Ponte...nas Ondas! Premios Nacionais Cultura Galega
-
Upload
independent -
Category
Documents
-
view
3 -
download
0
Transcript of Ponte...nas Ondas! Premios Nacionais Cultura Galega
Ponte...nas ondas! é unha experiencia pedagóxica que desde a súa orixe fomenta a
radio interescolar como medio de comunicación entre centros educativos galegos e
portugueses, co obxectivo de buscar elementos culturais transfronteirizos, e procurar “pontes”
que eliminasen as barreiras de comunicación que se construiron con estas fronteiras, tanto
entre pobos veciños da raia galego-portuguesa, como entre pobos mais lonxanos, portadores de
elementos culturais e lingüísticos semellantes.
A radio, como soporte de comunicación, continua a ser o recurso educativo nuclear do
proxecto, aínda que complementada coas tecnoloxías máis modernas ( Internet,
videoconferencias, SMS, etc.) para contribur ao logro dos obxectivos educativos formulados.
É, polo tanto, unha experiencia que tenta superar a fronteira establecida polos Estados-
Nación e que conseguiu poñer en valor esta situación estratéxica de iniciativa transfronteiriza.
Pero ademais, foi evolucionando na abordaxe da identidade galego-portuguesa desde unha
perspectiva novedosa como foi a de incorporar os sinais máis significativos desta identidade cun
tratamento pedagóxico actualizado e transmitilos ás novas xeracións.
Por outra parte, contribúe a superar a “fenda dixital”, facendo das novas tecnoloxías
non un fin en si mesmo, senón integrándoas no proceso educativo de xeito natural para
fomentar a interactuación do alumnado. Ademais, intégranse tamén no proxecto a outras
institucións educativas e mesmo a colectivos sociais do mundo cultural ou da empresa privada.
Ponte...nas ondas! vén abordando con rigor, desde a súa orixe en 1995, diversos
ámbitos da cultura galego-portuguesa cun traballo activo coas novas tecnoloxías e atinxindo a
outros aspectos da renovación pedagóxica, a miúdo esquecidos nas prácticas educativas, como
son a conexión co entorno, a implicación nos procesos educativos doutras persoas e colectivos
alleos á escola, o traballo en equipo do profesorado galego e portugués, a procura da
complicidade das radios locais ou nacionais, os axentes culturais, as persoas maiores, os
Concellos, as administracións, etc.
Por estas razóns, Ponte...nas ondas! contribúe a conformación dunha nova identidade
galego-portuguesa que as novas xeracións están a descubrir xa desde o ámbito educativo, coa
axuda das TIC ( Tecnoloxías da Información e Comunicación ) e tamén con iniciativas culturais
que desde a experiencia de Ponte...nas ondas! se están a desenvolver.
O CAMIÑO ANDADO1º. AS ORIXES
Ponte...nas ondas! é unha Asociación Cultural e Pedagóxica que naceu no ano 1995 para
introducir no ensino o mundo das novas tecnoloxías e dos medios de comunicación tendo como
obxectivo primordial fomentar a comunicación entre Galiza, Portugal e os países deste ámbito
cultural.
Partindo da existencia en moitos centros educativos de obradoiros de Radio Escolar e
co gallo da inauguración da ponte que sobre o Río Miño estaba a piques de inaugurarse unindo as
poboacións de Salvaterra e Monçao, un grupo de profesores e profesoras de ámbalas dúas
marxes idearon facer coincidir coa inauguración da infraestructura terrestre outra “ponte”
inmaterial, que dándolle o protagonismo aos alumnos e alumnas, unise tamén as dúas beiras do
río. Nacía así a primeira Xornada “Experimental” de Radio Interescolar Ponte...nas ondas!
que, como é obvio, xogaba coa polisemia da palabra ponte.
Para levar a cabo este “experimento” contouse coas instalacións da radio comercial
“Ecos da Raia” de Monçao, quen cedeu a súa grella de emisión desinteresadamente durante toda
a xornada, e coa emisora escolar que se montou na Casa da Cultura de Salvaterra de Miño, cos
medios domésticos dos que dispuñan as escolas. Colaborou tamén dende o primeiro momento a
Compañía Telefónica de España, que fixo posíbel a realización técnica da experiencia durante
sucesivas edicións.
Así comezou a aventura. 12 horas durou a primeira emisión na que desde os dous
estudios de Salvaterra e de Monçao foron emitíndose os programas elaborados nas 15 escolas
e institutos que participaron nesta primeira edición.
Durante todo o día, liñas de teléfono atendidas por alumnado nos dous estudios, a
maiores dos programas radiofónicos emitidos en directo, recolleron máis de cincocentas
chamadas respondendo á pregunta: Que vas facer ti para mellorar as relacións entre os dous
pobos?
O éxito acadado na primeira edición obrigou a seguir adiante e a repetir a experiencia
no ano seguinte contando coa incorporación de máis escolas e institutos doutras bisbarras da
Galiza e outros concellos de Portugal.
Dada a importancia que cada ano foi adquirindo a experiencia, decídese ampliala para
que non fose só unha única xornada anual de Radio Interescolar, senón que tivese proxección no
curriculum escolar e unha maior presenza nos centros educativos. A partires do ano 1997
proponse que cada nova edición se dedique a estudar e a divulgar un dos concellos do entorno
no outro lado da fronteira. Así, no ano 97 divulgouse o Concello de Salvaterra de Miño, no 1998
estudouse Monçao, no ano 1999 foi para estudar Arbo e Melgaço, co gallo da inauguración da
nova ponte entre as dúas localidades e no ano 2000 foron Tui e Valença do Miño. A organización
suministraba ampla información sobre o Concello a estudar e con ela, en cada centro educativo
abordábase o seu tratamento pedagóxico (gastronomía, literatura, rotas turísticas, xeografía
etc. ) para desenvolver na programación cos alumnos e alumnas.
Ponte...nas ondas! comezaba, deste xeito, un proxecto pedagóxico intercultural, cando
este concepto aínda non estaba moi introducido na nosa literatura pedagóxica e menos aínda na
práctica escolar. Respondía educativamente ao conflito da incomunicación histórica entre pobos
fronteirizos, provocada polo modelo de Estado-nación, o cal, en realidades políticas autoritarias
–como foran o Portugal de Salazar e a España de Franco – incrementa as súas connotacións
patrióticas e o distanciamiento con respecto a outros pobos e culturas. Realidades políticas que,
a súa vez, reprimían as manifestacións interiores de diversidade cultural e lingüística.
