju) Anak dari Angku ….(Sebutkan nama ayahnya) - Nak batali pamenan adaik jo anak kamanakan kami ….(sebutkan nama wanitanya) Anak dari ….(sebutkan pula nama ayahnya). Ikolah niaik mukasuik kami - yo nak mintak ditarimo jo hati nan suci muko nan janiah - pintak nak mintak dibuliahkan - kandak nak mintak bapalakukan - sakitu sambah bakeh Sutan !

Sutan Diateh : Sapanjang panitahan Sutan nan katangah - alah diadaik nan bapakai - alah dicupak nan baisi - tapi sungguah pun nan baitu - tibo dikarajo nan bak nangko - rundiang ndak putuih diambo surang - dielo kato jo mupakaik dicari bulek nan sagolong - jo niniak sarato mamak sarato urang nan patuik-patuik - mananti malah Sutan sakutiko! Sutan Mudo : Yo ambo nanti malah !Sutan Diateh : Maa angku Sutan Mudo ? Maaf dimintak sapuluah jari - dek rasah angku tagak mananti. Maklumlah bakato indak sadang sapatah - bajalan indak sadang salangkah - tantangan niaik Sutan nan katangah - alah ambo paiokan jo niniak sarato mamak - kok bulek lah buliah digolongkan - kok picak lah buliah dilayangkan. Bakaua sutan dinan kiramaik - mamintak Sutan di nan kadapek - kandak buliah pintak balaku - kami tarimo jo hati nan suci sarato muko nan janiah - alah ko sanang hati Sutan ?Sutan Mudo : Sabana sajuak Sutan - karano pintak buliah - kandaklah balaku - sananglah raso dalam hati - sajuak di dalam kiro-kiro. Namun samantang pun baitu - adaik urang batimbang janji - lah batampuak mangko dijenjeng - lah batali mangko diirik. Kok saik iyo nak bapamegang - kok kato iyo nak bapamacik - mako tarimolah tando dari kami. (Pihak keluarga wanita menyerahkan barang tando kepada keluarga pihak pria, dan keluarga pria menyerahkan pula tando kepada keluarga wanita dan dengan demikian selesailah acara batimbang tando).

PASAMBAHAN KA MAKAN 4

Pangka : Baliau datuak ......

Ujuang : Manitah lah Datuak .....

Pangka : Sunggueh pun Datuak surang nan hadang dengan sambah, ka rapek juo molah sagalo Datuak nan bak baranam, tuan alim nan bak baranam tarueh ka tuan ku nan ba duo. Jikok diambo indak kataratok ka tabilang, ka tasabuik namo ka tapuji gala, melainkan sambah ambo sambah data. Sambah ambo sambah data dari pangka taruih ka ujuang dari tangah lalu ka tapi, nan salirik bandue di tapi nan salerong bandue di tangah. Nan tasungkuk dek atok nan talingka dek dindiang nan tahambin di lantai nan saisi rumah tanggo nanko, walau di teras halaman rumah ka tampeknyo ambo mahantarkan sambah. Cancang babari balandasan, lompek babari basitumpu, sambah taunjuek bakeh Datuak mah Datuak .....

Ujuang : Ka nan basamo kumbalinyo mah Datuak .....

Pangka : Itu mah sambah nan ka dipulangkan ka bakeh Datuak, Dek curiang barih dahulu, dek andai pusako lamo. Kalau basiang di nan tumbueh, jikok manimbang di nan ado. Tumbueh sarupo iko kini,

Bungo dadok daunnyo leba Rumah gadang sambilan ruang Patah timah atoknyo ijuek Rumah si banto nak rang palangki Duduek baselo ateh kasue Jatueh tasisik umbuk pua Kaladi tumbueh di samak

Dek niek silang nan bapangka Karajo baiek nan bapokok karakok nan bajunjuang Nan mambari aie nan bak saraguek Mambari nasi nan bak sasuok Sarato pangacok lamak manik Lah masak pulo hidangan di dapue Lah tahidang di ateh meja Lah patuik ko lah kito palamak

Pitua juo molah ambo ka di bari ko mah Datuak .......

Ujuang : Lah ukue sampai Datuak ....

Pangka : Bilang Sakiro itu lah Datuak ....

Ujuang : Iyo pulo tumah sampanjang panitahan Datuak tadi

Balaie biduek di muaro Balabueh lalu ka subarang Biduek nan dari tangah pasa Nagkodo banamo sari ramo Elok sabuang dek juaro Elok alek dek si rajo janang Adek alek bak kato sipangka Kami di ujuang ka manuruti sajo mah Datuak ......

Pangka : Lah ukue sampai Datuak ....

Ujuang : Bilang Sakiro itu lah Datuak ....

Pangka : Indak lai do dek Datuak, lah baitu bana kato Datuak, urak simpueh bukak lah selo, bakisa tagak adok ka meja makan. Tapi lai nan ka di banakan juo ka bakeh Datuak, satantang diri kito baduo, nan manjadi titien aie polongan asok, uleh kato sambuangan lidah, di ateh kato nan tadoroang dalam rundiang nan tagawa, mamintak rila jo maaf kito ka rang banyak, dek janjian di tangan Alloh, kok lai umue samo panjang, lain maso lain wakatu basuo baliek. Barila-rila kito di siko mah Datuak .....

Ujuang : Ditutuik rundiangan singgo iko, disudahi sajo jo Assalamu’alaikum Wr. Wb.

Basamo : Wa’alaikum salam Wr. Wb.

Mako janang mambao urang manuju arah meja makan untuk makan basamo-samo.

Note :

Pidato pasambahan Manjapuik marapulai, disusun oleh kawan-kawan di "Kacimpuang pamenan Mandi" di bawah arahan Halvi Hamid Mangkoto Sati, yang anggotanyo terdiri dari anak Nagari Muaropaneh Kabupaten Solok nan ado di Jakarta dan sekitarnyo.

Naskah ini telah beberapa kali dikaoan (dipraktekkan) dalam acara manjapuik marapaulai manjalang baralek di gedung atau di aula. Diharapkan naskah ini dapat membantu memberikan arah dalam acara pidato pasambahan.