RUBRIK : CETOMEDISI : JUNI 2015Oman Abdul Rochman

Estasiun

Gedong nyang ngejogrog di deket bilukan Jalan Ir.H.Juanda, Telok Buyung ama Bulan-Bulan, romanah udah mangkin kliatan boto. Pagerah udah make tembok nyang ditempelin pecahan batu kali, kayanyah emang sengaja dibikin rada nyeni. Lagian emang kalu mao jujur, umpama pengen diplototin be-ejem-ejem ge emang ora bakal mbosenin.

Ntuh tadi baru ngeliat tembokah doang, apalagi kalu kita mao mingser dikit rada ke dalem. Mata kita bakalan nemuin pemandangan nyang mangkinan rame bae. Latarah lega bangat, ibarat kata kalu separo orang Bekasi pada pengen markirin gandaran mostorah di ntuh latar. Naga-naganyah masing ada sisanyah buat bocah pada maen dampu atawa njemur gabah nyang abis dipanen.

Kalu emang lagi ora ada gawean, coba dah nongkrong barang se-jem atawa dua jem mah. Pasti dah, bisa ngliat begimana orang Bekasi nyang mo begawe ke Betawi pada tegere-gere ngoyok-ngoyok kreta nyang jalanah emang rada anter di Estasiun Bekasi, malahan ora jarang banyak nyang ampe rela bejubel-jubel numplek di gerbongah kaya dencis dikalengin supaya kecandak nyampe ke tempat kerjanyah.

Estasiun Bekasi nyang ada sekarang emang ora bisa dipisain ama sejarah Bekasi zaman ganu. Kalu nurut catetan sejarah nyang ada mah, kapanan di gutekan ntuh emang udah jadi pusat keramean dari dulunyah. Malahan Pemimpin Besar Revolusi nyang lagi bepegian naek spur, katanyah pernah ngasoh dan turun di estasiun ini buat ngasih semanget ama para pejuang Bekasi.

Cumenan kita mah pan ora bisa ngaku-ngaku doang. Biar ora kesalahan, murunan emang kudu ada buktinyah. Mengkanyah nyang ngrasa pada punya kebisaan, buruan dah bantuin ngubek-ngubek sejarah ini wilayah. Ora mudu-mudu di gutekan tempat pejuang pada betempur semata, di batian bekas jawara pada bejaban juga kudu didantain. Kapanan katanyah, zaman ganu juga ada nyang beperang buat mbelain tanah aer, tapi ora sedikit juga nyang ngakunyah perang pedahal cumen ngerampok banda orang-orang kaya yang ujung-ujungah cumen buat poya-poya, atawa meres pribumi nyang ora disenengin karna punya kedudukan bagus di tengah rakyat.

Estasiun Bekasi, jadinyah emang mangkin seksih bae. Lima atawa sepuluh taun ke depan, roman-romanah nih tempat bakalan jadi estasiun gede yang gedongah nrelep ora jauh beda ama estasiun-estasiun laen di negeri orang. Sengkilang cumen tempat spur brenti, tapian begaya dikit mah pan ora ngapah-ngapah, nyiapin tempat nyang bisa bikin ati orang nyang baru nibla atawa nontot dari pintu kreta jadi sumringah, adem kayak nyang lagi ngrendem awak di Kali Bekasi.