1

LITURGI MINGGU PASSION

29 Maret 2020

I. Persikapen.

1. Rende KEE GBKP 338:1,2.

1. Ulu tuah Kam kusembah, ajar aku me gelah. ‘Lah nurihi puji kami, lalap la ‘rngadi-ngadi. Lias aras

keleng ateNdu, jujurkenNdu man bangku. Nteguh paguh la terundu kuasa ras muliaNdu.

2. Tetap aku daramiNdu, ban tedehNdu man bangku. Suari berngi ijagaiNdu, mbelin kal kek’lengenNdu.

Di reh susah ndumpang aku, erlebuh aku baNdu. Minter nusur penampatNdu erban teneng tendingku.

2. Ertoto.

( Adi ibas jabu lit serayaan, maka serayaan mabai Votum ras Salam )

II. Kebaktin.

1. Votum :Ibas gelar Dibata Bapa, AnakNa Yesus Kristus ras gelar Kesah Si Badia.

2. Salam : Perkuah ate ras dame ibas Dibata Bapa ras ibas Tuhan Yesus Kristus nari, ibas kerembaken

Kesah Si Badia ras kita kerina gelah. Amin.

Ialoi perpulungen : A…..min A…..min A……min.

------------------------------------------------------------------------------------------------------------------------------------

3. Introitus : Mazmur 17:7

“Cidahkenlah keleng ateNdu si mbelin janah kelini kami, ibas adep-adepenNdu terkawal kap

kami”.

4. Rende KEE 325 :1,2.

1. Tuhan itengah-tengahta, m’reken pasu-pasuNa. Maler desken lau si mbelin, lanai lit si terulin. Usekenlah min

KesahNdu, temani geluh kami. Gegeh kami plimbarui, k’rina jadi mehuli.

2. Tuhan itengah-tengahta, reh riahna ukurta. Reh tenengna pertendinta reh damena pusuhta. Usekenlah min

KesahNdu, temani geluh kami. Gegeh kami plimbarui, k’rina jadi mehuli.

5. Berita Kerna Kiniseran.

Lit. : Mari sibegiken Kata Dibata kerna kiniseran Tuhan Yesus Kristus.

Adi lit kalak ngikurken Aku, isimbakna ukurna, iangkatna kayu persilangna, ikut-ikutna Aku. Sabab kalak

si ngkelini kesahna atena, ia kap kebenen kesahna, tapi kalak si kebenen kesahna erkite-kiteken Aku, ia

kap ndatsa. Kai kin gunanan man manusia, dat gia doni enda kerina tapi bene tendina ? Tah kai ngasup

manusia mereken lako man tebus nebusi tendina ? Sabab Anak Manusia reh pagin alu kemulian BapaNa

ras MalekatNa, maka tupung e ibalasna man sekalak-sekalak bali ras perbahanena ndube. ( Matius 16:24-

27)

Ibereken kesempaten man banta sekalak-sekalak lako rukur ras ertoto gelah kita pe banci ngejapken

kiniseran Yesus ibas nebusi kita.

Paksa teneng sibenaken. (1-2 Menit )

Amin.

6. Pengakun Dosa.

Lit. : Marilah siakuken dosanta ilebe-lebe Dibata, nintalah ibas ukurta sekalak-sekalak.

2

O Tuhan Dibata, si enggo nikapken dalan terkelin man kami. Bujur isehken kami man baNdu sabab

pengajaren Kayu Persilang icahken Kam ibas doni enda seh genduari. Iatanken Kam kami ngaloken

dameNdu, siganjangen asa kami ngasup ngukurkenca, si ngakwali ukur kami ibas Yesus Kristus.

Erkiteken si e bereken Kam min man kami, gelah kami megegeh adi lit percuban, kiniseran. Maka erlayas

ukur kami ibas kiniseran. Bere damendu e gelah ngasup kami kerina serayanNdu, perpulungenNdu ertutus

ate ibas erkiniteken man baNdu. Pegegehi ukur kami ernalem man perkuah ateNdu tep-tep wari. Gelah

banci kami tetap sikerajangenNdu, bicara gia kami nadingken doni enda. Bere kengasupen man kami

ngikutken Kam tetap, seh tujun si enggo itentuken Kam. E me kap upah kemenangen, gelah banci kami

tedis ilebe-lebe kinirajanNdu. Amin.

7. Rende KEE GBKP 292:1,2

1. Manusia ‘nggo erdosa, meluat mekelesa. Pusuh labo llit damena, ‘di sirang ras Dibata. Begikenlah pendiloNa,

ikutkenlah KataNa, geluh pelimbaruiNa, rembak kita ras ia.

2. Megati meganjang ukur, nimbak nogan KataNa. Piah dungna latih ukur, di sirang ras Dibata. Begikenlah

pendiloNa, malang erlajar baNa. Di mberat pe bas geluhta, menahang dir as Ia.

