Die Nuwe Testament en mitologie: Die probleem van die ontmitologisering van die Nuwe-Testamentiese...
Transcript of Die Nuwe Testament en mitologie: Die probleem van die ontmitologisering van die Nuwe-Testamentiese...
Die Nuwe Testament en mitologie: Die probleem van die ontmitologisering van die Nuwe-Testamentiese verkondiging (1941)
Dr Gert Malan
Werkswyse
Die artikel poog om Bultmann self aan die woord te stel oor die
opspraakwekkendste aspek van sy werk, naamlik sy
ontmitologiseringsprogram. Sy 1941-artikel word opsommend
weergegee. Ten slotte volg ’n waarderende evaluering.
Bultmann se motivering
Die grondmotief agter hierdie opstel van Bultmann was om die Nuwe-
Testamentiese verkondiging vir moderne mense te ontsluit. Vir
Bultmann was dit ondenkbaar dat moderne mense, met ’n
werklikheidsverstaan gevorm deur wetenskap en tegnologie en ’n groot
mate van beheer oor hulle lewens, die mitologies woordverkondiging
van die Nuwe Testament sal verstaan en aanvaar. Dit sal ’n
onaanvaarbare prysgawe van die intellek verg. Sy oplossing is om die
Nuwe-Testamentiese verkondiging verstaanbaar te interpreteer, sodat
dit die mense van sy tyd steeds eksistensieel sal aanspreek
(Bultmann 1967:16-21).
Mitiese wêreldbeeld
1
Waarom sou die Nuwe-Testamentiese verkondiging dan vir moderne mense
onverstaanbaar wees?
Die eerste saak wat Bultmann (1967:15-6) noem, is die
drieverdieping mitiese wêreldbeeld wat die denkraamwerk vorm van die
NuweTestament. Dit behels nie alleen die idee dat die aarde die
middelste verdieping vorm, met die hel daaronder en die hemel daarbo
nie. Die aarde as leefwêreld van mense word beskou as oop vir
invloede van die onderste of boonste verdiepings. God en sy engele
kan van bo ingryp in mense se gedagtes en handelinge, maar net so
kan die Satan en sy demone van die onderwêreld af dit ook doen.
Daarby is hierdie tydvak in die mag van Satan, sonde en dood, en
stuur dit ’n spoedige einde tegemoet, wat sal voltrek as kosmiese
katastrofe. Dan volg die opstanding van die dooies en die oordeel
tot verlossing of verdoemenis.
Bultmann praat hier van ’n voormoderne mitologiese
werklikheidsverstaan waardeur gebeure en handelinge verklaar word
aan die hand van ingrype deur God of Satan. Só dink moderne
wetenskaplike mense nie oor die werklikheid nie, en hulle verklaar
ook nie hulle optrede of dinge wat met hulle gebeur so nie. Moderne
mense sal byvoorbeeld siekes dokter toe neem. Hulle sal nie siekte
beskou as die straf van God of die werk van Satan nie. Die mitologie
maak nie vir sulke mense sin nie.
Die heilsgebeure in mitologiese taal weergegee
Van groter belang is die probleem dat die wesenlike van die
verkondiging in die Nuwe Testament, die heilsgebeure, nie net teen
die verwysingsraamwerk van die drieverdieping mitiese wêreldbeeld
geteken word nie; dit word boonop in dieselfde mitiese taal beskryf,
wat volgens Bultmann (1967:15-16) vir hedendaagse mense nie
verstaanbaar is nie. So verkondig die Nuwe Testament:
2
Die laaste dae het aangebreek.
In die volheid van die tyd het God sy Seun gestuur.
Die Seun, pre-eksistente God, verskyn op aarde as ’n mens.
Met sy kruisdood word Hy plaasvervangend tot sondaar gemaak.
So bring Hy versoening vir mense se sonde.
Sy opstanding is die begin van die kosmiese katastrofe
waardeur die dood oorwin word, wat deur Adam gekom het.
Die demoniese magte het hulle krag verloor.
Die opgestane Heer word verhoog tot die regterhand van God.
Hy word Heer en Koning gemaak.
Hy sal terugkeer op die wolke om finaal die oordeel en
verlossing te voltrek.
Met sy koms sal die opstanding van die dooies en die
eindoordeel plaasvind.
Sonde, dood en alle lyding sal ophou.
Die gemeenskap van gelowiges het aan Christus deel deur die
Doop en Nagmaal, en sal aan die verlossing deelkry mits hulle
volhard.
Gelowiges ontvang nou reeds die eerste vrugte hiervan, naamlik
die Heilige Gees as waarborg dat hulle kinders van God is en
sal opstaan uit die dood.
Bultmann (1967:16) wys daarop dat hierdie baie bekende inhoude van
die evangelie in mitiese taal geklee is, wat teruggevoer kan word na
die mitiese werklikheidsverstaan en spreekwyse van die Joodse
apokaliptiek en die Gnostiese verlossingsmite. Nou is die vraag vir
Bultmann of die verkondiging, wat geloof van lidmate vra, eintlik
vra dat lidmate hierdie vergange mitiese prentjie van die
werklikheid moet aanvaar as hulle werklikheid. Indien nie, is die
wesensvraag of die Nuwe Testament dan ’n waarheid bevat wat, los van
hierdie wêreldbeeld as verwysingsraamwerk, verkondig kan word.
3
Indien dit die geval is, het die teologie die taak om die
Christusverkondiging te ontmitologiseer.
Wat mites tot uitdrukking bring
Vir Bultmannverklaar mites die kragte wat op mense inwerk en hulle
lewens begrens, as bonatuurlik. So word ’n mitiese kosmologie of
wêreldbeskouing daargestel wat geld as verklarende
verwysingsraamwerk waardeur mense ’n greep op die bonatuurlike kry.
Dit gebeur omdat mites oor die bonatuurlike in menslike of wêreldse
terme praat. So word die bonatuurlike geobjektiveer tot die
ondermaanse, en daarmee tot iets wat beheer kan word (vgl. Bultmann
1967:23).
