HKBP Yogyakarta

Partording Ni Partangiangan Parningotan Panaonon Ni Tuhan Jesus

Passion I – IIISelasa-Kamis, 31 Maret-02 April 2015

Pukul 18:00

HKBP YogyakartaJl. I Dewa Nyoman Oka 22 – Kotabaru Yogyakarta 55224 Telp. 548740; 513080 Fax. (0274) 548740

Website: hkbpjogja.org Email: hkbpjogja@gmail.com

Passion ISelasa, 31 Maret 2015

0. Tangiang na hohom / Saat teduh1. Marende BE No. 76: 1 – 2 (BL. 199)2. Votum-Intro-Tangiang:3. Marende BE No. 152: 1 (BL. 120)4. Marende BE No. 77: 4 – 5 (BL. 65)5. Marende BE No. 79: 7 – 8 (BL. 124)6. Koor:7. Marende BE No. 83: 5 (BL. 214)8. Koor:9. Marende BE No. 86: 1 – 2 (BL. 67)10. Jamita:11. Marende BE No. 82: 1 – 3 (Pelean) (BL. 21)12. Panutup: Tangiang & Pasupasu

Passion IIRabu, 01 April 2015

0. Tangiang na hohom / Saat teduh1. Marende BE No. 80: 2 + 4 (BL. 39)2. Votum-Intro-Tangiang:3. Marende BE No. 152: 1 (BL. 120)4. Marende BE No. 179: 3 – 4 (BL. 20)5. Marende BE No. 83: 4 (BL. 214)6. Marende BE No. 173: 1 - 2 (BL. 63)7. Koor:8. Marende BE No. 153: 1 + 4 (BL. 126)9. Koor:10. Marende BE No. 180: 1 + 2 (BL. 278)11. Jamita:12. Marende BE No. 82: 1... (Pelean) (BL. 21)13. Panutup: Tangiang & Pasupasu

Passion IIIKamis, 02 April 2015

0. Tangiang na hohom / Saat teduh1. Marende BE No. 83: 1 - 2 (BL. 214)2. Votum-Intro-Tangiang:3. Marende BE No. 152: 1 (BL. 120)4. Marende BE No. 171: 1 – 2 (BL. 49)5. Marende BE No. 79: 7 - 8 (BL. 124)6. Koor:7. Marende BE No. 180: 1 + 3 (BL. 228)8. Koor:9. Marende BE No. 182: 1 – 2 (BL. 24)10. Jamita:11. Marende BE No. 82: 1... (Pelean) (BL. 21)12. Panutup: Tangiang & Pasupasu

2

Passion ISelasa, 31 Maret 2015

0. Tangiang na hohom / Saat teduh1. Marende BE No. 76: 1 – 2 (BL. 199)2. Votum-Intro-Tangiang:

Agenda:Marhitehite Goar ni Debata Ama dohot goar ni AnakNa Tuhan Jesus Kristus dohot goar ni Tondi Parbadia. Amen.Tabereng ma induk ni haporseaon i jala na paujunghonsa, ima Jesus na manaonhon parsilangon i, singkat ni las ni roha tohapna i hian, so dietong i hailaon, gabe hundul di siamun ni habangsa ni Debata: Paingot-ingot hamu ma Ibana, na pataon-taon paraloan sisongon i dompak Ibana sian angka pardosa asa unang marnaloja hamu, unang mandate tondi muna! Haleluya....Martangiang ma hita, Ale Tuhan Debata, Amanami na di Banua Ginjang! Asi ma rohaM di hami halak na gale on. Di ida ho nagogo do musu nami, sai talu do hami dibahen, ala ni hagaleon nami. Dibahen i hupangido hami tu Ho: Sai pargogoi jala pamonang ma hami maralohon musu i marhite panaonon ni Anak haholongan ni rohaM, Tuhan Jesus Kristus. Amen

3. Marende BE No. 152: 1 (BL. 120)Tabege ma barita panaonon ni Tuhan Jesus andorang so sahat Ibana tu hau pinarsilang i

Jadi diarahon Jesus ma nasampulu dua i, jala didok ma tu nasida: Na nangkok ma hita tu Jerusalem, jala tulus ma tu Anak ni jolma i sasudena, na tarsurat di angka panurirang i. Ai pasahaton ma Ibana tu angka parbegu, gabe insahanna, leaanna jala tijuranna ma Ibana; dung i mulak mangolu ma Ibana di ari patoluhon. Alai ndang diantusi nasida agia otik sian i; na buni do Hata i sian roha nasida, ndang diboto nasida na hinahataonNa i.