Nun contexto democrático non só procede eliminar as barreiras que impiden ou limitan
esa comunicación, senon tamén é conveniente a realización de accións favorecedoras dunha
maior cooperación e intercambio entre esos pobos limítrofes. A idea de comunicalos mediante
unha ponte sobre o río, inspirou estoutra idea dunha “ponte nas ondas” que permitise esoutra
comunicación cultural e educativa. Entre os obxectivos iniciais sinalábanse: fomentar as
relacións entre grupos de alumnos dun lado e outro, intercambiar experiencias entre alumnado
de entrambas marxes, realización conxunta de programas de radio, contribuír a vencer
estereotipos e clixés sobre ambos pobos, fomentar o ensino multicultural, contribuír ao
acercamento entre culturas próximas, etc.
Non só estamos ante a posta en marcha dunha experiencia de educación intercultural,
senón que incluso se vai constatando empiricamente que estas culturas, a pesares de
desenvolverse en contextos políticos diferentes, teñen moitos elementos comúns: poboacións
rurais, con modos de vida semellantes, medio natural común, lingua común e patrimonio cultural
inmaterial con moitos elementos compartidos. Este patrimonio cultural común abórdase a partir
da oitava edición, en 2002.
2º. AS NOVAS TECNOLOXÍAS E A EXPANSIÓN
A edición do ano 1998 marcou un punto de inflexión na experiencia conferíndolle unha
nova dimensión. Conscientes das limitacións físicas da transmisión radiofónica terrestre que
impedían a proxección mais alá do radio de cobertura das emisoras locais, decidiuse a
retransmisión da programación a través de Internet, feito que permitía abrir a experiencia, a
todo o mundo!
E así lanzouse a proposta a través da Web e a compañía Telefónica encargouse de
realizar a transmisión do sinal de radio por Internet. Ponte...nas ondas! chegaba naquel ano a
escolas de Cáceres, de Braga, de Sarria e mesmo á cidade de Pontevedra.
Este feito abriu grandes posibilidades de contacto con novos lugares e a través do
correo electrónico establecéronse novos contactos con outras partes do mundo.
En 1998 abriuse outra faceta que sería moi importante nas próximas edicións: o
contacto con prestixiosos xornalistas radiofónicos. Nese mesmo ano, a xornalista líder de
audiencia da radio española realiza unha conexión en directo desde o seu programa “La Radio de
Julia” co estudio escolar da casa da Cultura de Salvaterra. A conexión con Ponte...nas ondas!
escoitouse a través da emisión de Onda Cero en todo o Estado Español e constitui un grande
recoñecemento a todo o labor realizado e un importante acicate para o alumnado.
A V edición de PONTE...NAS ONDAS!-99 consolidou esta difusión coa ampliación da
experiencia a 40 centros educativos, abrindo a participación a Centros de Portugal, Francia,
Suecia, Holanda, Italia ou Brasil a través de Internet. Isto foi posíbel grazas á colaboración de
Telefónica e Telefónica-Data, quen se encargaron de realizar a emisión das 12 horas de radio na
rede. Ademais, incorporouse un novo estudio radiofónico, o da radio Inês Negra de Melgaço,
formando deste xeito o triángulo radiofónico desde o que se realizaron as 12 horas de emisión o
21 de maio de 1999.
Tamén Julia Otero brinda a súa imaxe corporativa para a publicidade e anuncia con
antelación a súa conexión en directo dende o seu programa "La radio de Julia", que levou de novo
a todo o Estado ( unha vez máis ) o latido do "triángulo das ondas" .
A VI edición de PONTE...NAS ONDAS!-2000 deu entrada a outra nova faceta na
experiencia: a colaboración de artistas coa programación radiofónica. Así, a colaboración de UXÍA
de Galiza e JOAO AFONSO de Portugal concrétase na gravación dun tema conxunto para ser
estreado en exclusiva durante a programación. “O cantar galego” de Zeca Afonso é o tema
escollido para comezar coas colaboracións artísticas galego-portuguesas.
Tamén se dá continuidade á colaboración de pretixiosos xornalistas radiofónicos como IÑAKI
GABILONDO da Cadena SER e de DIAMANTINO JOSÉ da ANTENA 1 de Portugal, quen
fixeron conexións en directo desde os seus programas realizados desde Madrid e Lisboa,
respectivamente (ambos programas líderes de audiencia ).
Outro avance importante neste ano 2000 foi a incorporación dun cuarto estudio de radio, a Radio
Municipal de Tui e a incorporación de máis centros educativos do Val Miñor e de Vigo.
Pero tal vez a novidade máis importante foi a participación dun colexio de Rio de Janeiro a través
de Internet, o colexio Pedro II de Rio de Janeiro ( 11.000 alumnos/as, 1.500 profesores ).
Participación que espertou tanto interese que incluso levou a que un profesor e un alumno se
desprazasen a Galiza para coñecer “in situ” a experiencia.
O ano 1999 e o 2000 consolidáronse como dous anos de gran crecemento da experiencia,
non só no aspecto numérico de escolas participantes que non deixaba de medrar ano a ano,
senon tamén no aspecto técnico coa entrada de máis estudios de radio.
Ponte...nas ondas! conformábase como unha experiencia multidisciplinar e con liñas de
acción novidosas e, sobre todo, abertas á participación dos máis novos.
Tamén a experiencia atraeu a sobranceiros personaxes da música e da cultura que
ademais de loubar o traballo animaban a continualo, participando na programación e
colaborando con todo tipo de actividades. Ao longo dos anos poderíamos citar artistas como
Mercedes Peón, Dulce Pontes, Caetano Veloso, Chico Cesar, Filipa Pais, Milladoiro, Manu Chao,
Pinto D´Herbón, Fausto, Daniela Mercury, Fuxan os Ventos, Gaiteiros de Lisboa, Treixadura,
Xistra de Coruxo, Cabaquiños de Lovelhe, Amélia Muge, Fran Pérez, Timbila Muzimba, etc.
3º. AFONDANDO NA INTERCULTURALIDADE E NA
TRADICIÓN
A experiencia dá na VII edición de 2001 un salto cualitativo importante: conscientes de
que o modelo de adicar cada edición a unha localidade fronteiriza era limitado e mesmo
demasiado localista, dáse entrada á participación da rede das Escolas Asociadas da UNESCO e
proponse como tema de traballo, para ese curso escolar, un proxecto educativo da UNESCO: “A
Rota do Escravo”. A proposta permitiu abordar a escravitude en todas as súas formas, dende o
punto de vista histórico e dende o punto de vista actual, realizándose traballos de moi fondo
calado e moita importancia para a actividade. A “Rota do Escravo” reafirmou unha estrutura
triangular entre centros educativos de Europa, América e África e axudou a construír o futuro
perfil da experiencia de comunicación na que se reforzará esta perspectiva transatlántica.