Hierdie objektiverende voorstellings van mites versluier en
belemmer die ware intensie van die mite, naamlik om die begrensdheid
van menslike eksistensie tot uitdrukking te bring. Die oortuiging
wat in mites na vore kom, is dat die bekende en verbygaande wêreld
sy oorsprong en betekenis vind in die bonatuurlike wat buite die
bekende en verganklike bestaan. Menslike bestaan in hierdie sigbare
werklikheid word dus voortdurend beheer en bedreig deur bonatuurlike
magte wat dit begrond en begrens. Daarmee saam druk mites uit dat
mense nie in beheer is van hulle lewens en lotgevalle nie, maar
uitgelewer is aan of afhanklik is van die bonatuurlike magte wat die
werklikheid beheer (Bultmann 1967: 22-23).
Mites het dus nie in die eerste plek die bedoeling om ’n
objektiewe prentjie van die werklikheid daar te stel nie, maar om
aan te dui hoedat mense hulleself verstaan binne hulle leefwêreld.
Om hierdie rede behoort mites nie in kosmologiese terme
geïnterpreteer te word nie, maar in antropologiese terme – of beter
nog, in eksistensiale terme. Om oor die buitewêreldse, die
bonatuurlike te praat, beteken om oor die geheel onbekende te praat.
Die enigste manier om dit te doen, is om daaroor te praat na
4
analogie van die bekende, die ondermaanse.Sodoende word die
bonatuurlike magte gebring tot binne mense se bekende leefwêreld,
emosies, motiewe en moontlikhede. So praat mites byvoorbeeld van die
wêreld as ’n wêreldeier of ’n wêreldboom, waarmee mense hulle
samelewingsorde en gebeure daarbinne verklaar en motiveer. Ten einde
mites se bedoeling bloot te lê, naamlikom menslike eksistensie tot
uitdrukking te bring, moet die objektiverende spreekwyse van mites
wat hierdie bedoeling versluier en belemmer, eksistensiaal
geïnterpreteer (ontmitologiseer) word ten einde te verstaan hoedanig
fasette van menslike eksistensie daarmee belig word (Bultmann
1967:22-23).
Ontmitologisering
Die bedoeling daarmee
Miskien is dit jammer dat Bultmann juis die term “ontmitologisering”
gebruik het. Morfologies beskou, suggereer die voorvoegsel “ont-”
dat iets weggeneem word,en die woordstam dui aan dat dit die mite
is. Die indruk word geskep dat ontmitologisering die wegsny van die
mitiese spreekwyse is (Malan 2000:1108). Dit was juis nie Bultmannse
bedoeling nie. Dit is daarom jammer dat die benaming van sy
hermeneutiese program waarskynlik grootliks bygedra het tot al die
agterdog en misverstand oor die aard en bedoeling daarvan.
Die bedoeling met ontmitologisering is om die mitologie na sy
ware intensie te interpreteer, naamlik as uitdrukking van menslike
eksistensie. Daarom wil ontmitologisering niks anders wees nie as
eksistensiale interpretasie. In hierdie opsig steun Bultmann (1967:26-27) op
die werk van Hans Jonas, wat die Gnostiese verkondiging in
eksistensiale terme geïnterpreteer het. Ontmitologisering van die
Nuwe-Testamentiese verkondiging het dus nie met die wegsny of afskil
van die mitologie te doen nie, maar met die vertaling van die
5
dualistiese en apokaliptiese mitiese spreekwyse in eksistensiale
terme ten einde die selfverstaan wat daarin vervat word, tot spreke
te bring.
Ontmitologisering van die Christelike synsverstaan (Seinsverständnis)
Die pertinente vraag is daarom of die Nuwe-Testamentiese dokumente
wel vir ons ’n selfverstaan bied wat ons eksistensie eg bevraagteken
en van ons ’n eksistensiële beslissing verg (Bultmann 1967:27).
Bultmann meen wel so en interpreteer dan fasette van die mities
verwoorde Nuwe-Testamentiese verkondiging kortliks in eksistensiale
terme. Hy onderskei tussen menslike bestaan sonder geloof en
menslike bestaan vanuit geloof.
Menslike bestaan sonder geloof
Hoe lyk menslike bestaan sonder geloof? Hy verduidelik die saak aan
die hand van die begrippe kosmos (wêreld), sarks (vlees) en merimnān
(kommer, besorgdheid).
Hierdie wêreld (kosmos) is wel deur God geskep, maar is saam
met mense uitgelewer en verval onder die mag van die Satan. Tog bly
mense self verantwoordelik vir hulle sonde en sal voor God as regter
rekenskap moet gee. Satan se mag is op vreemdsoortige manier beperk
deur God. Hoewel die dood in die wêreld gekom het deur Adam, die
eerste sondaar, is die dood die loon van elke mens se eie sonde.
Adam was die eerste mens, die eerste vlees (sarks). “Vlees” dui
op die menslike leefwêreld, dus op die sfeer van die sigbare,
beskikbare, beheerbare en meetbare; kortom: die verganklike. Sedert
Adam swig alle mense voor die versoeking om vanuit hierdie sigbare,
6
verganklike werklikheid te leef, eerder as vanuit die onsigbare en
onbeheerbare. “Vlees” verteenwoordig sodoende ’n mag wat beheer
neem van mense, omdat mense dit tot basis van hulle bestaan maak,
ongeag of hulle verantwoordelik of onverantwoordelik sou leef. Selfs
hulle verdienstelikheid is gebonde aan die verganklike en daarom van
geen waarde nie, net soos enige iets anders wat mense verwerf en
waarop hulle vertrou.
Eie aan die verganklikheid is die menslike kommer of
besorgdheid (merimnān) om sekuriteit daar te stel. Na gelang van
elkeen se moontlikhede en suksesse hiermee, kom daar ’n bewussyn van
sekuriteit, waarop mense uiteindelik roem (kauchasthai). Hierdie
gesindheid is eintlik ondenkbaar, gesien die verganklikheid van alle
aardse sekuriteite. Maar juis op hierdie manier verloor mense hulle
“lewe”, hulle outentieke eksistensie, en word hulle prooi van die
verganklike dinge waarop hulle vertrou het en gemeen het om te
beheer. Nou beheer dit húlle lewens en is hulle slawe in diens
daarvan. Dit is met hierdie gesindheid van mense dat die wêreld, wat
God se skepping vir ons kon wees, die geaardheid kry van die wêreld
in opposisie met God, en word die wêreldse dinge waarop ons vertrou,
magte wat van ons beheer neem.
