Bayung novena kang apu

Ing Nobena

King Ginu Tang

Jesukrist

o (APUNG MAPAMAKALULU)

MUMUNANG ALDO

PAMUKLAT A DALIT

ITI YA ING DUTUNG Iti ya ing dutung a nung ‘nu Ya

mipaku,Ing Mengabus ning yatu samban

ta Ya ing Ginu.Iti ya ing dutung a nung ‘nu Ya


ta Ya ing Ginu

PANIGAPU ALDO-ALDO(Makatalakad)

Pakibat:

“O Ginung menatbus kekami, pepailasa uli mi, pakiramdaman

Mu sa ing aklis mi Keka.”

DAPAT KAPAGLARINAN(Siklaud la reng sabla)

Pakibat:

“Pakalulu Ginu, Pakalulu.”

Sabla: E sa mikawang kaku kapilan man ing aslag ding Dibinong mata Mu. Itanikala Me king pasbul ning tabernakulo ing salawayan kung pusu. Ninu mo pin, nganang kukutang San Pablo, ing ating upayang ikawani na kami king Kekang lugud, O Kristo? Ing kaligaligan?

Ing kasakitan, ing pangalupig, ing danup, ing kalubasan, ing panganib, o ing kamatayan? Daptan Mu sa pu ing panamdaman na ing makaluku nang api ning mal a sinta at king pamangilala na king keyalan nang pasalamat ampon king kapanyalangsangan a daraptan na, malaso ya sa king sindak, tumangis ya sa’t sumisi at magkapilit magbayu at mie ya king sinta Mu. Amen.

MUMUNANG ALDO

ING PAMANALANGIN NANG JESUS KING MULA NING

GETSEMANI

(Manatiling makatalakad para king pamamasa)

MATAIMTIM A PAMIGUNAM(lukluk at migunam)

Makananu kang manalangin?

Nanu ing pangadi mu?

Bakit ka manalangin?

Kutnan ta la ring sarili tamu kabang pigugunaman ta ya ing

pamanalangin ning Ginung Jesus king Mula ning Getsemani.

(Katahimikan)

Malda: Sasamban da Ka, O Banal a Dayang tinulu kabang manalangin Ya ing mayubung Jesus kanitang benging midaun Ya antimong karapat-dapat a ain-sakripisyo para king kaligtasan ning yatu.

Uli na ning pait at dusang pibata Mu, O mamung Kordero ning Dios, tagkilan Mu ku pusu at kaladwa ban sukat kung dinan pansin ing ulaga ning pamanalangin karing balang penandit ning kapagsubukan.

Iti ya ing bukud kung pagdulapan, O Ginu, king ibuklat ke ing pusu ku Keka, king ibuklat ke iti kapamilatan na ning pamanalangin ku’t pamagbante lele Mu.

Ibpa Mi…Bapu Maria…

Ligaya…

PANALANGIN(Makasiklaud)

Sabla: O Ginu ming Jesukristo, Apung Mapamakalulu, Ika ing Banal a tinubud ning Ibpa, ing Anak ning Dios a mabie, manalangin kami king mitnung kapagmulalan kabang pigugunaman mi ing Kekang kapamintuan king banal a kaburyan ning Ibpa.

Menalangin Ka’t menangis king mula ning Getsemani kanitang benging mipnu king pait at lungkut. Ikeng lelangan Mu, gaganakan mi ngeni ing Kekang pamanalangin, anti mi mong akakit nung makananu Kang mipawas daya, nung makananu Mong inusig di San Pedro, Santiago at San Juan a manalangin ba lang e manabu king tuksu.

Sasabian Mu la naman ngeni kekami reting banal a amanu. Ituru Mu keng manalangin at maglame kayabe Mu lalu na kaniting Novena, at migit king sabla, turuanan mu kaming mamintu king kaburyan ning Ibpa.