Proba disto foi a videoconferencia realizada nesta edición entre os estudios de Salvaterra de
Miño, o colégio Arco Iris de Maputo e o colégio Pedro II de Rio de Janeiro. Comenzou tamén
neste ano a colaboración de Ponte...nas ondas! coa Radio Galega, despois dunha etapa de
“esquecemento” premeditado por parte desta radio pública.
No ano 2001 a UNESCO falla as primeiras Obras Mestras do Patrimonio Oral e
Inmaterial e o eco destas proclamacións chega ao entorno de Ponte...nas ondas! que decide
dedicar a VIII edición do ano 2002 ao Patrimonio Oral e Inmaterial.
A experiencia de edicións anteriores puxo en evidencia no ámbito educativo a existencia
dunha cultura común entre Galiza e Portugal, a pervivencia dun sustrato cultural aínda vivo
entre amabas comunidades e con múltiples expresións.
Desta praxe naceu a proposta de abordar nesta edición o patrimonio oral e inmaterial galego-
portugués nos centros educativos participantes e expoñer os traballos na VIII Xornada de
Radio Interescolar. A proposta tivo unha grande difusión en todas as escolas participantes,
escollendo cada unha un apartado específico deste patrimonio.
Nese ano realizáronse nas escolas exposicións, murais, recolleitas de adiviñas, xogos
tradicionais, receitas de menciña tradicional.... e un amplo abano de actividades impulsadas a
partir desta iniciativa.
Na dinámica de todo este traballo, a Asociación Cultural e Pedagóxica Ponte...nas ondas!
toma a decisión de iniciar a partir deste mesmo ano os trámites para presentar diante da
UNESCO a Candidatura de Patrimonio Inmaterial Galego-Portugués, para que este organismo
declarase este patrimonio cultural común como Obra Mestra da Humanidade. A complexidade
da tarefa fixo que se establecese o horizonte da terceira proclamación, prevista para o 2005,
como marco dos traballos.
A edición do 2002 rexistrou a incorporación á programación da Emisora Educativa ECCA
de Vigo o que nos permitiu alongar o “espacio aéreo” e chegar até esa importante cidade
aumentando así o radio de cobertura e a audiencia potencial.
Iníciase tamén a rede de escolas, asociacións, concellos e entidades promotoras da
Candidatura. Todos estes apoios vanse incorporando á redacción do dosier que se remitirá á
UNESCO.
Dende este ano 2002, e para reforzar o traballo arredor do patrimonio immaterial, comézase
unha nova faceta: a realización de actividades de dinamización cultural sobre este patrimonio.
Nace así a Mostra da Oralidade Galego-Portuguesa, evento pensado para mostrar e dar a
coñecer o patrimonio inmaterial galego-portugués. A 1ª Mostra da Oralidade Galego-
Portuguesa celebrouse no teatro Caixanova de Vigo o 13 de abril de 2002 e contou cos máis
importantes artistas e músicos de Galiza e de Portugal.
Artistas participantes:
Grupo de Concertinas do Alto Miño, Malvela, Grupo Río, Os cavaquinhos de Lovelhe, Xistra de
Coruxo, Uxía Senlle, Susana Seivane, Guadi Galego, Uxía Pedreira, Mercedes Peón, Paula
Carballeira, Mini e Mero, Pancho Álvarez, Augusto Canario, Luis Caruncho, Pinto D´Herbón,
Alberto Mbundi.
No ano 2003 continuose traballando co patrimonio común. Foi o curso lectivo onde se
produciu o afundimento do petroleiro Prestige nas costas galegas. O mar entra nas aulas e na
sociedade en forma de catástrofe. Ponte...nas ondas! non podía permanecer allea, e así, para
continuar co noso traballo arredor do patrimonio inmaterial, decidimos centrar o traballo nesta
edición na cultura marítima galego-portuguesa.
Da man da Federación Galega pola Cultura Marítima convocamos unha xeira de
conferencias e exposicións nas que expertos das dúas beiras do Miño informaron e ilustraron
sobre toda esta temática ao profesorado que levou ás aulas a semente do que sería a
programación da IX edición.
A riqueza e variedade dos traballos que se fixeron deixa translucir a importancia e o
interese que existía sobre o tema, como o mostran, algúns dos títulos dos programas: Unha
escola no fondo do mar, O mar non está lonxe, Pesca en Ponte...nas ondas!, Contamos co mar...
Pero outro feito importante ocorreu neste ano 2003: a incorporación da Universidade á
experiencia, que até o momento se sostiña coa participación de escolas de infantil, primaria e
secundaria. Pechábase así o círculo do ensino e Ponte...nas ondas! convertíase nunha expereincia
tranversal a todo o sistema educativo.
Alumnado dos dos Campus de Ourense e Pontevedra da Universidade encargáronse de
por en pé toda a programación nocturna de Ponte...nas ondas!, dende as cero horas até as 10
da mañá do día seguinte. Non só se pechaba o círculo das etapas educativas senón que tamén
pechabamos a primeira programación de 24 de horas de emisión en directo integramente
realizadas por xoves desde 3 anos até os 24 anos.
Dáselle continuidade á realización da II Mostra da Oralidade Galego-Portuguesa que
se celebrou o 9 de maio de 2003 no Pavillón do Berbés en Vigo baixo o lema “Mar da
Oralidade”. Presentado por Xurxo Souto, participan: Quempallou, Retrincos, Lugnasad, Puta
Miseria (Galiza), Na Virada (Galiza-Brasil), Ronda (Portugal), Batuko Tabanka (Cabo Verde),
Renato Spencer (Brasil), Alberto Mbundi(Angola).
Ponte...nas ondas! tivo sempre unha connotación de interculturalidade, aproximando
aos pobos galego e portugués, lindantes xeograficamente, mais distantes en interaccións e
intercambios. Con esta nova dimensión da experiencia, o interculturalismo pasa a ser un
principio fundamental, tal como o conciben diversos autores, agora que xa é obxecto de moitas
análises e experiencias educativas. Compartimos o concepto que defende Sales i Ciges,
(1998:274): “interacción dialógica entre culturas, en un clima democrático que defiende el
derecho a la diversidad en el marco de la igualdad de oportunidades, flexibilizando los modelos
culturales que se transmiten en la escuela”.