Dung i dipinsang angka Sintua ni malim dohot angka parise ma rapot godang, didok nasida: Aha ma bahenonta? Ai lan do tanda dibahen halak i! Molo itapasombu Ibana, porsea ma halak saluhutna tu Ibana, gabe ro ma halak Rom mangarampas tanonta dohot bangsonta.

Alai hehe ma sada sian nasida, i ma si Kayapas, Sintua ni malim di nasataon i, didok ma tu nasida:

3

Nahurang roha do hamu! Ndang dipingkiri rohamuna, denggan do mate sahalak humophop natorop i, unang laho mago sandok bangso i. Alai ndang sian rohana sandiri dihatahon i; ala Sintua ni malim Ibana di nasataon i umbahen na disuriranghon, na naeng mate ma Jesus humophop bangso i.

Alai tahe, ndada holan laho humophop bangso i, alai naeng papunguonNa angka anak ni Debata na marserak dope, laho pasadahon. Asa olat ni sadari i martup-tup ma nasida laho mamusa Ibana. Alai didok nasida ma: Unang ma di pesta i so tung guntur natorop i!

4. Marende BE No. 77: 4 – 5 (BL. 65)Dung i onom ari nari asa dapot pesta Paska i, sahat ma Jesus tu huta

Bethania, na ni inganan ni si Lassarus, na sinunggul ni Jesus sian na mate. Jadi dipauli nasida ma di si sipanganon ujuan di Ibana; si Marta do manghobasi, si Lasarus ma sada donganna mangan disi. Gabe dibuat si Maria ma sahati miak Nardus na arga, naso marsaor, dimiahi ma pat ni Jesus, obuk na do dibahen mangalapu.

Jadi digohi uap ni miak i ma bagas i. Jadi sada sian angka siseanNa, si Judas Iskariot na naeng manjehehon Ibana mandok: Boasa so ginadis miak i arga tolu ratus hupang, bahen silehon-lehon nian tu angka napogos?

Alai ndada napogos sinarihon na. Umbahen na didok Ibana songon i: panangko do Ibana tahe, diusung do asiasi ni halak, ai tu Ibana do dipasahat puroi.

Dung i ninna Jesus ma: pasombu ma Ibana, ai diparade do i hira tu ari hatatanomHi. Ai tongtong do adong napogos di tonga-tonga muna, jala asal ma olo hamu, tarpatongon hamu do na denggan tu nasida; Alai anggo Ahu ndang manongtong di hamuna. Intap na tarbahensa do na niulana i; na manjoloani do Ibana mamiahi pamatangHu songon di na mananom.

Situtu do hatangkon tu hamu: manang di dia di liat portibi on dijamitahon muse Barita nauli on, hatahononna do nang na binahenna i gabe baritana.

5. Marende BE No. 79: 7 – 8 (BL. 124)Dung i torang ni arina i, dibege halak natorop naro tu pesta i, na naeng

ro ma Jesus tu Jerusalem, jadi dibuat nasida ma angka mare-mare laho manomu-nomu Ibana huhut manjou-jouhon: Hosianna! Pinasu-pasuma na ro marhite goar ni Tuhan i, Raja ni Israel.

4

Dung i dapot Jesus ma halode sada, i ma dihunduli hombar tu na tarsurat: Unang ho mabiar ale boru Sion, ida ma: Rajam do na ro, marsihundul di anak ni halode.

Jala halak parise deba sian natorop i mandok tu Ibana: Orai antong angka siseanMi, Guru! Alai ninna ma mangalusi: Hudok ma di hamu, aut mauhom nasida, manjoujou ma angka batu!

Alai dibongoti sibolis do si Judas na margoar Iskariot, sahalak sian nasampulu dua i. Gabe laho Ibana martuptup dohot angka Sintua ni malim raphon angka panungganei, manang dia dalanna pasahathon Ibana tu nasida.

Jadi sian las ni roha nasida marpadan ma nasida mangalehon hepeng tu Ibana. Di oloi si Judas ma i, jadi dilului ma tingki na une pasahathon Ibana so sian pamotoan ni natorop iAlai di ari parhobasan parjolo ni pesta Paska i, didapothon siseanNa ma Jesus, angka ninna ma: Tu dia ma patureon nami di Ho panganon Paska i dipangido rohaM? gabe didok ma: Laho ma hamu tu huta i manopot si anu, dok hamu ma tu Ibana: Tona ni Guru I; na dapot ne ma tingkingKu di ho ma Ahu sorang, laho mangan Paska i rap dohot siseanKu.