Adwan mi ngeni Keka O Ginung Jesus, ing itubud Me ing Banal a Espiritu antimo ing pengaku Mu karing alagad Mu. Iting Espiritu ning lugud, Ya ing kekaming Talasaup, Ya ing Talaturu mi nung makananu kaming magkapilit a lumaban king tuksu,

nung makananung manalangin at magbante arapan Mu at lalu na, nung makananung mamintu king kaburyan ning Ibpa. Ginu ituru Mu kaming manalangin anti mo nung makananu Mong tirung menalangin ding Kekang alagad. Amen.

TAULING PANALANGIN(Siklaud)

PANALANGIN KANG APUNG MAPAMAKALULU(Obispo Pablo Virgilio S. David, D.D.)

Lalapit ku Keka, O Ginu ming Jesukristo, Apung Mapamakalulu, kambe ning beyatan ning kaladua ku,

kambe ring lingasngas at pigagap ku,kambe ring kapagsubukan a arapan ku,kambe ring bage liligalig king pusu at kaisipan ku,kambe da ring pamangailangan da reng taung kaluguran ku,

kambe ning pamikasala’t keinan ku,kambe ning mabule kung kasalpantayanan,kambe ning matbud kung kapanaligan,kambe ning dimut kung lugud

Lalapit ku Keka O Ginu ming Jesukristo, Apung Mapamakalulu, nung makananung lepitan na Ka nitang babaing kayayagasan daya, ban kalupa na, atagkil ke agyang ing laylayan na Mu ning imalan Mu at kumayap ku.

Lalapit ku Keka O Ginu ming Jesukristo, Apung Mapamakalulu, nung makananung lepitan na Ka nitang taung maki-ketung, ban tagkilan Mu ku’t pakayapan, ban linisan Mu ku kaladwa’t katawan, ban dinan Mu kung bayung bie at parasan.

Lalapit ku la naman Keka O Ginu ming Jesukristo, Apung Mapamakalulu, ring pakamalan ku king bie. Kalupa da retang taung memitbit ketang paralitiko at memusbus king bubungan ban ikuldas de at ilapit Keka itang kaluguran dang ating kapansanan.

Aku man O Ginu ming Jesukristo, Apung Mapamakalulu, buri ko sang ilapit Keka ding kaluguran ku king bie, ban ila man, damdaman do ring amanu mung makapasno at ban ing upaya ning kalam Mu, munie bayung sikanan karing intud dang mangalgal at ban e na la mitakid pasibayu o malili king paglakad da.

Lalapit ku Keka, O Ginu ming Jesukristo, Apung Mapamakalulu, nung makananu na Kang lepitan nitang babaing Cananea, a megmakalunus alang-alang king masakit a anak na, at menalig king degulan ning pusu Mu, ning lunus Mu at masabal karing alang akarapat. Kalupa na, lalapit kung anting asung manenaya king pamangan a mababalag king lamesa ning kayang amu.

Lalapit ku Keka O Ginu ming Jesukristo, Apung Mapamakalulu, kalupa na nitang babaing mikasala a ume da nang basibasan detang taung mapanusga, uling balu kung mapaglunus Ka at Ika mung bukud makapangatmu king sablang kakulangan ku. Ika mung bukud ing makapanakap king kamarinayan ku. Ika mung bukud makapibangun kanakuibat king pangalugmuk ku.

Lalapit ku Keka O Ginu ming Jesukristo, Apung Mapamakalulu, kalupa nang San Pedro inyang pepakit Ka keya at maybug yang lumbug king dine na, inyang igkat Meng mengan at mipasyag pasibayu king lugud na, sumangid ning gewa nang pamaglingad Keka.

Lalapit ku Keka O Ginu ming Jesukristo, Apung Mapamakalulu, kalupa da retang alagad king Emmaus ban kalupa da, akayabe ra Ka king paglakad ku, atalastas ku ing sablang mangapalyari king bie ku, at ban king kapamilatan ding banal mung amanu, ing pusu kung dirimla at daralumdum, mikapali ya at miyaslagan-sala at ban akilala da Ka potang kasulu da Ka at mirinan kung sikanan-lub marap pasibayu kareng bage tatakasan ku.