Wat is die gevolge van hierdie gesindheid van mense? Hulle
word, soos die wêreldse dinge waarop hulle vertrou, uitgelewer aan
verganklikheid en dood. Dié wat leef in vertroue op dit wat
beheerbaar en verbygaande is, maak hulleself afhanklik daarvan.
Omdat alle mense dit doen, kom hulle met mekaar in konflik en
probeer elkeen homself beveilig teen ander. Hieruit ontstaan naywer,
woede, jaloesie en stryd, maar ook verdrae en ooreenkomste vir
samewerking en algemeen geldende waardeoordele en standaarde.
Hierdeur skep mense ’n verwysingsraamwerk waaraan ons onsself
voortdurend meet en wat die waardestelsel herbevestig. Só versterk
mense die angsvolle ervaring wat ons vir mekaar geheimhou, naamlik
7
hoedat ons ervaar dat alles, ook ons eie lewe, besig is om van ons
af weg te gly (Bultmann 1967:27-29).
So lyk die eksistensiale interpretasie van die Nuwe-
Testamentiese verkondiging oor die mens se bestaan sonder geloof.
Dit is hierdie magte wat die Nuwe Testament as mitologiese magte
uitbeeld (Bultmann 1967:27-29).
Menslike bestaan vanuit geloof
Hierteenoor, in eksistensiale terme vertaal, verkondig die Nuwe
Testament lewe in vertroue op en vanuit die Onsigbare. Dit kom neer
op die prysgawe van alle selfgemaakte sekuriteite. Dit is lewe
vanuit geloof of lewe “volgens die Gees”. Hierdie soort lewe word
vir mense ’n moontlikheid deur geloof in God se “genade”, menende
die vertroue dat die Onsigbare, Onbekende en Onbeheerbare mense
ontmoet as liefde wat vir hulle lewe en daarmee ’n toekoms skenk,
eerder as die dood (Bultmann 1967:29).
Bultmann verstaan God se genade as sondevergewend. Hy
verduidelik sonde in eksistensiële terme as daardie gesindheid van
mense om hulle lewens te probeer verseker en beveilig deur
sekuriteite daar te stel, daaraan vas te klou en uiteindelik
daarvoor te leef. Juis omdat hierdie gesindheid mense afsluit van
die Onsigbare en die toekoms waarin God Homself aan ons gee, is dit
sonde (Bultmann 1967:29).
Eksistensiaal verstaan, bevry God se vergifnis mense dus van
hierdie afsluiting van God en verknegting aan die verganklike, sodat
hulle vry kan word vir God se toekoms vir hulle. Geloof (wat die
vergifnis aanvaar) is om oop te wees vir God se toekoms. Geloof is
daarom ook gehoorsaamheid, naamlik as die wegdraai van die self,
bedoelende prysgawe van die self en sy verknogtheid aan sekuriteite.
Geloof is die afsweer van enige pogings om self vir God aanvaarbaar
te wees of om uit onsself ware lewe daar te stel. Geloof is radikale
8
onderwerping aan God as die Een wat dooies opwek en dinge daarstel
wat nie voorheen bestaan het nie. Geloof verwag alles van God en
niks van onsself nie. Daarmee word mense bevry van gewaande aardse
sekuriteite en die valse vryheid wat dit beloof (Bultmann 1967:29).
Hierdie vryheid is nie dieselfde as asketisme nie. Gelowiges
onttrek nie aan die wêreld nie. Hulle neem deel aan die dinge in
hulle leefwêreld, maar asof op ’n afstand, asof nie. Gelowiges is
nie meer slawe van aardse dinge nie. Hierdie wêreld is vir die
gelowiges gekruisig en hulle vir die wêreld. Alles van die wêreld
het vir hulle na die agtergrond verskuif as dinge wat geensins
betekenis in sigself het nie. Bultmann (1967:19) gebruik die term
Indifferenz om gelowiges se gesindheid jeens wêreldse dinge mee uit te
druk. Die krag van gelowiges se nuwe lewe kom tot uitdrukking in
hulle swakheid, lyding en dood. Eers wanneer hulle bewus word van
hulle eie nietigheid, dat hulle op sigself niks is nie, kan hulle
van Godsweë alles hê en wees (Bultmann 1967:19).
Om só te leef, is om eskatologies te leef, om ’n nuwe mens te
wees. Hiermee is die Gnostiese en Joodse apokaliptiese eskatologie
ontmitologiseer, deurdat die dag van oordeel alreeds aangebreek het.
Die Johannes-evangelie maak die radikale gevolgtrekking dat die
oordeel oor die wêreld nie ’n toekomstige kosmiese gebeure sal wees
nie, maar reeds met Jesus se oproep tot geloof gekom het. So
elimineer die Johannes-evangelie in geheel die apokaliptiese
eskatologie. Gelowiges het reeds die lewe, en het uit die dood na
die lewe oorgegaan. Uiterlik het niks verander in hulle verhouding
met die wêreld nie, maar vir hulle is die wêreld nie meer van belang
nie (Bultmann 1967:20).
Ook die Gnostiese eskatologie word so oorkom. Gelowiges kry nie
’n nuwe natuur nie, hulle pre-eksistente natuur word nie bevry nie,
en hulle hemelwaartse sielereis word nie gewaarborg nie. Wat hulle
in geloof het, is nie ’n gegewenheid, ’n gewaarborgde toestand,
sodat libertinismekan volg of angsvallige asketisme dit moet beskerm
9
nie. Nee, naas die indikatief van geloof, staan die imperatief.
Geloof is nie ’n eenmalige, eens-en-vir-altyd-beslissing nie, maar
moet in elke nuwe konkrete situasie bevestig word deur die
geloofsbeslissing opnuut te neem. Die vryheid van geloof is die
vryheid om telkens weer die geloofsbeslissing te maak. Geloof is
daarom nie om ’n houvas te kry nie, maar om in ’n houvas te wees.