Jadi saut ma disuru Ibana siseanNa dua halak jala didok ma tu nasida: Molo laho hamu tu huta i, pajumpang ma hamu di si dohot sada halak na mangusung aek sahudon, Ibana ma ihuthon hamu! Tu Ibana ma dok hamu: Di dia do bilut inganan, asa di si hupangan hami Paska i? Jadi patuduhononna ma tu hamu bilut parginjang sada, na lambas, na tipak hinembangan di si ma pature hamu di hita! Jadi borhat ma siseanNa, dibongoti ma huta i, jadi jumpang nasida ma tutu songon na nidokNa i, gabe dipature ma Paska i. Asa dung bot ari, ro ma Jesus dohot na sampulu dua i.

6. Koor:7. Marende BE No. 83: 5 (BL. 214)

Jadi di na mangan nasida, hehe ma Jesus sian na mangan i, ditanggal ma ulosNa, dibuat ma basahan ditapolhon tu Ibana. Diusehon ma aek tu sambong, dung i diburi ma pat ni angka siseanNa, diapusi ma dohot basahanNa na tinapolhonNa i. Dung i sahat ma Ibana tu si Simon Petrus, jadi didok ma mandok Ibana: Tung Ho ma ale Tuhan, mamuri pathu? Dung i ninna Jesus ma mangalusi Ibana, Ndang diantusi ho pambahenanKu na tu ho anggo nuaeng, muse pe botoonmu i. Dung i didok si Petrus ma tu Ibana: Matua

5

tano on, ndang burionMu pathu. Dung i ninna Jesus ma mangalusi Ibana: Molo so burionKu ho, ndang partohap ho di Ahu. Dung i ninna si Simon Petrus ma: Ale Tuhan, unang ma holan pathu, dohot ma tangan dohot ulungku. Gabe didok Jesus ma tu Ibana, halak naung maridi i, ndang ingkon be burion; ai nunga sude Ibana ias.

Naung ias do anggo hamu, alai ndang luhut hamu. Ai ditanda do sipasahat Ibana, umbahen na didok: Ndang saluhut hamu ias. Asa dung diburi Jesus pat nasida, dipangke ma muse ulosNa, hundul ma Ibana, didok ma tu nasida: ai diantusi hamu do pambahenanKi tu hamu? Digoar hamu do Ahu Guru dohot Tuhan, jadi ture do pandokmu disi, ai i do Ahu tutu. Asa molo Ahu Tuhan jala Guru muna mamuri patmuna, tama ma nang hamu masiburian pat! Ai sitiruon do Hulehon tu hamu, asa dibahen hamu songon naung Hubahen i tu hamu! Na tutu si tutu do na Hudok on tu hamu: Ndang umbalga anak somang sian indukna, ndang sumurung suruan sian na marsuru Ibana. Molo diboto hamu i, martua ma hamu mangulahonsa.

Jadi di na mangan i nasida, ninna Jesus ma: Situtu do na Hudok on tu hamu: sada sian hamu naeng pasahathon Ahu! dung i marsak situtu ma nasida, gabe dipandok be ma tu Ibana: Nda tung ahu i Tuhan ? alai ninna ma mangalusi: Ia i na rap dohot Ahu manurdukhon tanganna tu paringkauan, i do na pasahathon Ahu!

8. Koor:

9. Marende BE No. 86: 1 – 2 (BL. 67)

10. Jamita:

11. Marende BE No. 82: 1 – 3 (Pelean) (BL. 21)

12. Panutup: Tangiang & Pasupasu

6

Passion IIRabu, 01 April 2015

0. Tangiang na hohom / Saat teduh1. Marende BE No. 80: 2 + 4 (BL. 39)

2. Votum-Intro-Tangiang:Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia. Amen. Songon pangkaholongina di angka na di Ibana na di portibion, laos songoni i do dihaholongi nasida ro di ujungna.Haleluya...Martangiang ma hita : Ale Tuhan Debata, Amanami na di Banuaginjang, Parasiroha na sumurung! Na mandok mauliate ma hami tu Ho sian nasa rohanami ala dilehon Ho AnakMu na sasada i tu hamatean humophop hami, asa unang mago na porsea di Ibana, alai asa hangoluan na saleleng ni lelengna di nasida. Tatap ma hami, ale Amanami di bagasan AnakMu Jesus Kristus, na gabe habadiaon dohot hatigoran di hami. Sai sesa ma dosanami saluhut, ala ni pelean na sun denggan, na pinelehonNa i humophop hami, sai paeleng ma pinggolMu tu tangiang nami, jala asi ma rohaM di hami marhitehite AnakMu, Tuhan Jesus Kristus Tuhannami. Amen.

3. Marende BE No. 152: 1 (BL. 120)Tatangihon ma udut ni partinaonan ni Tuhan Jesus andorang so sahat tu hau pinarsilang i.