8. Berita Pengalemi dosa.

L. :Selaku persuruhen Dibata aku nehken KataNa man banta kerina kita singakuken dosanta.

Dagina tetap atendu min o seninangku si kukelengi, ola mbewat-mbewat pe, simparlah dahinndu ibas

Tuhan katawari pe sabab ieteh kam maka la sia-sia kelatihenndu ibas Tuhan. Amin ( I Kor. 15:58)

9. Rende KEE GBKP 286:1,2.

1. Kuikutken me dalanNdu, dalan dame man bangku. Terkelin me kap geluhku, itebusi darehNdu. Kuikutken me

dalanNdu, kuendesken geluhku. Bas Kam o Jurus’lamatku, dame senang tendingku.

2. Mesera gia dalanku, PadanNdu kap enteguh. Ngelawan kuasa gelap dir as Kam menang tuhu. Kuikutken me

dalanNdu, kuendesken geluhku. Bas Kam o Jurus’lamatku, dame senang tendingku.

10. Nehken Kata Dibata.

a. Pengogen Kata Dibata bagin si pemena : Sepanya 2 :1-3. (Responsoria )

Kenca dung pengogen emaka nina :

L. : “ Ketuahen kalak simegiken Kata Dibata, dingen simakekenca ibas geluhna sitep – tep wari ”.

Hosiana.

Perp. : “ Hosiana. Hosiana. Hosiana ”.

b. Khotbah : 2 Petrus 1:1-9 ( Tunggal )

Kotbah ibenai dingen idungi alu pertoton.

11. Pengakun Kiniteken.

12. Persembahen Pengataken bujur

a. Kata Dibata kerna persembahen pengataken bujur.

L. : “ Kalak simpersembahken pengataken bujur, ia nge simpehaga kap Aku, janah man kalak si

perdalinna la erpandangen, Kucidahken kesangapen ni Dibata”. (Mazmur 50: 23)

b. Rende KEE GBKP No 291:1,2.

Reff. M’riah ukur kami o Bapa, nembah ‘rjimpuh ertoto baNdu. Kam o Tuhan ipuji kami, ermulia gelarNdu.

1. Bengket kami o Tuhan, ngadap ku lebeNdu. Reh kami muji-muji gelrndu Tuhan si Badia. Reff.

2. Ulih peranin kami alokenNdu, Bapa. E me pengataken bujur kami, man baNdu Dibata Reff.

3

13. Pertoton kerna Persembahen ras Pertoton Syafaat.

14. Rende KEE GBKP 273:1,2

1. Ingetlah min gelar Yesus, susah ntah senang gia, Ia me kap penampatNdu kuja pe perlawesndu. Mehaga

gelarNa, pengarapenta k’rina. Mehaga gelarNa, ermulia gelarNa.

2. Pake tetap min pedahNa e me kap senjatanta. Kune reh percuban nderpa tentu la kita mampa. Mehaga

gelarNa, pengarapenta k’rina. Mehaga gelarNa, ermulia gelarNa.

15. Pertoton Tuhan.

----------------------------------------------------------------------------------------------------

( Adi Serayaan simaba kebaktin, iterusken seh ku pemasu-masun)

16. Pengutusen Ras Pemasu-masun.

L. : Dibata, si mada perkuah ate, si enggo nenahken kita ku kemulianNa si rasa lalap ibas Kristus, njadiken

kita serta, tetap, megegeh, dingen pagu. Ia nge si mada kuasa seh rasa lalap. Amin.

J. : A……min A…...min A……..min.

Kotbah 2 Petrus 1:1-9.

Thema : Dat Bagin Bas Kemuliaan Ras Kinuulin Dibata.

Shalom, perpulungen sinikelengi Tuhan Yesus Kristus,

Ibadah minggunta paksa enda silakoken itengah-tengah jabunta. Aminna gia kita beribadah ibas jabunta masing-

masing, tetaplah ukurta ergiah-giah nembah Dibata. Sabab kai siniperlukan kita guna nembah Dibata enggo

iberekenNa man banta. Lit dua hal sinisingetken ibas 2 Petrus 1:3. Sipemena, Dibata enggo mereken pasu-pasuna

man banta ibas Yesus Kristus. Ibas 2 Korinti 5:17-18; 21, ikataken, “Adi kalak ersada ras Kristus, ia me tinepa

si mbaru, si male engo lepas janah nehenlah, si mbaru enggo reh. Kerina si enda Dibata erbahanca, maka arah