Dit is om konstant en doelgerig op pad te wees tussen die alreeds en
die nog nie (Bultmann 1967:20).
Ontmitologisering van die Heilsgebeure
Christelike verstaan van lewe sonder Christus
Tot dusver het Bultmann die Christelike synsverstaan ontmitologiseer
deur dit in eksistensiale terme te beskryf. Nou vra hy of dit wel in
ooreenstemming met die Nuwe-Testamentiese verkondiging gedoen is. Sy
antwoord is dat een saak nie na vore gebring is nie, naamlik dat in
die Nuwe Testament geloof ook geloof in Christus is. Die Nuwe Testament
verkondig dat geloof bekendgemaak is, gekom het. Geloof het eers ’n
moontlikheid geword weens die Christusgebeure. Geloof as gehoorsame
oorgawe aan God en as innerlike vryheid van die wêreld is alleen
moontlik deur geloof in Christus (Bultmann 1967:31).
Die deurslaggewende vraag is nou of hierdie aanspraak ’n
mitologiese res is wat geëlimineer of ontmitologiseer moet word, met
ander woorde, of die Christelike synsverstaan gerealiseer kan word
sonder Christus. Bultmann (1967:32-33) verwys na sodanige pogings in
die filosofie (byvoorbeeld Graaf York van Wartemburg, Karl Jaspers
en Martin Heidegger) en oordeel dat die filosofie op sy eie oor
menslike eksistensie waarneem, wat ook in die Nuwe Testament tot
uitdrukking kom. Hy sonder Heidegger se eksistensiale analise van
menslike eksistensie uit as ’n uitnemende profane voorstelling van
die Nuwe-Testamentiese siening daarvan: angsvolle eksistensie wat
10
voortdurend moet kies tussen sigself verloor aan die voorhande
wêreld of outentieke eksistensie, deur alle sekuriteite prys te gee
en vry te wees vir die toekoms.
Vir Bultmann (1967:33-34) is die vraag dus nie of die aard van
menslike eksistensie sonder die Nuwe Testament verstaan kan word
nie. Die vraag is of mense se outentieke eksistensie sal realiseer
bloot omdat dit aan hulle verduidelik word en hulle daartoe opgeroep
word, soos die filosofie meen. Dit is op hierdie kritieke punt dat
Bultmann stel dat die Nuwe Testament die vraag negatief antwoord:
Outentieke eksistensie kan alleen realiseer deur die bevrydende daad
van God, naamlik die verlossingsgebeure wat Christus verwesenlik het
(Bultmann 1967:35). Sonder hierdie verlossingsdaad van God is die
mens se situasie desperaat (verzweifelt).
Bultmann (1967:36) maak dit duidelik dat die Nuwe Testament met
gelowiges praat, dus met mense wat die beslissing gemaak het om God
se verlossingsdaad in hulle eksistensie te laat plaasvind. Mense
herken buite die Nuwe Testament om hulle nie-outentieke eksistensie,
wat Bultmann vervallenheid (Vervallenheit) noem, omdat kennis van
outentieke bestaan deel is van menslike eksistensie. Die belangrike
punt is dat outentisiteit (Eigentlichkeit) nie ’n natuurlike, menslike
eienskap is waaroor ons beskik sodat ons dit kan verwesenlik, soos
die filosofie meen nie. Die Nuwe Testament leer dat mense juis hulle
outentisiteit verloor het en dat hulle kennis van outentisiteit
vervals word deur die idee dat mense oor outentisiteit kan beskik.
Met die begrip vervallenheid dui Bultmann aan dat alle pogings van
mense om outentiek te eksisteer, onsuksesvol sal wees omdat dit
steeds die pogings van vervallenes is wat nie self aan hulle
vervallenheid kan ontkom nie (Bultmann 1967:37).
Die Nuwe Testament noem hierdie toedrag van sake sonde, en
Bultmann beklemtoon veral die mens se aanspraak om self (eigenmächtig)
outentiek te kan leef as die wesenlike aard van sonde (Bultmann
1967:38). Bultmann beskryf hierdie selfvertroue (Eigenmächtigkeit) as
11
ondankbaarheid jeens God, waarmee mense hulleself afsluit van die
moontlikheid om outentiek te eksisteer, naamlik deur onderwerping
aan God. Outentieke eksistensie is nie ’n taak wat die mens kan
bemeester nie, maar ’n geskenk van God wat mense bevry om outentiek
te kan eksisteer. Omdat hierdie selfvertroue so wesenlik deel
uitmaak van menswees, beteken die verlossingsdaad van God dat ons in
wese van onsself bevry word (Bultmann 1967:38). Die mens is so
vervalle dat niemand eens hulleself aan God kan onderwerp nie al
probeer hulle ook hoe hard. Tot outentieke bestaan kan ’n mens
alleen maar bevry word. Presies dít verkondig die Nuwe Testament en
die Christusgebeure: Waar ons nie self kon optree nie, het God vir
ons opgetree (Bultmann 1967:38-39).
Dit beteken dat vergifnis van sonde nie juridies verstaan moet
word nie. Dit is nie die blote afskryf van skuld of straf sodat
menslike bestaan onveranderd kan bly nie. Vergifnis is eerder die
bevryding van daardie mag wat ons tot hiertoe gevange gehou het.
Vergifnis is dus die bevryding tot gehoorsaamheid. Die imperatief
staan langs die indikatief. Vergifnis bevry ons ook om onsself aan
ander te onderwerp. Eskatologiese (outentieke) eksistensie word vir
mense moontlik omdat God opgetree het en mense bevry het van die
houvas van hierdie wêreld deur mense nuut te maak. Hierdie bevryding
kom alleen deur die Christusgebeure en is die bekendmaking van God
se liefde. Alleen geloof in hierdie liefde van God maak mense vry
van hulleself en oop vir God se toekoms. Christelike geloof is
daarom altyd geloof in Christus as die bekendmaking van God se
liefde (Bultmann 1967:39).
Die vraag wat nou volg, is of daar hiermee ’n beperking op die
ontmitologisering van die Nuwe-Testamentiese verkondiging gekom het.