Susuku ku Keka, O Ginu ming Jesukristo, Apung Mapamakalulu, ing sablang kanaku, uling ika mung bukud ing Ginu ku at Dios ning bie ku, ikang mabibie at magari kambe ning Ibpa at ning Espiritu Santo, manga man king alang angga. Amen.

(King katahimikan ning kekang pusu, sabian mu ing kekang

kapagnasan ban pamatulan me ing Ginung menatbus keka at ing kalam a makasulung king

kekang kabanalan.)

TAULING DALIT(Makatalakad)

DALIT NING PAROKYA NING SANTA KRUS

Crispin Nacpil Cadiang I

Pamaglayag, pamaglakbe, Ninu ka man, e alisian.

Dumalan ka’t, dumalan ka king dalan na ning Krus

IIKristo Jesus wa Dios ya man

Linubas Na ing ka-Diosan Pisanan ing kasalanan

Anggang kamatayan

KoroO Santa Krus, O Banal a Krus

Ginung Jesus O Kristong mengabusBabo na niting banal a dutung Makalarawan ing kaligtasan

Balayan a Keka tatangalKekang lagyu yang daralan

O Santa Krus O Banal a KrusTairan king bie Kabanalan

III

Dutung ning kamarinayan, ngeni dutung kaligayan.

Dutung nung nu’Ka migsalbat, king lugud a tapat

IV Kristo Jesus, ing indu mu,

babo ning krus menabilin: “anak ‘nio ya ing indu mu,

indu ‘nio ing anak mu”.

Ing Nobena

King Ginu Tang

Jesukrist

o (APUNG MAPAMAKALULU)

KADWANG ALDO

PAMUKLAT A DALIT

ITI YA ING DUTUNG Iti ya ing dutung a nung ‘nu Ya


ta Ya ing Ginu.Iti ya ing dutung a nung ‘nu Ya


ta Ya ing Ginu

PANIGAPU ALDO-ALDO(Makatalakad)

Pakibat:

“O Ginung menatbus kekami, pepailasa uli mi, pakiramdaman

Mu sa ing aklis mi Keka.”

DAPAT KAPAGLARINAN(Siklaud la reng sabla)

Pakibat:

“Pakalulu Ginu, Pakalulu.”

Sabla: E sa mikawang kaku kapilan man ing aslag ding Dibinong mata Mu. Itanikala Me king pasbul ning tabernakulo ing salawayan kung pusu. Ninu mo pin, nganang kukutang San Pablo, ing ating upayang ikawani na kami king Kekang lugud, O Kristo? Ing kaligaligan?

Ing kasakitan, ing pangalupig, ing danup, ing kalubasan, ing panganib, o ing kamatayan? Daptan Mu sa pu ing panamdaman na ing makaluku nang api ning mal a sinta at king pamangilala na king keyalan nang pasalamat ampon king kapanyalangsangan a daraptan na, malaso ya sa king sindak, tumangis ya sa’t sumisi at magkapilit magbayu at mie ya king sinta Mu. Amen.

KADWANG ALDO

ING PANGABATBAT NA’T PANGAKORONANG SUKSUK

JESUS

(Manatiling makatalakad para king pamamasa)

MATAIMTIM A PAMIGUNAM(lukluk at migunam)

Nanu ing sasaingsing mung kapanamdaman at sakit?

Atin kayang mayap a maliari tamung ayangu ibat kareting

kapanamdaman at kasakitan?

Nanung sakit o kapanamdaman king kaladua’t katawan kaya ing ating

kasukad na nitang mal a pamaylasa ning Ginung Mengabus keka?

(Katahimikan)

Malda: Sasamban da Ka, O Ginung Jesus, a kapilan man malugud king ketawan, a linasa king Kekang pangabatbat at panga-koronang suksuk! Malalaso la ring mangasyas ming pusu neng gaganakan mi nung makananu da Kang pesakitan ding memarusa Keka.