Ponte...nas ondas! foise aproximando a esta concepción de educación intercultural. En
primeiro lugar, ampliando o número de países participantes, que a través de Internet, ou de
conexións telefónicas, realizan a súa programación radiofónica co mesmo obxectivo xeral de
comunicar pobos e culturas (nas últimas edicións, países de África e América). Ao redor do
tema que protagonizou as edicións oitava e novena, recomendábase especialmente aos
participantes mostrar elementos do patrimonio inmaterial dos diferentes países de expresión
galego-portuguesa (Galiza, Portugal, Brasil, Cabo Verde, Guiné-Bissau Angola, Mozambique e
outros nos que a emigración galega ou portuguesa tivese colectivos importantes, como é o caso
de Arxentina. País que se incorporou tamén na novena edición de Ponte...nas ondas!, divulgando
a experiencia a través de 150 emisoras agrupadas na Asociación Internacional de Radios
Escolares (AIRE).
E, en segundo lugar, respondendo, cada vez máis, ao concepto elaborado a partires dos
traballos de Aguado Odina (1996) e os de Sales i Ciges (1998), e outros que se poden agrupar no
mesmo paradigma sociocrítico: educación, dirixida a toda a poboación, non pensada
específicamente para os grupos de culturas minoritarias ou colectivos inmigrantes en situación
de conflito social, desde o convencemento de que a formación dunha conciencia intercultural é
unha cuestión de educación social da cidadanía no seu conxunto e non só daquelas persoas ou
grupos que padecen en maior medida a inexistencia deste tipo de educación. Trátase dunha
educación orientada á transformación social.
Esta última idea ten a súa máxima expresión na edición de 2003, ao ter como tema
monográfico a cultura inmaterial relacionada co mar. Os máis de cincuenta programas
elaborados abordaron a tradición oral relacionada co mar, pero non puido obviarse o presente
dos pobos mariñeiros, teñido por unha ampla marea negra, non só de tipo físico senon tamén de
tintes político-sociais. Tampouco foi allea á creatividade infantil o fenómeno migratorio de
galegos e portugueses que embarcaron sen rumbo fixo desde os distintos portos de mar, como
polo numeroso colectivo de inmigrantes que chegan de manera legal ou ilegal ás nosas costas. O
expoñente máis visíbel da experiencia intercultural, vivida en Ponte...nas ondas! deste ano, foi a
participación, no festival Mar da Oralidade, de Batuko Tabanka, un grupo de música popular
composto por un colectivo de caboverdianas residentes na localidade luguesa de Burela. O seu
nivel de integración na sociedade galega reflíctese na súa participación nas eleccións, formando
parte incluso de algunha candidatura ao Concello.
4º. UNHA DÉCADA E PRIMEIROS RECOÑECEMENTOS
A X edición de 2004 foi unha edición especialmente importante. Este ano producíronse
varios feitos trascendentais para a experiencia: continuáronse cos traballos de promoción da
Candidatura de Patrimonio Inmaterial Galego-Portugués á UNESCO, realizouse a exposición “10
anos unidos nas ondas ” e obtívose un recoñecemento europeo.
No tocante á Candidatura, consíguese un logro histórico: a presentación do dossier da
Candidatura de Patrimonio Inmaterial Galego-Portugués, baixo o título de “As tradicións
orais galego-portuguesas,“ na sede da UNESCO en París o 31 de setembro de 2004, por parte
de representantes de Ponte...nas ondas!, xunto con responsábeis dos gobernos español e
portugués. A primeira Candidatura de Patrimonio Inmaterial promovida por centros educativos
de dous países. Este acto constituiu unha importante meta alcanzada por parte dunha modesta
Asociación Cultural e Pedagóxica que conseguiu que dous Estados apoiasen unha iniciativa nacida
no ámbito educativo e que levaba o apoio da sociedade civil non só de Galiza e Portugal senón
tamén doutros ámbitos onde este patrimonio está presente. Ao mesmo tempo, cumpríanse
tamén os vellos soños dos galeguistas e intelectuais portugueses de achegamento cultural e
entre Galiza e Portugal e de promoción da cultura común galego-portuguesa. Marcábase un fito
nas relacións entre os pobos galego e portugués .
O EBLUL (European Bureau For Lesser Used Languages), organismo consultivo da Unión Europea
e da UNESCO que se encarga de estudar e defender as linguas minoritarias, convidou a
Ponte...nas ondas! a presentar a experiencia na asemblea do ano 2004, que tivo lugar en
Flesbourg (Alemaña). No Plenario do EBLUL, acordouse, por unanimidade, que a actividade
realizada era merecedora do maior recoñecemento, como experiencia innovadora que axuda á
consolidación e desenvolvemento dunha lingua minoritaria e recoñeceu a experiencia como
“modelo de boas prácticas”.
Outra actividade importante realizada neste ano 2004 foi a exposición conmemorativa
dos dez anos de Ponte...nas ondas! Lonxe quedaba aquel 29 de marzo de 1995 ano no que se
poñía en marcha a I Xornada “Experimental” de Radio Interescolar. Realizouse unha exposición
retrospectiva con todos os materiais do arquivo para ter unha visión da evolución da
experiencia. O resultado final foi unha exposición multimedia que mostrou o que foi o espíritu e
a praxe de Ponte...nas ondas!
A exposición “ 10 anos unidos nas ondas ” inaugurouse o día 4 de maio no Museo Verbum de
Vigo e estivo itinerando por diversas localidades de Galiza e Portugal e finalizou a súa andaina
no Congreso “A fenda dixital ” sobre novas tecnoloxías e educación celebrado en Silleda no ano
2005.
Con motivo deste décimo aniversario, e a través da participación en Ponte...nas ondas! do
artista brasileiro Chico César, que estaba a levar a cabo un interesante labor social no Paraiba
coa creación dun Instituto Cultural chamado Casa do Béradêro, onde rapaces e rapazas con
poucos recursos aprendían música, un grupo de 18 alumnos e alumnas, un profesor e unha
profesora, foron convidados a compartir experiencias con xoves galegos e portugueses. Era a
Orquestra “Gente que Encanta” do Instituto Béradêro. Nas súas actuacións achegaron mostras
da presenza da cultura galego-portuguesa no Brasil.
Despois desta visita, iniciáronse contactos para establecer un programa de cooperación tanto
co Instituto Beradero como co Proxecto de integración social Amatreco de Río de Janeiro con
quen tamén se estableceron contactos de colaboración.