Het ons hier voor ’n mite te staan gekom, of voor ’n gebeurtenis wat
mitologiese karakter toon? Die vraag is dus of die volgende
uitspraak ’n mitologiese aanspraak is: Die verandering tot mense wat
bevry is van hulleself om outentiek te lewe, is slegs moontlik as ’n
12
daad van God, en geloof is alleen geloof in die liefde van God wat
bekend gemaak is in die Christusgebeure.
Die Christusgebeure
Die vraag aan die orde is derhalwe of die bekendmaking van God se
liefde deur die Christusgebeure ’n mitiese gebeure is.
Die probleem rondom ontmitologisering van die Christusgebeure
Bultmann stel dit onomwonde dat die Nuwe Testament die
Christusgebeure as ’n mitiese gebeure voorstel. Die eintlike vraag
is of dit so voorgestel hoef te word, en of die Nuwe Testament nie
reeds self vir ons ontmitologiserende interpretasie voorsien nie
(Bultmann 1967:40-41).
Die vervlegtheid van die mitiese voorstellings oor die pre-
eksistente, maagdelik-gebore Seun van God met die historiese Jesus
van Nasaret, bring Bultmann by die vraag of die mitiese
voorstellingswyse nie die bedoeling het om die betekenis van die
historiese Jesus weer te gee nie: Die Verlosser en sy oorsprong is
nie te verstaan vanuit die konteks van hierdie wêreld nie, maar
vanuit die ewigheid (Bultmann 1967:41). Bultmann sluit af deur die
kruis en opstanding ontmitologiserend te interpreteer.
Die kruis
Moet die kruis van Christus slegs as mitiese gebeure verstaan word,
of is dit moontlik om die betekenis daarvan te verstaan ook as
historiese gebeure, wat tegelyk die verlossingsgebeure is?
Die Nuwe Testament teken beslis die kruisgebeure as mities: Die
gekruisigde is die pre-eksistente Seun van God wat mens word en
daarom sondeloos is. Hy is die offer deur wie se bloed ons sonde
13
versoen word. Hy dra plaasvervangend die wêreld se sonde, deur die
dood as straf vir sonde op Hom te neem. So bevry Hy ons daarvan
(Bultmann 1967:41-42).
Bultmann meen dat hierdie voorstelling van die kruisgebeure,
wat gedagtes oor die offerkultus vermeng met ’n juridiese
satisfaksieteorie, nie meer vandag aanvaarbaar is nie. Dit sê ook
nie alles wat oor die kruisgebeure gesê behoort te word nie. Al wat
dit aandui, is dat deur vergifnis die straf vir sonde weggeneem is.
Meer behoort gesê te word, naamlik dat die kruisgebeure gelowiges
bevry van die mag van sonde wat hulle domineer (Bultmann 1967:42).
Sodoende word dit duidelik dat die historiese gebeure verhef word
tot kosmiese gebeure en die kruisgebeure die oordeel word oor die
wêreld. Deur toe te laat dat Jesus gekruisig word, het God die kruis
daargestel as kruis vir ons. Dan beteken geloof in die kruis van
Christus, om dit as jou kruis te aanvaar en saam met Christus gekruisig
te word, en nie as ’n mitiese gebeure buite ons, of as objektief
waarneembare gebeure wat God tot ons krediet reken nie. Die
beslissende betekenis van die kruisgebeure is dat dit die
geskiedenis transformeer omdat dit die eskatologiese gebeure is, wat
in en anderkant die grense van tydreik. Vir die gelowiges is die
betekenis van die kruisgebeure in die hede ’n konstante werklikheid
(Bultmann 1967:42).
Dit word vir gelowiges werklikheid deur die sakramente: die
Doop beteken om saam met Christus gekruisig te word en te sterf.
Nagmaalgangers kry deel aan Christus se liggaam en bloed, dus aan
Christus se sterwe. Ook in die gewone lewe is die kruis van Christus
aanwesig, omdat almal wat aan Christus behoort, die vlees met al sy
hartstog en begeertes gekruisig het. Hierby word ingesluit dat vrees
vir lyding oorkom word deurdat gelowiges vrykom van die wêreld deur
lyding te aanvaar en so die dood van Christus in hulle liggaam te
dra. Sodoende bly die kruisgebeure ’n konstante werklikheid en is
dit nie beperk tot iets van die verlede nie. Bultmann se
14
gevolgtrekking is dat die kruisgebeure as verlossingsgebeure nie
mitiese gebeure is nie maar historiese gebeure, wat sy oorsprong het
in die historiese kruisiging van Jesus van Nasaret. Die mitiese
inkleding wil niks anders wees nie as aanduiding van die
belangrikheid van die historiese gebeure. Dit is in terme van
hierdie betekenis van die kruisgebeure, dat die verkondiging daarvan
voortdurend toehoorders afvra of hulle bereid is om hierdie
betekenis toe te eien en saam met Christus gekruisig te word
(Bultmann 1967:43).
Bultmann vra of dit van deurslaggewende belang is dat die kruis
juis die kruis van Christus is. Hy stel dat dit vir die eerste
gelowiges so was, want hulle het Jesus persoonlik geken. Met ons is
dit anders. As gebeure is dit nie vir ons gebeure binne ons eie
lewens nie. Ons ken dit alleen danksy die historiese berigte
daaroor. Bultmann meen dat die Nuwe Testament nie die betekenis van
Jesus se kruis vanuit sy historiese lewe aandui sodat historiese
navorsing dit kan reproduseer nie. Die Gekruisigde word verkondig
as die Opgestane. Kruis en opstanding vorm ’n eenheid.
