ALUA PASAMBAHAN PAMBUKAK KATO

Antaro Sutan Karando (si pangkalan) <---> jo Sutan Mudo (si alek nan datang )

Si pangkalan :

Kapado Sutan Mudo parundingan datang, sunguahpun ka Sutan Mudo tibonyo sarapek-papeknyo

kapado ninik mamak sarato bundo kanduang tamasuak ipa bisan sarato jo dunsanak sakuliliang.

Sambah manyambah kito pulangkan kapado Allah laii kato nan kakito pakatokan, apolah nan

kamanjadi buah kato tantu bapokok pangka di hari nan kapatang. Silang bapokok karajo nan

bapangka siriah bacabiak pinang bagatok kulansiang lapeh padah talayang kapado ninik jo mamak,

ipa bisan kok jauh pangilan kato kok dakek pangilan siriah.

Laii dihari sahari nangko , ninik jo mamak, ipa bisan sarato dunsanak nan hadia, kok janji lai ditapak

ikara lai bamuliakan, labuah panjang lah baturuik, laman leba lah batampuah, jajang takanak lah

banaiki, banduak tarantang lah batapiak, alah duduk dilapiak nan salai, kok dibilang maisok alah

sapadam baro, mangunyak alah skariang sapah . laii parundiangan nan kadisampaikan kapado Sutan

modo satantangan diagak-agak nan katabik di kiro-kiro nan katumbuah sabalun kato dikatokan

sabalun mukasuik ,di kamukokan, diateh rumah baujuang –bapangka yobanan duduak nak baio tagak

nak baramuah jo Sutan Mudo sarato ninik mamak yang ado, sakian sambah tarebak kahadapan

sutan.

Lah sampai rundiang Sutan Karando (jawab stutan karando, sakiro-kiro alah)

Jawab si alek :

Sunat kato baulang pasa jalan dek batampuah apa kaji dek baulang tantu sapanjang parundingan

sutan nan lah terabak kahapan ambo, nan ka ambo junjuang tinggi nan kadilabuak gadang, aratinyo

parundiangan Sutan Karando nan ka ambo ulang. Apolah parundingan Sutan tadi Sambah

manyambah kito pulangkan kapado Allah laii kato nan kakito pakatokan, apolah nan kamanjadi buah

kato tantu bapokok pangka di hari nan kapatang. Silang bapokok karajo nan bapangka siriah bacabiak

pinang bagatok kulansiang lapeh padah talayang kapado ninik jo mamak, ipa bisan kok jauh pangilan

kato kok dakek pangilan siriah.

Laii dihari sahari nangko , ninik jo mamak, ipa bisan sarato dunsanak nan hadia, kok janji lai ditapak

ikara lai bamuliakan, labuah panjang lah baturuik, laman leba lah batampuah, jajang takanak lah

banaiki, banduak tarantang lah batapiak, alah duduk dilapiak nan salai, kok dibilang maisok alah

sapadam baro, mangunyak alah skariang sapah . laii parundiangan nan kadisampaikan kapado Sutan

modo satantangan diagak-agak nan katabik di kiro-kiro nan katumbuah sabalun kato dikatokan

sabalun mukasuik ,di kamukokan, diateh rumah baujuang bapangka yobanan duduak nak baio tagak

nak baramuah jo Sutan Mudo sarato ninik mamak yang ado, kan baitu rundiang Sutan Karano nan

katangah; ( Yo bana Sutan Mudo ) Satantangan kito dan baadok batunggalan mungkin paham saukua

bana sasuai tapi bak kecek orang tuo-tuo lamak siriah lega cararo lamak kato lega bunyi , lamak luak

di kunyah kunyah. Dicari aia nan janiah sayak nan landai supayo kailia sarangkuah dayuang kamudiak

satumpu galah; Lai parunduangan Sutan nan katangah ka ambo paiyo patidoan laikilah dalam adaik

nan baitu.

(Sutan Karando) -----.> Mulonyo rundiang kadi sampaikan ka Sutan Mudo yo kailia nak sarangkuah

dayuang kamudiak nak satumpu galah yo kato babao bamufkaik Sutan Mudo. …. ‘Saba mananti Sutan

Karando’

Kambali Parundignan ka Sutan Karando, dari tadi Sutan manunggu ambo merejeng kato mufkaik, lah

bulek aia kapamuluah lah bulek kato jo mufakaik, kok bulek labuliah digolongkan kok picak lah buliah

dilayangkan kadisampain ka Sutan Karando. Laii kabanaran nan sutan kamukoan kanan rami nan

tarebak kanan banyak satantangan diagak-agak nan katabik kiro-kiro nan katumbuah rasonyo disutan

takilan dek kami tabayang pulo artinyo lapiak dan duo rasian ceik, ikolah pambarinyo Sutan.