Tong do nian ujung ni Anak ni Jolma i songon na tarsurat hian; alai marlea do halak na pasahathon Anak ni Jolma i. Tagonan unang ma sanga tubu Ibana tu hasiangan on. Alai adong ma sada sian angka siseanNa i, na hundul jumonok tu Ibana, haholongan ni Jesus i. i ma dihilap si Petrus, jadi ninna ma mandok Ibana: sungkun ma, ise na nidokNa i.

Jadi dipajonok ma tu lambung ni Jesus mandok tu Ibana: Tuhan, ise i? Gabe dialusi Jesus ma: Ia tusi hulehon na santopik na husornophon on, i ma Ibana. Jadi disornophon ma santopik, dilehon ma tu si Judas Iskariot, anak ni si Simon. Jadi dung dibondut i, dibongoti sibolis i ma Ibana.

7

Dung i didok Jesus ma tu Ibana: Humatop ma ula siulaonmu. Asa dung dijalo si Judas na santopik i, pintor laho do Ibana tu balian, alai borngin ma uju i.

Jadi di na mangan i nasida, dihindat Jesus ma roti, dipasupasu ma, diponggoli ma jala diparlehon ma tu angka siseanNa, huhut ma didok: Jalo hamu, pangan hamu, dagingKu do on.

Dung i dihindat ma panginuman i, didok ma mauliate, dilehon ma tu nasida, huhut ma didok: Sude hamu manginum sian i. Ai mudarHu do on, mudar parpadanan i, na niusehon humophop torop, bahen hasesaan ni dosa. Alai hudok ma tu hamu: Na so tupa be inumonKu olat ni on sian parbue ni hau anggur i sahat ro di ari sogot; disi ma inumonKu na imbaru rap dohot hamu di harajaon ni Damang.

4. Marende BE No. 179: 3 – 4 (BL. 20)Jadi dung diendehon nasida ende puji-pujian i, ruar ma nasida tu dolok

Jetun. Disi ma didok Jesus tu nasida: Saluhut do hamu naeng targasip mida Ahu di na saborngin on. Ai na tarsurat do: Lombutanku ma parmahan i, gabe marserak ma birubiru na sapunguan i. Alai ninna si Petrus ma mangalusi Ibana: Agia sude nasida targasip mida Ho, anggo ahu, naso tupa targasip.

Alai ninna Jesus ma mandok Ibana: O Simon, Simon, nunga dipangido sibolis naeng segeonna hamu songon dahanon. Alai Ahu do manangianghon ho, unang mintop haporseaonmi.

Jadi dung mulak sogot roham, pargogoi ma roha ni angka haha-anggim! Alai ninna si Petrus ma mandok Ibana: Tuhan, na hobas do ahu mandongani Ho tu hurungan, nang tu hamatean pe!

Alai ninna Jesus ma: Hudok ma tu ho Petrus: Ndang martatahuak manuk saborngin on, so jolo tolu hali soadahononmu na so tinandam Ahu.

5. Marende BE No. 83: 4 (BL. 214)Dung i sahat ma Jesus rap dohot nasida tu sada porlak, na margoar

Getsemane. Jadi didok ma tu angka siseanNa i: Hundul ma hamu jolo dison saleleng disan Ahu martangiang. Dung i ditogihon ma si Petrus dohot anak ni si Sebedeus na dua i, dung i gabe marsak situtu ma Ibana jala bobonosan. Jadi didok ma tu nasida: Mansai marsak situtu do rohangKu, hira na mate do. Dison ma hamu dungo rap dohot Ahu.

8

Dung i laho ma Ibana saotik tu jolo, dipatungkap ma bohiNa tu tano martangiang, ninna ma: Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangKu, rohaM do. Dung i mulak ma Ibana tu angka siseanNa, jala tarpodom nasida didapot, jadi didok Jesus: Ndang margogo hamu hape dungo rap dohot Ahu nanggo sangombas! dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging

6. Koor:7. Marende BE No. 173: 1 (BL. 63)

Dung i laho ma Ibana paduahalihon martangiang, ninna ma: Ale Amang, molo so tarbahen salpu on, nda ingkon Huinum, sai saut ma lomo ni rohaM!. Dung i di na ro Ibana, tarpodom muse ma siseanNa i didapot, ai mansai dokdok do salibon nasida. Jadi ditadingkon ma laho martangiang patoluhalihon mandok hata ondeng. Dung i didapothon ma muse angka siseanNa i. Jadi didok ma tu nasida: Datdatan muna dope modom dohot maradian?

Nunga dapot tingkina nuaeng, sahat ma Anak ni Jolma i tu tangan ni pardosa. Hehe ma hamu, laho ma hita! Ndi, nunga ro na pasahathon Ahu.