Die opstanding
Wat die opstanding van Jesus betref, vra Bultmann of ons hier te
make het met ’n suiwer mitiese gebeure. Hy stel dat die opstanding
nie ’n historiese gebeure (historisches Ereignis) is nie. Die betekenis
van die opstanding kan dus nie histories vasgestel word nie. Daarom
vra Bultmann of die opstanding enigsins anders beskou kan word as
dat dit uitdrukking van die betekenis van die kruisgebeure is. Dit
sê tog niks anders nie as dat die kruisgebeure nie die dood van ’n
gewone sterfling was nie, maar God se bevrydende oordeel oor die
wêreld, wat ook die dood van sy krag beroof het. As kosmiese gebeure
vorm die kruis en opstanding ’n eenheid, waardeur die moontlikheid
van ware lewe geopen word. Die opstanding is egter nie te beskou as
15
verifieerbare mirakel (ein beglaubigendes Mirakel) om twyfelaars te
oortuig dat die kruisgebeure werklik kosmies-eskatologiese betekenis
het nie (Bultmann 1967:44). Bultmann erken dat die Nuwe Testament
baie keer wel só oor die opstanding praat. Bultmann wys egter daarop
dat hierdie gevalle meestal latere formulerings is. Wanneer Paulus
self in 1 Korintiërs 15:3-8 nog ooggetuies aanwie die opgestane Heer
verskyn het byvoeg, lyk dit of hy dieselfde doen. In werklikheid wys
Paulus daarmee dat hy, net soos die vroegste gelowiges, Jesus as
Opgestane Heer verkondig. Die opstanding kan nie enigsins as
verifieerbare mirakel dien nie. Nie net kan die opstanding nie as
objektiewe feit bewys word nie, maar ’n mitiese gebeure, naamlik dat
’n dooie lewendig word, is op sigself ongeloofwaardig (unglaubhaft).
Die opstanding is dus iets wat self geglo moet word. Die opstanding
is objek van geloof, omdat dit veel meer sê as dat ’n dooie lewendig
geword het. Dit is objek van geloof omdat dit ’n eskatologiese
gebeure is. Juis hierom kan dit nie ’n verifieerbare mirakel wees
nie. Geen mirakel kan getuig oor die eskatologiese feit dat die dood
se mag verslaan is nie. ’n Mens kan ook nie een saak wat geglo moet
word (die eskatologiese betekenis van die kruis) met ’n ander saak
wat ook geglo moet word (die opstanding van Jesus), bewys nie
(Bultmann 1967:45).
Regdeur die Nuwe Testament word die opstanding geteken as
eskatologiese gebeure waardeur Jesus die dood vernietig het en ware
en ewige lewe aan die lig gebring het. Deur die Doop kry gelowiges
deel aan Jesus se dood én aan sy opstanding. Dat gelowiges deel het
aan Jesus se opstanding, moet konkreet in hulle lewens bewys word
deur teen die sonde te stry. Die opstanding is dus geen mitiese
gebeure wat die betekenis van die kruis geloofwaardig maak nie. Die
opstanding moet geglo word, net soos wat die betekenis van die kruis
geglo moet word. Bultmann (1967:46) stel dit so: “Ja, die
opstandingsgeloof is niks anders nie as die geloof in die kruis as
heilsgebeure, aan die kruis as die kruis van Christus”. Hy wys
16
daarop dat ’n mens nie éérs aan Christus glo en daarná aan sy
kruisdood nie.
Om in Christus te glo, is om in die kruis as die kruis van Christus
te glo. Dit is nie omdat dit die kruis van Christus is, dat dit
heilsgebeure is nie. Dit is, omdat dit heilsgebeure is, dat dit die
kruis van Christus is. Daarsonder is dit net die tragiese dood van ’n
edele mens (Bultmann 1967:46).
Nou is die probleem: hoe word dit moontlik om die kruis as kruis van
Christus te beskou, en daarmee as heilsgebeure? Hoe kom ’n mens tot
geloof in die kruis as eskatologiese gebeure? Vir Bultmann (1967:46)
is daar net een antwoord: omdat dit so verkondig word, naamlik saam
met die opstanding. Christus die gekruisigde en verrese Heer ontmoet
ons in die verkondiging en nêrens anders nie.Ware Paasgeloof is om
hierdie verkondiging te aanvaar.
Dit sou ’n fout wees, meen Bultmann, om terugwaarts agter die
verkondiging in te vra na die historiese oorspronge daarvan om dit
daarmee te regverdig. Ons kan geloof nie regverdig deur historiese
ondersoek nie. Die verkondiging ontmoet ons as God se woord, daarom
vra ons nie dat dit gelegitimeer word nie. Dit bevraagteken óns
juis, naamlik of ons bereid is om dit te glo. Die verkondiging vra
ons om die kruis en opstanding as eskatologiese gebeure te glo,
sodat nuwe moontlikhede vir ons selfverstaan daardeur geopen kan
word. Hierdie soort geloof is ware Paasgeloof (Bultmann 1967:46).
Histories kan die Paasgebeure nie vasgestel word nie, alleen
maar die Paasgeloof van die dissipels. Die Christelike Paasgeloof is
egter nie geïnteresseerd in die historiese vraag daaroor nie. Vir
gelowiges is die historiese ontstaan van die Paasgeloof van die
dissipels die selfbekendmaking (Selbstbekundung) van die Opgestane
Heer, die daad van God waarin die heilsbetekenis van die kruis
voltrek word (Bultmann 1967:47).
17
Die geloof van die dissipels word ook nie weer ’n bewysbare
feit, op grond waarvan ons kan glo nie. Nee, die Paasgeloof self
hoort tot die eskatologiese gebeure, wat die objek van geloof is.
Daarmee word die verkondiging, wat sy oorsprong in die Paasgebeure
het, self eskatologiese heilsgebeure. Bultmann kwalifiseer die
verkondiging as dat dit mense vra om hulleself as Christus se mede-
gekruisigdes en mede-verresenes te verstaan. In die geklank van die
verkondiging word die kruis en opstanding tot hede gemaak en die
eskatologiese oomblik breek aan. Dit is alleen in hierdie
verkondiging dat ons die Opgestane Heer ontmoet (Bultmann 1967:47).
Net soos die woord en die apostel wat dit verkondig tot die
eskatologiese gebeure hoort, so ook die kerk waar dit verkondig word
aan gelowiges as versameling heiliges (mense wat die oorgang tot
eskatologiese eksistensie gemaak het). Kerk (ekklesia) is ’n
eskatologiese begrip. Wanneer dit “liggaam van Christus” genoem
word, word die kosmiese aard daarvan uitgedruk: Dit is nie ’n
historiese fenomeen in die sin van die wêreldgeskiedenis nie, maar
in die sin dat dit in die geskiedenis gerealiseer word (Bultmann
1967:47-48).