Realizouse a terceira Mostra da Oralidade Galego-Portuguesa no Teatro Principal de
Pontevedra, que alcanzou a súa terceira edición, o día 9 de maio de 2004 baixo o lema “Do
Miño...Minhoteiro!”
As colaboracións con músicos e artistas sempre foron fluídas e tiveron neste 10º
aniversario unha excelente mostra co tema musical e o videoclip que gravaron o grupo
Treixadura de Galiza e os Gaiteiros de Lisboa de Portugal. Unha melodía do patrimonio común
foi a escollida: “A chula da Póvoa” en Portugal ou a “Nosa Señora da Guía” na Galiza foi gravada
en exclusiva e serviu para mostrar ás novas xeracións que o patrimonio común segue a manter a
identidade galego-portuguesa.
No ano 2005 a XI edición de Ponte...nas ondas! estivo marcada pola presentación da
Candidatura de Patrimonio Inmaterial diante da UNESCO e por ser o ano da súa posíbel
proclamación. Os traballos adicionais, o desenvolvemento do labor nos centros educativos e a
preparación da XI Xornada de Radio Interescolar que tivo lugar o día 6 de maio constituiu un
esforzo considerábel para a Asociación.
Realizáronse, a petición da UNESCO, durante este curso escolar diversos traballos de
revisión e ampliación de documentación para o dosier da Candidatura e mantivéronse multitude
de contactos e traballos de divulgación.
Realizouse a elaboración dunha revista divulgativa da Candidatura que permitiu a
difusión masiva dos obxectivos e os contidos da Candidatura en Galiza e en Portugal.
Neste curso presentouse tamén a páxina Web da Candidatura, www.opatrimonio.org para
divulgar a través da rede a iniciativa. Ao mesmo tempo fixéronse roldas de presentación da
Candidatura en centros de ensino, concellos, institucións así como asociacións de todo tipo,
ofertando a posibilidade de constituirse en entidades promotoras ás institucións e asociacións
que así o desexaran.
As actividades propias da XI edición de Ponte...nas ondas! comenzaron os días 29 e 30
de abril coa celebración da IV Mostra da Oralidade Galego-Portuguesa que tivo lugar en
Paredes de Coura. A Mostra foi concebida como unhas xornadas completas de apoio á
Candidatura. Ao longo dos dous días desenvolvéronse xogos tradicionais infantís, demostración
de construcións de maios galegos e de maias portuguesas, diversas exposicións e conferencias,
proxeccións de películas e un serán tradicional.
O día 6 de maio realizouse a XI Xornada de Radio Interescolar Ponte...nas ondas!.
Alumnado de 52 escolas, institutos e universidades galegas, portuguesas, cubanas e brasileiras
participaron realizando os seus programas. Unha programación de 24 horas realizada desde
nove estudios de radio e desde a Radio Galega.
A formulación da actividade foi a mesma de anos anteriores. Cada escola, instituto ou
facultade da Universidade escolleron, ao principio do curso, o tema que desexaron traballar,
relacionado con algún aspecto do Patrimonio Oral e Immaterial, simbolizado nunha árbore de
cinco pólas que representaron os ámbitos recollidos na Candidatura.
Así, estudáronse e elaboráronse materiais sobre os curros, as cantigas tradicionais, o entroido,
os oficios, os contos, os refráns… que despois se concretaron nos programas radiofónicos que,
adoptando todos os formatos da radio convencional (debates, entrevistas, enquisas, etc.),
saltaron ao ar o 6 de maio de 2005.
Nesta edición, a rede de emisoras participantes na experiencia medra, incorpórase a
Radio Montalegre de Portugal, estendendose a ponte pola “raia seca”.
Os estudios de radio desde os que se realizou a programación foron:
Rádio Ecos da Raia de Monçao.
Rádio Ines Negra de Melgaço.
Rádio Cultural de Vilanova de Cerveira.
Rádio Montalegre-Montalegre
Radio Municipal de Tui.
Radio ECCA de Vigo.
Radio Allariz.
Emisora Escolar Casa da Cultura de Salvaterra de Miño.
Radio Galega.
CMHW La Reina Radial del Centro de Cuba.
A maiores, a emisión puido seguirse a través de Internet desde a Web: www.pontenasondas.org.
5º. O COMPROMISO COA CANDIDATURA DE
PATRIMONIO INMATERIAL GALEGO-PORTUGUÉS
O compromiso coa Candidatura levou tamén neste ano a organizar un gran encontro do
patrimonio inmaterial no que se resumiran e visualizaran algúns dos aspectos presentes na
proposta presentada á UNESCO. Así, promoveuse a organización dunhas xornadas tituladas
“GALIZA E NORTE DE PORTUGAL: 1 PATRIMONIO PARA O FUTURO” que tiveron lugar na
localidade de Melgaço o 3, 4 e 5 de xuño. En diferentes lugares da vila portuguesa recreáronse
ambientes que fixeron posíbel que durante esa fin de semana o patrimonio tradicional fora
visibilizado por galegos e portugueses.
Exposicións de embarcacións fluviais e marítimas, proxeccións de documentais sobre artes e
oficios, demostracións ao vivo de oficios tradicionais: cesteiros, canteiros, selleiros, palilleiras,
ferreiros, oleiros…, xogos tradicionais infantís e xuvenís, exposicións de maios, gastronomía
tradicional nos restaurantes da vila, celebración de diversos debates e reunións sobre o estado
de conservación do patrimonio e a pertinencia do seu mantemento, etc.
Celebráronse dúas mostras sobre a tradición oral. A primeira agrupou ás manifestacións do
ciclo festivo e tivo os seguintes contidos:
Os romances de cego: Mini e Mero do grupo A Quenlla.
Os cantores beiroes: María Xosé e Alafun.
As regueifas galegas: Luís Caruncho e Augusto Canario.
As melodías ao norte do Miño: Gaiteiros de Xistra.
Os gaiteiros: Os Terribles de Donas.
As melodías a sul do Minho: Cantares do Minho.
As melodías do Miño: Galiza-Portugal.
A segunda mostra tivo abarcou as expresións sobre “Os ciclos do ano, da vida e do traballo”
e tivo as seguintes compoñentes:
O natal: Cantos de reis e janeiras de Galiza e Portugal.
O entroido: O folion e os boteiros de Vilariño de Conso.
A cuaresma: A serraçao da velha de Afife.
Os maios: Os maios de Ourense.
As festas: Os gaiteiros de Gave, Melgaço.