Alai diboto si Judas Parjehe i do inganan i, ai jotjot do marpungu Jesus tu si dohot angka siseanNa. Ia si Judas, diarahon ma angka soldadu dohot angka naposo ni Sintua ni malim, didapothon ma tusi mantat sulusulu, palito dohot sinjata.

Diboto Jesus do saluhut na naeng songgop tu Ibana, jala ruar ma Ibana, didok ma tu nasida: Ise do na jinalahanmu ? Gabe ninna nasida ma mangalusi Ibana: Jesus halak Nasaret i do! Dung i ninna Jesus ma mandok nasida: Ahu do i! alai dohot do si Judas siparjehe i jongjong di lambung nasida. Asa dung didok tu nasida: Ahu do i, sumurut ma nasida, angka martinggangan ma tu tano.

Dung i diulahi ma manungkun nasida: Ise do na niluluan muna? jadi didok nasida ma: Jesus halak Nasaret i do! Dung i ninna Jesus ma mangalusi nasida: Nunga hupaboa tu hamu, Ahu do i. Asa molo Ahu dilului hamu, loas ma laho angka on! Ai naeng jumpang na nidokNa i: Ndang adong na mago Hubahen agia sada sian angka na nilehonMi tu Ahu.

Alai nunga dipabotohon parjehe i hian partinandaan tu nasida ai didok do: Ia i na huumma, Ibana ma i. I ma tangkup hamu! asa pintor didapothon ma Jesus, didok ma: Tabi di Ho Guru! laos diumma. Alai

9

ninna Jesus ma mandok Ibana: Marhua ho tuson, Anggia? O Judas pangummaon do hape dibahen ho pasahathon Anak ni jolma i. Dung i ro ma nasida, dilaluhon ma tangan nasida tu Jesus manangkup Ibana.

8. Koor:9. Marende BE No. 153: 1 + 4 (BL. 126)

Dung i adong ma sada sian angka dongan ni Jesus mangalaluhon tanganna, disintak ma podangna, ditampulhon ma tu sahalak naposo ni Sintua ni malim i, dipisikhon ma pinggolna.

Jadi didok Jesus ma tu Ibana: Pasarung podangmi, ai na manintak podang, mago ma bahenon ni podang! Ai na so tarbahen Ahu do di roham mangido sian Damang, asa dipadiri di Ahu saonari lobi sian sampulu dua loksa surusuruan ? alai songon dia ma disi saut hata ni surat i na mandok: Ingkon masa do na songon i! uju i ma didok Jesus tu angka natorop i: Hira na dompak panamun do hamu hehe, marpodang jala marlombut-lombut manangkup Ahu.

Ariari do Ahu nian hundul mangajari di Bagas Joro, so adong ditangkup hamu Ahu. Alai na masa do sudena on, asa jumpang hata ni angka Panurirang i. Dung i ditadinghon saluhut sisean i ma Ibana laho marporus.

Dung i ditangkup angka soldadu dohot induk nasida ro di angka naposo ni Jahudi ma Jesus jala diihoti, jala ditogihon ma Ibana jumolo tu si Hannas, i ma simatua ni si Kayapas, Sintua ni malim di na sataon i. I ma si Kayapas naung mandok tu angka Jahudi: Dengganan do mate sahalak humophop bangso.

Alai diihuthon si Simon Petrus dohot sisean na sada nari ma Jesus. Na masitandaan do sisean na sada i dohot Sintua ni malim i, jadi bongot ma Ibana rap dohot Jesus tu alaman ni malim i.

10. Koor:

11. Marende BE No. 180: 1 + 2 (BL. 278)

12. Jamita:

13. Marende BE No. 82: 1... (Pelean) (BL. 21)

14. Panutup: Tangiang & Pasupasu

10

Passion IIIKamis, 02 April 2015

0. Tangiang na hohom / Saat teduh1. Marende BE No. 83: 1 - 2 (BL. 214)2. Votum-Intro-Tangiang:

Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia. Amen.Tagan jolma Kristus, dipelehon do angka pangidoanNa dohot eleh-elekNa, mardongan angguk bolon dohot iluilu tu na tuk paluahon Ibana sian hamatean, jadi ditangihon do Ibana, gabe malua sian hatahuton i, ai atik pe Anak Ibana, diguruhon do pangoloion marhite sian na tinaonNa i! Jadi dung rimpas, gabe sihorhon haluaon saleleng-lelengna do Ibana di sude na mangoloi Ibana.Haleluya...Martangiang ma hita : Ale Tuhan Debata, Amanami na di Banuaginjang, Parasiroha na sumurung! Na mandok mauliate ma hami tu Ho sian nasa rohanami ala dilehon Ho AnakMu na sasada i tu hamatean humophop hami, asa unang mago na porsea di Ibana, alai asa hangoluan na saleleng ni lelengna di nasida. Tatap ma hami, ale Amanami di bagasan AnakMu Jesus Kristus, na gabe habadiaon dohot hatigoran di hami. Sai sesa ma dosanami saluhut, ala ni pelean na sun denggan, na pinelehonNa i humophop hami, sai paeleng ma pinggolMu tu tangiang nami, jala asi ma rohaM di hami marhitehite AnakMu. Tuhan Jesus Kristus Tuhannami. Amen.