Slot
Ten slotte vra Bultmann, nadat hy die Nuwe-Testamentiese
verkondiging ontmitologiseer het, of daar ’n mitologiese res oorbly.
Hy antwoord dat daar vir mense wat spreke oor God se beslissende
eskatologiese handeling as mitologie beskou, vir seker ’n
mitologiese res oorbly. Tog is dit nie meer mitologie in die ou sin
van die woord sodat dit nou oorbodig word met die verdwyning van die
ou mitologiese wêreldbeeld nie. Die heilsgebeure is geen
mirakelagtige, bonatuurlike gebeure nie, maar ’n historiese
gebeurtenis in ruimte en tyd. Deur dit só voor te stel, word die
mitologiese sluier weggeneem en kom die Nuwe-Testamentiese
18
verkondiging tot sy reg, naamlik as aankondiging van die paradoks
dat God se eskatologiese handeling voltrek in die lewe van ’n
konkrete historiese persoon.
Net so is die verkondiging ook nie die misterieuse woorde van
’n orakel nie, maar sober verkondiging van die persoon en lotgevalle
van Jesus van Nasaret en die betekenis daarvan as heilsgebeure. Dit
kan wel verstaan word as historiese fenomeen deur die
geesteswetenskappe en kan selfs as moontlike wêreldbeeld beskou
word. Die verkondiging self maak egter die aanspraak dat dit God se
eskatologiese spreke is (Bultmann 1967:48).
Predikante en apostels is gewoon mense wat histories
geïnterpreteer kan word na gelang van hulle mensheid. Die kerk is ’n
sosio-historiese fenomeen met ’n geskiedenis wat deel vorm van ’n
kultuur se geskiedenis. Tog is hulle almal eskatologiese fenomene en
gebeure (Bultmann 1967:48).
Al hierdie aansprake is ’n struikelblok (skandalon) wat nie
oorkom kan word deur dialoog met die filosofie nie, alleen maar in
gehoorsame geloof. Hoewel al hierdie fenomene histories, sosiologies
en sielkundig ondersoek kan word, bly hulle vir geloof eskatologiese
fenomene. Dit is juis die feit dat dit nie bewys kan word nie wat
die Christelike geloof beveilig teen die aanklag dat dit mitologie
is. Die transendensie van God word nie immanent gemaak soos in die
mite nie. Nee, die paradoksale teenwoordigheid van God word bevestig
daarmee dat “die Woord mens geword het” (Bultmann 1967:48).
Kritiese waardering
Prioriteit van die verkondiging
Bultmann se motivering was suiwer daarop gerig om die mitologies
verwoorde Nuwe-Testamentiese verkondiging vir hedendaagse mense
verstaanbaar te maak. Omdat vele, veral in Suid-Afrika, hom as
19
ketter en ondergrawer van die geloof gebrandmerk het, moet hierdie
vertrekpunt van Bultmann duidelik gestel word.
Bultmann se definisie van die mite
Daar is dikwels van Bultmann verskil oor sy definisie van die mite,
naamlik soos dit in die destydse geskiedenis- en godsdienswetenskap
verstaan is. Schmithals (1995:171-178) bevestig die
Religionsgeschichtliche herkoms van Bultmann se verstaan van die mite, met
veral sterk invloed van Gogarten se gedagtegang daaroor.
Thiselton (1980:252-258) meen dat Bultmann drie afsonderlike
definisies gebruik vir die mite: die mite as mitiese wêreldbeeld,
die godsdienshistoriese definisie, en laastens die mite as
uitdrukking van menslike selfverstaan. Hierdie kritiek is ongegrond.
Bultmann gebruik slegs een definisie, naamlik die
godsdienshistoriese een. Die mitiese wêreldbeeld is nie ’n
definisie van die mite nie, maar die mitiese verwysingsraamwerk as
werklikheidsbeskouing waarbinne die mite verstaan word. Daarsonder
maak die mite nie sin nie. Net so is die intensie van die mite nie
gelyk aan ’n definisie nie, maar dui gewoon op dit waarna die mite
verwys, naamlik menslike eksistensie.
Die kritiek oor Bultmann se verstaan van mites was nie vir hom
van wesenlike aard nie. In sy latere werk oor ontmitologisering het
hy daarop gewys dat die definisie van die mite nie vir hom die
belangrikste saak in sy hermeneutiese program is nie (vgl. Bultmann
1967:179). Hy het selfs gesê dat enigeen vry is om iets heel anders
onder mite te verstaan. Sy kommer was dat die klem wat baie
deelnemers aan die debat op die definisie van mite geplaas het, die
aandag weggelei het van waaroor dit eintlik in sy program van
ontmitologisering gegaan het. Vir Bultmann het dit gegaan oor die
mitiese manier van dink, naamlik dat die werklikheid oop sou wees
vir ingrype van bonatuurlike magte. Dit kontrasteer met die geslote
20
werklikheidsverstaan van die natuurwetenskaplik georiënteerde
hedendaagse mense. Dit stel Bultmann, selfs in terme van die
destydse ontwikkeling in die kwantumfisika waarmee sommige gemeen
het die kousaliteitsbeginsel tot ’n mate gerelativeer sou wees. Hy
dui aan dat hierdie geringe mate van relativering nog geensins die
werklikheid oopgemaak het vir die ingrype van bonatuurlike magte en
geloof in mitiese wonders nie. Nog minder het die natuurwetenskappe
die eksperimentele metode laat vaar (Bultmann 1967:179-181).
Die probleem van die Nuwe-Testamentiese mitiese
werklikheidsverstaan en spreekwyse bly problematies vir hedendaagse
mense wat leef en werk in die konteks van wetenskap en tegniek.
Hiermee het Schelkle (1985:265) saamgestem, met die slotsom: “Darum
bleiben Entmythologisierung unsere Aufgabe.”