Os bailes: Rusga de San Vicente de Braga.
Os xogos: A roliña de Vilar de Cabeiras, Arbo
A voda: Regueifa da Voda de Santa Comba
Os traballos: O linho de San Pedro do Sul e o millo de Mondariz.
Os seráns: Cantos de pandeiro de Soutomaior, Cantos de adufe de Tras-Os-Montes
As danzas: Os ranchos de reis de Guláns de Ponteareas e de Salceda de Caselas e os Pauliteiros
de Miranda do Douro.
Estas xornadas, inauguradas pola Ministra de Cultura de Portugal, D.Isabel Pires de
Lima, tiveron unha notábel trascendencia como así o acredita a gran cantidade de público que
asistiu a cada un destes acontecementos e unha importante repercusión mediática tanto nos
medios de comunicación galegos como portugueses.
Outra das actividades promovidas como apoio explícito á Candidatura foi o Proxecto
Meniños Cantores.
Ponte...nas ondas! abre a porta a unha nova faceta: a edición e o traballo audiovisual.
Dende o ano 2001 no que se comeza o traballo co Patimonio Oral e Inmaterial, no campo
da música abríase un grande terreo no que traballar, e así o entenderon moitas das escolas, que
escolleron este tema para desenvolver as propostas de Ponte...nas ondas!
O reto e o gran desafío que se acometeu neste curso foi reunir, editar e gravar un
proxecto conxunto que recrease a tradición musical abordada desde escolas galegas e
portuguesas e servise para dar visibilidade ao compromiso das escolas con este patromonio.
O proxecto pasou por moitas dificultades, pola complexidade de coordenar a un
grande número de persoas e, fundamentalmente, polo seu custe económico que facía que as
posibilidades da Asociación se visen desbordadas e que fose preciso buscar recursos alleos, o
que retrasou moito e, ás veces puxo en serio perigo a súa realización. Con tesón e traballo
conseguiuse que 19 centros educativos galegos e portugueses se involucraran no proxecto. O
estudio de gravación Casa de Tolos en Gondomar foi o aliado imprescindíbel que fixo que ao
longo do curso 2004/05 se realizase todo o traballo. O resultado foi un disco-libro-dvd que
contén:
- Un CD con:
• 32 cancións.
• Unha pista interactiva con fotos, letras e partituras.
- Un DVD con:
• Un documental de 60´ con mostras do Patrimonio Inmaterial Galego-Portugués.
• Vídeoclips de cada un dos centros educativos.
• Un videoclip do tema central “Mais Perto” gravado por 500 xoves na ponte entre Tui e Valença do Minho.
• Un making off de 60 ´ de como se fixo o traballo.
• Karaokes dos temas do disco.
- Un LIBRO (en catro idiomas) con:
• Fotografías dos lugares de procedencia, o centro, os grupos de alumnos, ensaios, gravacións, etc.
• Textos dos temas e referencias á súa orixe, tradicional ou de creación, contexto, xénero, estilo, etc.
Neste traballo colaboraron músicos e artistas de Galiza e do Norte de Portugal. O prólogo do
libro é de Suso de Toro. A letra do tema central Máis Perto é de Uxía Senlle e a música é de
Segundo Grandío.
No mes de xuño de 2005, Ponte...nas ondas! reúne aos cincocentos participantes en Meniños
Cantores na vella ponte de Tui e Valença e alí gravouse o vídeo-clip do tema central Máis Perto,
composto especialmente para este proxecto por Uxía Senlle e Segundo Grandío.
Ponte...nas ondas!, como promotora principal da Candidatura, fixo ademais neste ano un
intenso traballo a prol da divulgación da Candidatura de Patrimonio Inmaterial Galego-
Portugués participando en actos por todo o territorio galego e de Portugal, mesmo facendo
presentacións desta Candidatura en Barcelona, Madrid, Bruxelas, Lisboa e París.
6. A CONTINUIDADE
A XII edición 2006: OS SONS DA PONTE
Ponte...nas ondas! voltou unir as voces dos tres continentes na xornada radiofónica do 26 maio
de 2006 reafirmando a fórmula que consolidou a experiencia de comunicación: a educación, a
cultura, os medios de comunicación e as novas tecnoloxías.
Recibe dous novos recoñecementos: O Premio Galicia de Comunicación 2005 por parte da
Xunta de Galiza e o premio Os Bos e Xenerosos por parte da Asociación de Escritores en
Lingua Galega.
A XII edición tivo como lema Os sons da Ponte e contou novamente coa participación de
centros educativos dos tres continentes ( Africa, América e Europa ) e con artistas
representativos da cultura galego-portuguesa que comparten unha mesma sonoridade e
expresión.
Colaborou na experiencia radiofónica o grupo Timbila Muzimba de Maputo ( Mozambique )
cuxos sons e o ritmos da Timbila ( unha especie de xilófono de madeira ) viñan de ser
proclamados como Obra Mestra do Patrimonio Inmaterial nas últimas proclamacións da
UNESCO. Neste caso a "timbila" (o xilofone africano) xúntase ao "muzimba" (o corpo que sente
e exterioriza o son creado) nun espectáculo de cruzamento de sonoridades tradicionais e
contemporáneas.
O grupo Timbila Muzimba impartiu obradoiros nos centros educativos galegos e portugueses e
actuou na V Mostra da Oralidade Galego-Portuguesa.
De Portugal chegou nesta ocasión a colaboración dunha persoa polifacética e de orixe
mozambicana como Amélia Muge. Desde o principio, a súa carreira musical foi en constante
desenvolvemento, integrando diversas formas de expresión artística e cultural, intentando a
unión entre música e educación, a través da comunicación. Amélia Muge xa tiña realizado
algunha colaboración con grupos galegos como Camerata Meiga ou con Amancio Prada. Nesta
ocasión, gravou para a ocasión, xunto co galego Narf unha versión do poema Eu levo unha pena
de Rosalía de Castro.
E do Brasil estivo na xornada radiofónica a voz de Luanda Cozetti, filla de Alipio de Freitas.
Desde o seu Rio de Janeiro trouxo os sons do seu último traballo musical Puro co baixista
Norton Daniello. Luanda Cozetti ten unha intensa vida asociada á loita do seu pai, Alipio de
Freitas, obxecto dunha letra de José Afonso. Luanda Cozetti e Norton Daniello gravaron para
esta edición unha versión do tema tradicional común O alecrim.