Sampai Sutan Mudo (sakiro-kiro alah).

Dari Tadi ambo manunggu Sutan Mudo mambiiak kato baiyo mancari kato nan bana lah dapek buah

jo bari alah diantaan pulo kapado ambo, sauai jo pambirian sutan “lapiak dan duo rasian ceik”.

Rasonyo parundiangan kito lah tibo golek dinandata kok lalok lah samo lamak kok makan alah samo

kanyang alah tampan baranti parundigan kito Sutan

Yo di situ tibonya Sutan Mudo “ kok dima katabiknyo kan samo manunggu kito Sutan”***

di Tulis Oleh : Z. DT. TAN MALAKO, SH. M.Si

Pambukak Kato

Posted by Nagari Sitalang on 25 Februari 2010

1 Votes

Disusun Kembali Oleh: I.St. Sinaro

PANGKA

Assalamualaikum, warahmatullahi wabarakatuh ……

Sambah sujuik di Pangulu, sabarek bungka nan piawai, naraco luruih main daun, indak basibak jo

basisiah, bukan bainggo jo babateh,

—- sambah kapado Niniak Mamak nan gadang basa batuah, nan bapucuak sabana bulek, nan baurek

sabana tunggang, dianjuang tinggi, diamba gadang, sandi andiko dalam kampuang, tampuak jo

tangkai di nagari.

—– Naan bak umpamo kayu gadang manangah koto: Baurek limbago matan, badahan cupak jo

gantang, barantiang barih balabeh, babungo rimbun dek adat, babuah kato nan bana. – Buliah baselo

diureknyo, dapek basanda dibatangnyo, gantuangan cupak nan duo.

—- Sampai kapado Imam Katik, bila-maulana jo Tuanku, nan tau dihala dengan haram, sarato sah

dengan bata, suluah bendang Adat-limbago.

—- Hulubalang jo Ampang Limo, jo manti pagawai Adat, parik dalam pagaran kokoh.

—– Cadiak jo tau-pandai, nan arih jo bijaksano; tau di angin nan baseru, tau diombak nan basabuang,

sarato dahan kamaimpok, ataupun rantiang kamancucuak.

–Tau diujuang kato sampai, balun bakilek lah bakalam, bulan lah sangkap tigo puluah.

– Takilek ikan dalam aiya, ikan takilek jalo tibo, lah tantu jantan batinonyo.

—– Sarato nan mudo pambimbiang dunia, nan capek kaki ringan tangan, capek kaki indak

manaruang, capek tangan indak mamacah.

–Aso tarantang dua sudah, hati suci bamuko janiah; tau dimalu dengan sopan, sarato raso jo pareso.

—- Taruih pulo ka Bundo Kanduang, limpapeh rumah nan gadang, sumarak di dalam kampuang,

hiasan dalam nagari. Kok iduik tampek banasa, kok mati bakeh baniat, kaunduang-unduang ka

Madinah, kapayuang panji kasarugo; amban puruak aluang bunian, urang nan duduak jo sukatan. —-

Kalalawa dipulau Rimbang

Anak ruso mati tadabiah

Kok gawa mintak ditimbang

Kok doso ampun nan labiah

Bukan tambilang mangulampai

Tambilang panggali pakuburan

Bukan mambilang tando pandai

Mambilang untuak dipasambahkan

PANGKA

Takalo maso dahulunyo, samusim maso saisuak …………

Katiko langik basintak turun, bumi basintak naiak, lawuik sacampak jalo, tanah Darek balun lai leba,

nan timbua gunuang Barapi.

—- Lorong dininiak-muyang kito; asa-usua kalau dikaji, didalam sitambo lamo, sapiah balahan tigo

jurai. – Sajurai kabanda Cino, sajurai kabanua Ruhum, nan sajurai kapalau Ameh nangko.