Dat Bultmann die uitdaging grondig aangespreek het, beteken nie
dat hy die wetenskaplike werklikheidsverstaan tot norm vir die
verkondiging gemaak het nie. Hy wou die verkondiging binne hierdie
verstaanshorison verstaanbaar maak. Hy het daarom nie die mitiese
elemente weggesny nie maar dit eksistensiaal geïnterpreteer. Wat
meer is, Bultmann het effektief met verwysing na onder andere die
Johannesevangelie se eiesoortige eskatologie, aangedui dat die Nuwe
Testament self reeds die noodsaak gesien het en met
ontmitologisering begin het. Hiermee het UlrichLuz (1966:367) hom
gelyk gegee: “So ist es richtig zu sagen, daβ das Neue Testament selbst die Aufgabe der
Entmythologisierung stellt”.
Eksistensiële interpretasie
Dit sou verkeerd wees om te dink dat Bultmann se aanwending van
begrippe wat ontleen is aan die eksistensiefilosofie gewoon beteken
het dat hy Martin Heidegger se eksistensiefilosofie net so oorgeneem
het vir die verstaan van die Nuwe Testament. Roger Johnson (1987:22)
wys daarop dat Bultmann aspekte van Heidegger se filosofie aangepas
21
het vir sy eie doeleindes. Wat meer is, Bultmann het Heidegger se
konsepte verenig met die heelwat ouer filosofies-teologiese tradisie
van die Marburgse Neo-Kantianisme. Dit is uit hierdie tradisie,
eerder as uit die eksistensiefilosofie, dat Bultmann se eie teologie
gegroei het. Bultmann se weergawe van eksistensialisme is daarom
eiesoortig, met wortels wat verder terug strek as sy samewerking met
Heidegger in die 1920’s. Om Bultmann daarvan te beskuldig dat hy sy
hermeneutiese program uitverkoop het aan Heidegger se
eksistensiefilosofie, is daarom ongegrond.
Bultmann (1965:192) self gee toe dat daar nie so iets is soos
’n ideale filosofie nie. Vir sy ontmitologiseringsprogram was die
ideale filosofie gewoon een wat gerig was op die verstaan van
menslike eksistensie, die saak waarop die Nuwe-Testamentiese
verkondiging ook fokus.
Die Christusgebeure as “mitologiese res”
Vir Bultmann is outentieke eksistensie nie ’n moontlikheid wat mense
in hulleself het, waartoe die (eksistensie-) filosofie hulle kan
bevry deur hulle daaroor in te lig nie. Volgens Bultmann se verstaan
van die Nuwe Testament is outentieke eksistensie iets waartoe mense
alleen van buite, van Godsweë, bevry kan word, en dan spesifiek deur
die Christusgebeure. Dit behels die prysgawe van alle menslike
sekuriteite in volledige vertroue dat die onsigbare God mense
liefdevol tegemoet kom in die Christusgebeure. Bultmann noem dit
die “mitologiese res” wat hy nie kan ontmitologiseer nie.Dit sluit
ook aan by sy konsekwente hantering van die historisiteit al dan nie
van die heilsgebeure. Hoewel Bultmann die kruis van Jesus as
historiese gebeure erken, is dit nie met die opstanding die geval
nie. Vir Bultmann is die opstanding nie ’n historiese gebeure wat as
sodanig geverifieer kan word nie. Daarmee gee Bultmann nie die
opstanding as heilsgebeure prys nie, maar stel hy by herhaling dat
22
dit geglo moet word as die betekenis van die kruis. Hiermee is dit
moeilik om te verstaan dat Bultmann deur sommige beskou kon word as
iemand wat die Christelike geloof ondergrawe.
Ten slotte
Bultmann is verskeie male beskryf as die grootste teoloog wat die
twintigste eeu opgelewer het. Dit is jammer dat hy in Suid-Afrika so
min erkenning gekry het en dat sy werk nie die aandag gekry het wat
dit verdien nie (Pelser 1987:162-163). Intendeel, Loubser (1996:49)
sê selfsdat dit die tydverdryf van ’n groot aantal Suid-Afrikaanse
teoloë was om op Bultmann se sogenaamde [my invoeging] tekortkominge
te wys. Dit laat die Suid-Afrikaanse teologiese konteks des te
armer.
Literatuurverwysings
Bultmann, R.K., 1965, Zum Problem der Entmythologisierung, in
Bartsch, H-W (Hrsg), Kerygma und Mythos, II: Diskussionen und Stimmen
zum Problem der Entmythologisierung, pp. 179-195, Theologische
Forschung 1, Hamburg-Bergstedt,Herbert Reich Evangelischer
Verlag.
Bultmann, R.K., 1967,Neues Testament und Mythologie: Das
Problem der Entmythologisierung der neutestamentlichen
Verkundigung, in Bartsch, H-W. (Hrsg), Kerygma und Mythos,I: Ein
theologisches Gespräch, pp. 15-48, Theologische Forschung 2,
Hamburg-Bergstedt, Herbert Reich Evangelischer Verlag, (ThF1).
Johnson, R.A.,1987, Rudolf Bultmann. Interpreting faith for the modern era,
The making of modern theology series, Volume 2, Collins, San
Francisco.
Loubser, J.A., 1996, Aspekte van Bultmann se Pauliniese
teologie, Nederduitse Gereformeerde Teologiese Tydskrif 37(1),49-60.
23
Luz, U.,1966, Entmythologisierung als Aufgabe der
Christologie, Evangelische Theologie 26, 349-368.
Malan, G.J., 2000, Bultmann se ontmitologiseringsprogram
herwaardeer, Hervormde Teologiese Studies 56 (4), 1107-1118.
Pelser, G.M.M., 1987, Die Ontmitologiseringsprogram van Rudolf
Bultmann, Hervormde Teologiese Studies 43,162-191.
Schelkle, K.H., 1985, Entmythologisierung in existentialer
Interpretation, Theologische Quartalschrift 165(4), 257-266.
Schmithals, W., 1995, Zum Problem der Entmythologisierung bei
Rudolf Bultmann, Zeitschrift für Theologie und Kirche 92(2), 166-206.
Thiselton, A.C., 1980, The Two Horisons: New Testament Hermeneutics and
Philosophical Description, with special reference to Heidegger, Bultmann, Gadamer
andWittgenstein, Exeter, Paternoster Press.
24