E da Galiza máis emerxente e máis creativa estivo en Ponte...nas ondas! a voz e o talento de
Narf ( Fran Pérez ) . O último traballo de Narf, Bumba, está directamente vinculando aos
Timbila Muzimba. A Banda de Poi aportou a Ponte...nas ondas! o seu traballo de colaboración con
músicos portugueses.
A programación de Ponte...nas ondas! contou coa participación de grupos de xoves de Cuba,
Brasil ou Cabo Verde e con alumnos de escolas primarias, secundarias e das Universidades de
Vigo, Santiago e Tras-Os-Montes. E para completar todas franxas de idade, sumáronse ás 24
horas de programación un grupo de alumnado da Universidade Senior de Chaves.
Festival da Oralidade OS NOSOS SONS:
Unha proposta para os centros educativos
Máis de 1.500 xoves encheron a Carpa da Cultura Circula para asistir ao Festival da Oralidade
que Ponte...nas ondas! organizou para os centros educativos do Sur de Galiza e do Norte de
Portugal.
Centros educativos de primaria e secundaria de Tui, Ponteareas, Pontevedra, O Porriño,
Salvaterra de Miño, Salceda de Caselas, Vigo, Gondomar, As Neves, Tomiño, Monçao, Melgaço e
Valença do Minho déronse cita nesta primeira iniciativa destinada especificamente aos centros
educativos.
Este festival estivo organizado xunto co Concello de O Porriño, o Xacobeo e a
Consellaría de Cultura na Carpa de A Cultura Circula. Aproveitando a súa instalación en O
Porriño, desde Ponte...nas ondas! promóveuse por primeira vez un festival da oralidade
destinado especialmente para os centros educativos de primaria e secundaria dos dous lados da
fronteira.
O patrimonio inmaterial galego-portugués continúa a marcar as actividades de Ponte...nas
ondas! Nesta ocasión tratouse de achegar aos xoves as novas sonoridades deste patrimonio. O
relato oral interpretado polo narrador e actor Avelino González, as proxeccións audiovisuais que
recollen os sons dos portadores do patrimonio por todo o territorio, a tradicional regueifa e os
cantos ao desafío da man de Luis Caruncho e Augusto Canario, a nova voz musical de Toñito de
Poi, os sons do grupo Loreta Martin. E, para rematar, unha animación da man de Locamotora.
V MOSTRA DA ORALIDADE GALEGO-PORTUGUESA
A V Mostra da Oralidade Galego-Portuguesa desenvolveuse o 3 de xuño de 2006 na Praza de San
Sebastián no Porriño.
Abriu o festival o actor e narrador oral Avelino González quen ao longo da noite foi relatando
algunhas singularidades compartidas entre galegos e portugueses.
Comezou a música do Brasil da man do dúo Couple Coffee que presentaron unha innovadora
formación de baixo acompañando a magnífica voz de Luanda Cozetti.
De Portugal chegou a voz de Amélia Muge, mozambicana de orixe, quen presentou unha completa
formación músical e ofreceu un repertorio especial no que non faltou a versión do tema de Rosalía
de Castro “Eu levo unha pena” que interpretou con Fran Pérez e que compuxeron ambos para a XII
edición de Ponte...nas ondas!
O momento de maior intensidade viviuse coa interpretación do “Cantar Galego” por parte de
Luanda Cozetti ( Brasil ) , Uxía ( Galiza ) e Amélia Muge ( Portugal ).
E para poñer fin á Mostra da Oralidade, o espectáculo Bumba, unha fantástica ensamblaxe entre a
formación de Narf ( Galiza ) e os Timbila Muzimba ( Mozambique ). Unha intensa e plástica
actuación que achegou as augas do Atlántico ás do Índico onde a comunidade dos Chopi Timbila
forman as agrupacións de timbilas. Narf ofreceu un traballo moi interesante de mestizaxe e fusión
entre a súa proposta musical e os ritmos africanos Moçambique.
Unha vez máis, o patrimonio común foi o nexo de unión que expresou toda a súa sonoridade a
través de OS SONS DA PONTE na V Mostra da Oralidade Galego-Portuguesa.
A XIII edición 2007: NA REDE DO PATRIMONIO
Máis de 50.000 alumnos de centros educativos de Galiza e Portugal así como de Colombia, Brasil
e Estados Unidos participaron na XIII edición, celebrada o 1 de xuño de 2007. A nova
experiencia radiofónica interescolar, que dá continuidade á liña de traballo iniciada no 2002
para impulsar a candidatura do patrimonio inmaterial galego-portugués á Unesco, deu un salto
cualitativo coa emisión de televisión a través da rede realizada pola Televisión da Universidade
de Vigo.
Os estudios da Radio Galega en San Marcos foron o escenario no que deu comezo a XIII edición
do Ponte... nas ondas! Esta vez foron máis de 50.000 os alumnos de primaria, secundaria e
universitarios que traballaron durante o curso académico para encher de contido a grella con
programas variados entre os que se incluíron noticiarios, música, contacontos e espazos
dedicados ao mundo dos oficios tradicionais, a regueifa ou a poesía.
Esta edición constituiu unha aposta decidida por converter a internet na “praza pública de
intercambio e a feira do patrimonio onde se trocaron os traballos producidos polo mozos”. A
aposta pola rede e a posta en valor do patrimonio son dous aspectos que están contemplados no
PEGSI ( Plano Estratéxico da Sociedade da Información ) elaborado pola Consellaría de
Industria.
En 1998, e de xeito pioneiro, a xornada radiofónica fixo unha primeira emisión de vídeo e audio
a través da rede. Posteriormente optouse por emitir tan só o son. Dende aquela, a evolución que
experimentou Ponte... nas ondas! correu parella aos avances nas novas tecnoloxías. Este ano, os
internautas puideron non só escoitar senón tamén ver ao verdadeiros protagonistas da cita.
O Auditorio da Facultade de Telecomunicacións de Vigo, convertido no epicentro das emisións,
acolleu o festival radiofónico no que participaron grupos procedentes da cultura tradicional
galega e portuguesa como Malvela, Sergio Gordinho e Lenine. O brasileiro realizou para a
ocasión unha versión do tema A ponte. A Sra. Carme do grupo Malvela cantou para a ocasión un
tema tradicional a xeito de cuña radiofónica.