—- Pihak dek St. Maharjodirajo taniat didalam hati, tacinto dalam kiro-kiro, balaiya inyo maso itu,

diateh dandang nan sabuah, cukuik jo cati Bilang pandai… Dek lamo dandang balaiya; didalam lawik

baharullah, tampaklah api takijok-kijok, gunuang suatu maso itu; banamo gunuang Marapi ….Sinan

sirangkak nan badangkang, sarato buayo putiah daguak, dibatu ampa putiah, dibukik Patah Patigo,

banamo Bukik siguntang-guntang….

Dimano titiak palito

Dibaliak telong nan batali

Dimano turun niniak kito

Iyo dipuncak gunuang Marapi

Basentak turun kabawah, lah tibo diguguak ampang, sinan langgundi nan baselo, disinan mulo

bataratak, sabalun bakorong jo bakampuang, sabalun bakato jo nagari, maso badeta-deta upiah,

maso bacawan panarahan.—

Dek lamo alam baputa. – Urang batambah kambang juo, kamanakan batambah banyak; dipabueklah

sawah jo ladang.- Dibuek Adat dikarang undang, disusun tangkai ciyek-ciyek, dipaku ka tiang panjang,

makanan urang tigo-luwak.

–Manolah luwak nan tigo:

Nan tuo luwak Tanah Data,

nan tangah luwak Agam,

nan bonsu luwak Limo Puluah.—-

Nan disabuik luwak Tanah Data: Babatu Bungo-satankai, basungai bakayo-tarok, bakampuang

dibaliak labuah, banamo si dusun-tuo, balimo kaum disinan. – Limo Kaum duo-baleh-koto, sambilan

koto didalam, duo baleh anak kotonyo, —- Batabek basawah-tangah, ikua labuah tanjuang-

sungayang, sungai tarap salapan batua, sijangek koto badampiang, bapintu kasungai-patai, bajanjang

kakoto-rajo, babasa kaampek-balai. Panitahan disungai-tarab, Mangkudun disumaniak, Indomo

disaruaso, tuan gadang dibatipuah, harimau-campo kotopiliang. Balubuak tigo batanjuang tigo,

manolah lubuak nan tigo: Partamu lubuak sikarah, kaduo lubuak simawang, katigo lubuak sipunai.

Tasabuik tanjuang nantigo: Partamu tanjuang sungayang, kaduo tanjuang barulak, katigo jo tanjuang

alam.

- Adopun nan dikatokan luwak Agam: Nan salilik gunuang Marapi saedaran gunuang Singgalang,

sabalik danau Maninjau…. Ampek-angkek pado mulonyo, agam biaro balai gurah, lambah jo

panampuang, canduang jo koto laweh, lasi bukik batabuah, parik putuih jo tanjuang alam, pasia jo

ampang gadang. – Sariak jo sungai pua, batagak batu pulano, kurai jo banuhampu, sianok jo koto

gadang.- Balingka koto pambatan, guguak tabek sirajo, kamang ilian jo kamang mudiak, tilatang jo

parik rantang, kapau sarato magek, salo jo koto baru. –Sungai janiah jo tabek panjang, ujuang guguak

jo padang tarok, sungai angek sungai cubadak. – Koto Tinggi jo kubang pipik, koto gadang pincuran

puti, lapeh kalawang tigo balai, matua jo palimbayan, malalak jo sungai landia.- Maninjau jo sungai

batang tanjungsani bayua jo koto kaciak, koto gadang koto malintang, sialang jo garagahan, sitalang

jo batu kambiang, manggopoh jo lubuak basuang.—–

Nan dikatokan luwak limo puluah: Dari sisauak sungai rimbang, sampai kasikokoh pinang tuo,

kasipisak pisau anyuik, sialang balantak basi, kampa kiri jo kampa kanan.—-

Suayan sungai balantiak, sariak laweh jo tambun ijuak, batu ampa jo koto tangah, babai durian

gadang.- Aiya tabik sungai kamuyang, situjuah jo banda dalam, limbukan padang karambia, sicincin jo

aua kuniang, tiaka jo payo basuang.- Mungo jo andaleh, taram bukik limbuku, batu balang koto nan

gadang, Lunang koto nan ampek.- Gantiang jo koto laweh, suliki jo sungai rimbang, tiaka balai

mansiro, talago jo balai tangah,- Taeh jo simalanggang, piobang sungai baringin, gurun lubuak

batinggkok, tarantang jo sari lamak, arau-solok jo padang laweh, Gaduaik jo tabiang tinggi, sitanang

muaro lakin, halaban jo ampalu, surau jo labuah gunuang.

jikok dikambang saleba alam

Jikok dibalun sabalun kuku

Tantang nangko basudah kalam

Tambo sakiro itu dulu

Tungkek galah Amat Dirajo

Sitaba dibaliiak pakan

Kalau salah tobatlah ambo

Kok bana samo amalkan

PANGKA

St. Maruhun???….