3. Marende BE No. 152: 1 (BL. 120)Tatangihon ma udut ni partinaonan ni Tuhan Jesus andorang so sahat tu hau pinarsilang i.

Alai disungkun Sintua ni malim i ma Jesus taringot tu angka siseanNa dohot taringot tu podaNa i. Jadi dialusi Jesus ma Ibana ninna ma: Patar do hatangKi di hatoropan. Na tongtong do Ahu mangajari na sailaon di bagasan parguruan nang di bagas Joro pe, parpunguan ni saluhutna halak Jahudi. Ndang adong manang aha huhatahon marsibuni. Boasa Ahu disungkun ho? Nasida naung umbege hatangKi, i ma sungkun! Ai diboto nasida do na Huhatahon i. Dung didok Jesus songon i, di pastap sada opas

11

na jongjong di si ma Ibana, huhut ma didok; songon i pangalusiM tu Sintua ni malim i?

Dung i ninna Jesus ma mangalusi Ibana: Ia na hurang na hudok, hajongjonghon na hurang, alai anggo na hona do, boasa pastaponmu Ahu?

Asa disuru si Hannas ma Ibana naung tinali i tu Sintua ni malim si Kayapas, disi do marpungu angka siboto surat dohot Sintua ni natorop. Alai sai mangihut do si Petrus mandao-dao sahat ro di alaman ni Sintua ni malim i. Laos bongot ma Ibana tu bagasan, laho hundul tu si rap dohot angka naposo marnida ujungna. Alai anggo angka Sintua ni malim ro di sandok rapot godang i, mangalului panindangion gapgap dompak Jesus, na tuk mambahen Ibana marutang hosa.

Alai parpudi ro ma dua halak, ninna ma: Didok Halak on: Tarbahen Ahu do mangalohai Joro ni Debata jala pajongjongonNa i sumuang di bagasan tolu ari. Dung i hehe ma Sintua ni malim i, mandok tu Ibana: Ndang alusanMu na hinatindanghon ni nasida dompak Ho? Alai sai hohom do anggo Jesus.

Dung i dipanghulingi Sintua ni malim i ma Ibana ninna: Hupatolon ma Ho tu Debata Siparngolu i, asa dipaboa Ho tu hami manang na tutu Ho Kristus, Anak ni Debata! Dung i didok Jesus ma tu Ibana: Songon na nidokmi ma tutu! Alai hudok ma tu hamu: Olat ni on ma idaon muna Anak ni Jolma i, hundul di siamun ni hagoon jala ro di atas ombun ni langit.

Gabe diribakhon Sintua ni malim ma paheanna mandok: Na mangaleai Debata do Ibana. Pola luluan dope sitindangi? Nunga dibege hamu pangaleaionNa i! Beha do di rohamu? Dung i ninna nasida ma mangalusi: Marutang hosa ma Ibana! jadi ditijuri nasida ma bohiNa, na deba manompuk, na deba mangalinsingi huhut mandok: Surirangi hami, Kristus, ise do na mamunu Ho?

Alai na hundul do anggo si Petrus di alaman i, jadi didapothon sada parompuan ma Ibana mandok: Dohot do ho dongan ni Jesus na sian Galilea i?

Alai diporso si Petrus do, didok ma: Ndang adong huboto, jala ndang huantusi na nidokmi! Laos ruar ma Ibana tu alaman jolo-jolo, jala martahuak ma manuk.

Alai marnida Ibana, diulahi naposo boruboru i ma mandok tu angka na jongjong disi. On do sada sian nasida. Alai mamorso muse anggo Ibana.

12

Jadi dung satongkin nari, didok angka na jongjong na disi ma muse mandok si Petrus: Atehe tongon do ho dongan nasida, ai halak Galilea do ho. Gabe dipungka si Petrus ma mambuburahon dirina huhut manolon-nolon didok ma: Ndang hutanda jolma na nidokmuna i! Dung i mamintor martahuak ma manuk paduahalihon.

Jadi diingot si Petrus ma na nidok ni Jesus i tu Ibana: Tolu hali do soadahononmu Ahu, andorang so martahuak manuk paduahalihon. Jadi marningot i, tumatangis ma Ibana.