VI MOSTRA DA ORALIDADE GALEGO-PORTUGUESA
No marco da Mostra do Patrimonio Inmaterial Galego-Portugués realizada no mes de novembro
en Pontevedra por parte da Consellaría de Cultura, o Concello de Pontevedra, o proxecto Ronsel
e Ponte...nas ondas!, realízase unha nova mostra do património común galego-portugués coas
seguintes actuacións:
-Pauliteiros de Sendim (Terra de Miranda, Tras-os-Montes, Portugal)
-Caretos de Podence (Portugal)
-Zés Pereiras de Vilaverde-Braga
-Suso e Antonio de Xornes (Ponteceso)
-Charanga de Ultreia
-Pandereteiras e gaiteiros de Pontecaldelas, Toutón, A Ermida e
Gargamala.
7. UNHA INICIATIVA INÉDITA E NECESARIA
Ponte...nas ondas! é, no contexto das comunidades fronteirizas, especialmente entre
España e Portugal, unha iniciativa que superou o inicial ámbito educativo-pedagóxico para
constituír un exemplo de proposta cultural de superación de fronteiras “mentais” unha vez
ultrapasadas as barreiras físicas e políticas entre Galiza e Portugal.
O labor de dinamización realizado desde a comunidade educativa e proxectado para
toda a sociedade constitúe o espello onde a actividade do colectivo ten brillado. Desde e
primeira inicitiva da xornada de radio interescolar á presentación diante da UNESCO dunha
candidatura multinacional de Patrimonio Inmaterial refrendada polos Estados español e
portugués, as accións realizadas demostran que aínda é posíbel a realización de proxectos
que nacendo da sociedade civil son capaces de conseguir superar obstáculos e barreiras que
unhas veces son máis invisíbeis do que físicas.
Nun proxecto como o de Ponte...as ondas! a educación estaría na dirección adecuada
para favorecer a amizade entre pobos e culturas e para minimizar os efectos da incomunicación,
non só a que afecta aos pobos galego e portugués entre sí, senón a outros pobos que emigran a
Galiza e Portugal, coas súas linguas e culturas que enriquecen o panorama da interculturalidade.
Con esta perspectiva pedagóxica, a experiencia de Ponte... nas ondas! ten que seguir
acendendo novas luces non só no sistema educativo, pois é unha mostra palpábel de calidade,
senón tamén nas relacións sociais e culturais entre galegos e portugueses xunto co resto dos
portadores da cultura galego-portuguesa que se encontran espallados polo mundo.
8. NO CONTEXTO DA RENOVACIÓN PEDAGÓXICA
Ponte...nas ondas! súmase na década dos noventa ao movemento de renovación
pedagóxica, que foi arraigando na educación galega e portuguesa ao longo do século XX, no
medio dos atrancos que a realidade sociopolítica e a inercia dos sistemas educativos ían
colocando no camiño.
Sen ánimo de ir moi lonxe na procura das raíces deste momento moderno de cambio
educativo, podemos iniciar no primeiro tercio do século XX, no marco da organización
internacional da Escola Nova, favorecida en Portugal pola proclamación da primeira República
(1910), e no Estado Español polo rexeneracionismo cultural e pedagóxico que xurdiu, a pesares
das circunstancias políticas adversas, co pulo da I.L.E. ( Institución Libre do Ensino ).
O movemento da Escola Nova e activa, por un lado, e os movementos pola Paz na Escola
poden estar nas orixes das ideas e das prácticas que hoxe defende e practica Ponte...nas ondas!
No Estado Español, a primeira metade da década dos trinta propiciou o escenario ideal
para a profundización teórico-práctica nas formulacións deses dous movementos. En Portugal,
pesares do retroceso democrático acontecido a finais dos vinte coa dictadura de Salazar, aínda
puido desenvolverse unha pedagoxía mais renovadora, como foi a iniciada en Francia por Celestín
Freinet, e introducida en Portugal por Alvaro Viana de Lemos.
A pedagoxía Freinet, que se reorganizaría despois da II Guerra Mundial, recolle
elementos da escola activa, da escola internacional e pola paz, e ademais achégase moito máis ao
pensamento de Ponte...nas ondas!, pola idea de inserción no entorno sociocultural lindante.
Efectivamente, cuns anos de adianto en Portugal con respecto a Galiza, o freinetismo foi a
plataforma para a construción dunha nova escola no fin das longas dictaduras de Franco e
Salazar.
A partires do 25 de abril en Portugal e da transición democrática no Estado español, o
movemento pedagóxico é plural, aínda sen contar a intensidade adquirida no primeiro tercio do
século XX. Son moitos os sindicatos, movementos de renovación pedagóxica, movementos de
educadores e educadoras pola paz os que tentan introducir novos paradigmas críticos na
educación.
Podemos sinalar unha novidade con respecto a outros movementos históricos. Mentras
daquela os renovadores galegos e portugueses ollaban para Europa por separado, tomando como
referentes o Instituto J. J. Rousseau, de Xenebra, ou a Cooperativa de Ensino Laico
freinetiana, ou mais recentemente as Escolas de Verán Rosa Sensat en Cataluña, agora
procúrase un diálogo previo transfronteirizo entre Galiza e Portugal, entre educadores/as,
pertencentes a realidades administrativas diferentes, mais unidos por unha realidade cultural e
lingüística moi semellante, alomenos entre o Norte de Portugal e Galiza. Este diálogo tíñase
producido nos anos 20 e 30, mais desde plataformas diferentes ás da renovación pedagóxica.
No panorama recente, o caso máis claro de aproximación é o protagonizado pola
AGAL, aínda que prioriza o debate lingüístico fronte ao debate da renovación pedagóxica. Neste
plano foi a Asociación Sociopedagógica Galego-Portuguesa (ASPGP), escindida da Asociación
Sociopedagóxica Galega (ASPG), no ano 1983, quen deu un primeiro paso. Unha das claves da
escisión foi tamén o debate político-lingüístico, chegando a manter uns anos en paralelo dúas
revistas co nome de O Ensino, e Xornadas do Ensino paralelas ás Jornadas do Ensino. A pesares
desta opción nominal e lingüística, non consta que ao longo de mais de 20 anos, se teña avanzado
na integración de profesorado renovador de Portugal e Galiza.
Por iso, este encontro da educación galega e portuguesa hai que buscalo noutras
iniciativas, como a de Ponte...nas ondas!, nacida no ano 1995. Iniciativa que constitúe en sí
mesmo unha orixinal e novedosa experiencia entre comunidades educativas de dous países.
Iniciativa pioneira nas diversas facetas da actividade que merece ser estudida e preservada,
coma unha mostra da capacidade de innovación e desenvolvemento do mundo da educación.
PNO= EDUCACIÓN + MEDIOS + CULTURA + NOVAS TECNOLOXÍAS