Kristus, kita si gel-gel nari ermusuhen ras Ia, enggo ibahanNa jadi temanNa… Aminna pe Kristus la erdosa,

enggo ibahan Dibata maka Ia mersan dosa-dosanta, gelah ibas persadaan ras Kristus kita irembakken mulihken

ras Dibata”. Arah Kata Dibata enda, isehken maka ibas kiniersadaanta ras Yesus Kristus kita enggo iperdamekan

ras Dibata. Enda me dalanna maka enggo banci nembah man Dibata. Sipeduaken, Dibata enggo ndilo kita gelah

kita dat bagin ibas kemuliaan ras kiniulinNa. Ibas 1 Petrus 5:10, ikataken, “ Tapi kenca kam ngenanami kiniseran

kentisik, serta me kam ibahan Dibata, Si dem lias ate, Si ndilo kam gelah ngenanami kemulianNa si rasa lalap

erkiteken persadanndu ras Kristus;.. Bage pe ibas Ketangkasen 2:10, ikataken, maka man kalak si tetap

erkiniteken man Tuhan Yesus Kristus seh matena, ibereken Dibata me rudang-rudang kegeluhen tanda

kemenangenna. Enda me padan Dibata si jadi pengarapennta si erbahanca tetap ukurta guna nembah Dibata.

Perpulungen sini kelengi Tuhan,

Alu kata si deban, siniperluken kita guna nembah man Dibata enggo kap iberekenNa eme pasu-pasuNa ibas

Yesus Kristus selaku dalan man banta rembak ras Dibata ras tujunna entah pe ulihna eme ngenanami kemulian

ras kinulin Dibata.

Erkiteken si e iarapken man banta segelah tuhu-tuhu erusaha segelah pemere Dibata e tetap jadi sikerajangennta.

Iarapken segelah biak- biakta terus berkembang, bergerak maju, ertambah-tambahna lalap, semakin meluas.

4

Sigejaplah maka kegeluhennta enda erkiteken kiniulin Dibata man banta. Emaka, erpalasken kiniteken si bage

sikembangkanlah kubas kengasupen erbahan si mehuli. Bagi Dibata enggo erbahan si mehuli man banta,

perbahanen Dibata e jadi motivasi, inspirasi man banta guna erbahan si mehuli ka man kalak si deban. Ibas 1

Petrus 4:10-11, nina “ Sekalak-sekalak, selaku pengurus si mehuli ibas pemere Dibata si pelain-lain e, si

iberekenNa erpalasken lias ateNa, arus nggunaken pemere e guna kinulin kalak si deban. Kalak si ngerana,

ngeranalah alu kata-kata si tempa-tempa rehna ibas Dibata nari. Kalak si nampati, isampatinilah kalak alu gegeh

si ibereken Dibata man bana, gelah ibas kai pe ipuji kalak Dibata arah Jesus Kristus …”

Nandangi perbahanen si mehuli, itambahi ka kepentaren. Banci jadi perbahanen si mehuli e dungna jadi si la

mehuli. Ibas 1 Petrus 5:8, ikataken, “Tenenglah kam tapi metengetlah! Sabab iblis imbangndu e gawah-gawah

ku jah ku je bagi sada singa si erngaung ndarami si man jerngemenna”. E ngatakennca kita pe arus cerdik

ngelakoken si mehuli sebab lit iblis alu taki pacikna banci erbahan si mehuli dungna lanai mehuli.

Ibas ngelakoken kiniulin, amin pe enggo itambahken kepentaren, lit saja nge sierbahanca la bagi ukur si jadi.

Ibas situasi enda kita perlu ngasup engkuasi diri dingen tetap megenggeng ndalanken si mehuli. Tutus ibas

nehken sura – sura Dibata, eme engkelengi teman sada kiniteken ras terus engkelengi kerina manusia.

Perpulungen si ni kelengi Tuhan,

Banci jadi enggo turah pinakit ibas kulanta erkiteken pusuhta la teneng, enggo lit kebosanen erkiteken tading

irumah saja. pendahin ras pencarianta pe enggo terganggu. Enda me sinilakoken kita. Itengah-tengah situasi

sijadi genduari enda kita tetap nembah Dibata. Silakoken kai si benar, kai si mehuli. Tek kita, Tuhan encidahken

kekelengennNa, maka kita eme kalak si iselamatken Dibata. Iselamatken Dibata kita mentasi wabah pinakit

corona-19 enda. Pemimpin bangsa, aparat pemerintahen, petugas kesehaten kerina ipasu-pasu Dibata pendahinna

guna mabai bangsa enda mentasi bencana nasional virus corona-19 enda. Bage pe kerina korban banci ipulihken

kesehatenna.

Selamat Wari Minggu.

Pdt. Tanda Pinem

(GBKP Rg. Jl. Sei Batang Serangan Medan)

kasih kepada semua orang

kasih kepada saudara

ketekunan

penguasaan diri

pengetahuhan

kebaikan

Iman