Jadi dung diida si Judas Iskariot parjehe i, na naeng hona uhum nama Jesus, disolsoli ma rohana, dipaulak ma na tolupulu rupia i tu angka Sintua ni malim dohot tu Sintua ni bangso i, ninna ma: Sala do ahu, hujehehon do hape na so marpipot! alai didok nasida ma: Ndang ro di hami i! Ho do na sari disi. Jadi ditimpalhon ma perak i tu bagasan joro i, laos sumurut sian i laho maningkot.

Alai dibuat Sintua ni malim ma hepeng i, ninna ma: Ndang jadi padomuon i tu arta ni Joro, ai tuhor ni mudar do i! Jadi mardos ni roha ma nasida manuhorhonsa tu ladang ni pande hudon, bahen parbandaan ni halak dagang. Alai ni i do umbahen margoar i, Ladang Mudar ro di sadari on.

4. Marende BE No. 171: 1 – 2 (BL. 49)Asa ditogihon nasida ma Jesus sian jolo ni si Kayapas tu kantor. Alai

sogot ma manogot i. Ndang na bongot anggo nasida tu kantor asa unang tarsubang nasida laho manganhon Paska i. Gabe ruar ma si Latus mandapothon nasida, didok ma: Pangaluan dia do diboan hamu dompak Halak on? Dung i, ninna nasida ma mangalusi: Aut unang so sibahen na jahat Halak on, ndang tagamon pasahaton nami Ibana tu ho. Gabe ninna si Latus ma mandok nasida: Boan hamu ma Ibana, uhum hamu ma Ibana marguru tu adat muna. Alai ninna angka Jahudi ma mandok Ibana: Ndang jadi pusaonnami manang ise, jadi dialuhon nasida ma Ibana, ninna: Na dapot hami do On pabalik-balikhon bangso nami jala mangorai mangalehon guguan tu Kesar di pandok: Raja Kristus do Ibana.

Jadi dibongoti si Latus ma muse kantorna dijou ma Jesus, didok ma tu Ibana: Atehe, Ho do Raja ni Jahudi? ro ma alus ni Jesus: Na sian roham do na nidokmi manang na nidok ni halak do i tu ho taringot tu Ahu? Gabe dialusi si Latus ma: ai halak Jahudi do ahu! bangsomi dohot angka Sintua ni malim i do pasahathon Ho tu ahu, aha do na binahenMu?

Jadi dialusi Jesus ma: Ndang sian portibi on harajaonKu, ndang tarbahen so mangalo angka naposongKu asa unang sahat Ahu tu tangan ni angka Jahudi. Alai ndang songon i harajaonKi.

13

Dungi ninna si Latus ma mandok Ibana: Asa raja do Ho? Jadi ninna Jesus ma mangalusi: Songon na nidokmi ma tutu. Raja do Ahu: Umbahen na tubu Ahu jala umbahen na ro Ahu tu portibi on, asa Huhatindanghon hasintongan i. Ganup na sian hasintongan i, tangihonon ni i do soarangKu. Jadi ninna si Latus ma mandok Ibana: Aha ma i hasintongan i? jadi dung didok songon i, ruar ma Ibana muse manopot angka Jahudi mandok tu nasida: Ndang jumpang ahu manang dia salana.

Alai lam digogohon nasida ma mandok: Digunturi Ibana do bangso i, ai mangajari do Ibana di sandok tano Judea mamungka sian Galilea sahat ro tuson. Alai umbege i si Latus, manungkun ma Ibana, manang na halak Galilea Jesus. Jala dung di boto na sian gomgoman ni si Herodes Ibana, disuru ma Ibana tu jolo ni si Herodes, ai tongon do Ibana di huta Jerusalem uju i. Marnida Jesus i si Herodes, las situtu ma rohana; ai nunga nania lelengna, sai naeng idaonna tanda sian Ibana sipatupaonNa. Jadi godang ma disungkunhon tu Ibana; alai ndang dialusi Jesus Ibana. Di si do angka Sintua ni malim ro di sibotosurat, jala gogo-gogo do Ibana dialuhon. Ia si Herodes rap dohot donganna, direhe-rehei jala dilea-leai do Ibana, disolukhon ma pahean na arga tu Ibana, laos songon i ma disuru Ibana mulak tu si Latus. Jadi di na sadari i ma marale-ale si Herodes dohot si Latus, ai na masihosoman do nasida anggo na sailaon.