Tuturu nang San Pablo king bista man atyu Keka ing panga-Dios, e Mu inangkaminan ing Kekang panga-Dios, bagkus, linubas Mu ing Kekang sarili king sablang kamalan at kinwa Me ing aske ning metung a alipan, at meki-wangis Ka karing tau king sablang bage subali mu king kasalanan.

King pamakiwangis Mu karing tau, migpakumbaba Kang migit king sabla at meging mapamintu Ka angga king tingap Mu ing kamatayan, ing kamatayan king metung a krus.

Ibpa Mi…Bapu Maria…

Ligaya…

PANALANGIN(Makasiklaud)

Sabla: O Ginu ming Jesukristo, Apung mapamakalulu, lalapit kaming anak Mung bulagsak. Ginulut at linaut mi la ring sarili mi Keka uli na ning kasalanan mi. Migdatun kami king karalumduman ning dewakan dapot alang patna Kang manaya at mamaus kekami ban sumisi’t mibie-bie king lugud Mu.

O Amanung mikatawan tau at mekisaut busal mi, salang sinlag king karinan ning karalumduman, mengari Kang biserung tupang midaun ban katatan, alang saingsing a linwal karing labi Mu.

O Ginu, e Mu kaburian ing ninu man, atin yang sakit at kapanamdaman king kaladwa’t katawan. Tune yang ganap at makakabus ing Kekang kasakitan. Dapot neng daratang la kekami reng kapagsubukan, takut ing mimiral karing mangayna ming pusu.

Nu ya anti ing degulan ning kekaming kasalpantayanan at kapanaligan Keka? Menasa agad ming pagkapilitan ing lisyan mi la reting kasakitan at kapagsubukan. Ituru Mu kami ban pibatan mi la reti antimo nung makananu Mung pibata ing Kekang pamailasa.

Reting kapagsubukan, paganaka Mu la ban palalaman mi ing kekaming kasalpantayanan at kapanaligan Keka. Ila pin deti ring paralan ban makapakirake kami at mantabe Keka king Kekang pamaylasa at kamatayan.

O Ginung migtimawa kekami, king alang kaplas at lungkut a kasukad na ning kaplas at lungkut a Kekang penamdaman. Ing pamigunam mi king Kekang pangabatbat at panga-koronang suksuk ya sa ing makapagbanal kekami at miyubug kekami ban lalu kaming magpakumbaba at mabyasang lugud.

Daraun mi la Keka ring kekaming lungkut at kasakitan, ding kapanamdaman mi’t kaplas para karing pamuntuk ning Indung Santa Iglesia, lalu na kang Francisco a kekaming Santo Papa, kang Florentino a kekaming Arsobispo, kang Adrian a kekaming Kura Paroko, karing sablang pari, karing misyonero at karing laiko a susuyu para king panyatang ning kayarian Mu. Amen.

TAULING PANALANGIN(Siklaud)

PANALANGIN KANG APUNG MAPAMAKALULU(Obispo Pablo Virgilio S. David, D.D.)

Lalapit ku Keka, O Ginu ming Jesukristo, Apung Mapamakalulu, kambe ning beyatan ning kaladua ku,

kambe ring lingasngas at pigagap ku,kambe ring kapagsubukan a arapan ku,kambe ring bage liligalig king pusu at kaisipan ku,kambe da ring pamangailangan da reng taung kaluguran ku,

kambe ning pamikasala’t keinan ku,kambe ning mabule kung kasalpantayanan,kambe ning matbud kung kapanaligan,kambe ning dimut kung lugud

Lalapit ku Keka, O Ginu ming Jesukristo, Apung Mapamakalulu, nung makananung lepitan na Ka nitang babaing kayayagasan daya, ban kalupa na, atagkil ke agyang ing laylayan na Mu ning imalan Mu at kumayap ku.