5. Marende BE No. 79: 7 - 8 (BL. 124)Alai peam do dipalua panguhum i di Pesta i sada halak na tarhurung,

marguru tu na tinodo ni natorop. Alai adong ma tarhurung uju i sada parjahat na sumalin na margoar si Barabas. Jadi di na pungu i nasida, didok si Latus ma tu nasida: Ise do dipangido hamu paluaonku, si Barabas manang Jesus na targoar Kristus i do? Ai diboto do, late ni roha nasida do umbahen na dipasahat nasida Ibana. Alai sai disosoi angka Sintua ni malim rap dohot Sintua ni bangso i do natorop i, asa dipangido nasida malua si Barrabas, alai pusaon do anggo Jesus. Dung i ninna panguhum i ma mandok nasida: Ise sian na dua i dipangido hamu paluaonku? Jadi didok nasida ma: si Barabas, dung i didok si Latus ma tu nasida: antong aha ma bahenonku tu Jesus, na targoar Kristus i? Gabe saluhutna nasida mandok: Parsilanghon ma! alai ninna panguhum i ma: Ai aha ma najahat dibahen? Jadi lam gogo ma dipanjouhon: Parsilanghon ma!

Dung i di togu si Latus ma Jesus, didokhon ma linsingan, jadi di dandani soldadu ma sungsang duri bahen tumpal, diampehon ma i tu uluNa; baju dap-dap ma dialithon tu dagingNa. Dung i ro ma nasida tu joloNa mandok: Tabi di Ho, ale Raja ni Jahudi! laos dipastapi ma Ibana. Dung i ruar ma muse si Latus, didok ma tu angka Jahudi: Ida hamu ma, hutogihon do Ibana tu jolo muna asa diboto hamu na so adong jumpang

14

ahu salaNa. Laos ruar ma Jesus manjujung sungsang duri jala marbaju dap-dap.

6. Koor:7. Marende BE No. 180: 1 + 3 (BL. 228)

Jadi didok si Latus ma tu nasida: Ida hamu ma jolma i? Asa dung di ida Sintua ni malim dohot angka naposo Ibana, dijouhon nasida ma: Parsilanghon, parsilanghon ma Ibana! Dung i didok si Latus ma tu nasida: Boan hamu ma Ibana, parsilanghon hamu ma; ai dang jumpang ahu salaNa. Gabe dialusi angka Jahudi ma Ibana ninna ma: Marguru tu patik nami, ingkon marutang hosa Ibana dibahen do diriNa Anak ni Debata. Umbege i si Latus lam ganda ma biarna. Dung i diulahi muse tu kantorna, didok ma tu Jesus: Sian dia do Ho? Alai ndang dialusi Jesus Ibana.

Dung i didok si Latus ma tu Ibana: Ndang angkupanMu ahu manghatai? Ndang diboto Ho, marhuaso do ahu paluahon Ho jala marhuaso parsilanghon Ho? Jadi dialusi Jesus ma: Ndang adong huasom mangago Ahu, aut unang dilehon i tu ho sian ginjang. Dibahen i gumodang do dosa ni na pasahathon Ahu tu ho. Jadi olat ni i ma dilului si Latus dalan paluahon Ibana.

Alai manjujui ma angka Jahudi, ninna do: Molo dipalua Ho do on, ndang ale-ale ni kesar ho! Ai namangalo kesar i do ganup na mambahen dirina gabe Raja. Asa dung dibege si Latus hata i. Ditogihon ma Jesus haruar, laos hundul Ibana di habangsa paruhuman i, na di inganan na margoar: Pantar Batu, (Gabbata didok anggo di hata Heber). Ima na masa di ari parhobasan Paska i, mareak hos ni ari. Dung i didok ma tu angka Jahudi: Ida hamu ma Rajamuna! Alai digogohon nasida manjouhon: Padao, padao ma i, parsilanghon ma Ibana! Dung i didok si Latus ma tu nasida: Parsilanghononku ma Raja muna? Jadi dialusi angka Sintua ni malim i ma: ndang adong Raja nami dungkon ni kesar i!

Asa dung di ida si Latus, na so marguna hatana, lam ganda tahe gaorna, dibuat ma aek mamuri tangnanna di jolo ni natorop i, huhut mandok: Lias do ahu sian mudar ni on! Hamu do na sari disi! Dung i ninna sude natorop i ma: Marsapata tu hami dohot tu ianakhon nami ma mudarNa i, Dung i saut ma dipalua si Barabas. Alai anggo Jesus dilinsingi, dung i dipasahat ma, asa diparsilanghon.

8. Koor:9. Marende BE No. 182: 1 – 2 (BL. 24)10. Jamita:11. Marende BE No. 82: 1... (Pelean) (BL. 21)12. Panutup: Tangiang & Pasupasu

15

.

16

HKBP YogyakartaJl. I Dewa Nyoman Oka 22 – Kotabaru Yogyakarta 55224 Telp. 548740; 513080 Fax. (0274) 548740

Website: hkbpjogja.org Email: hkbpjogja@gmail.com

17