ALEK

Ambo….

PANGKA

Sambah batibokan pado sutan.-

PANGKA

Manitahlah ! …..

PANGKA

Pihak dek kami sipangkalan, ditampek hujan barasah paneh bapuhun, nan manyusun-mahatok

pakarjaan dirumah nagko; sakironyo ado kato sapatah kabasabuik, rundiang sabuah nak katangah,

iyo katarabik dari diri ambo… sungguahpun katarabik dari diri ambo, bukanlah ceceh karano aka,

bukan geneang karano kain, sorong lompatan digalanggang, tapi ambo kok pai jo rundiangan, nan

lain tingga jo mupakaik. — Apolah buah parsambahan nan kabatatiangkan kabakeh Sutan, yaitu adok

kakami sipangkalan. – Dek sarik bakisa di-nan sampik, suko batenggang di-nan tidak, mako satantang

panantian kami siko, mungkin kabasuo sumbang-salah, sasek jo gawa. – Kok tibo indak tapabasokan,

datang indak tamuliakan. – Ndak basuo tampan jo taratik, lelo jo karenah; nan patuik talatak diulu

tailiakan, ipa bisan taparampiakan, mohon dimintak banyak-banyak, karilahan Sutan gadang-

gadang…. Sakian sambah pado Sutan.

ALEK

Ma-nyo St. Sinaro?-

PANGKA¬

Lai Sutan….

ALEK

Sambah tibo pado Sutan.-

PANGKA

Manitahlah ….

ALEK

Walaupun ka-Sutan surang tampek ambo mahantarkan sambah; tapi nan manjadi ujuik-mungkasuik

ambo bana, iyolah kapado angku-angku niniak mamak, nan gadang-basa-batuah, – Urek tunggang

pucuak nan bulek dinagari, dahan rampak daun nan rimbun dipusako, putiak labek buah nan ranun,

makanan urang saalamnyo.— Langkok sarato Imam Katik, palito nan tidak kunjuang padam, suluah-

nyalo maso didunia, bendangnyo sampai ka-Akhirat; nan duduaknyo bacamin kitab, tagaknyo rintang

jo pituah. —Taruih kapado Cadiak Pandai, urang nan arih-candokio; pandai maagak-mahagiahkan,

kok runciang indak mancucuak, tajamnyo indak malukoi, pasak kungkuang kunci nan taguah,

sumarak koto jo nagari. —- Mako nak salangkok ganoknyolah salam jo sambah ambo, kapado silang

nan bapangka, karajo nan bajunjuang; nan maharah nan maico, nan mananai-malatakkan,

pakarajaan diateh rumah gadang nangko: Ujuang pasambahan kapado St. Sinaro.

PANGKA

Yooooolah ….

ALEK

A-lah nan maanjadi buah parsambahan ambo: mandanga imbauan Sutan cako ; gumanta sugalo

batang tubuah, bakipeh paluah kadado, bakaja darah kamuko, apolah sabab dek baitu …. Lariak

kapado badan ambo sutan, ibaraik biduak kaciak nan jolong sudah: Kalangkapan balun lai cukuik,

balaiya ditapi-tapi, katangah takuik dek galombang, kapulau garik dek buayo, lakek pituah Sutan Juo.-

Baburu kapadang data

Dapeklah ruso balang kaki

Dihalau katangah padang …

Baguru kapalang-aja

Baru baraja guru mati

Disilau surek sureklah ilang

Baguncang bumi jo langik, barombak lawik-sailan, bakumpua karang katapi, kok karam ambo tantang

itu sutan . —-

Akan tetapi sasudah ditimbang ma-ana kato, disilau ma-ana ragi; nyatolah nan kato wajib dijawab,

nan gayuang wajib disambuik…. Ba-a satantang dari pado itu: Adok kabadan diri ambo kiniko,

tapeklah bak mamangan urang juo: Saibarat urang pai manyumpik; Dicari kutiko baiak, dipiliah maso

nan elok; mako diambiak galah salapan, lalu bajalan masuak hutan. – lah tibo dirimbo nan satumpak,

dipandang ilia jo mudiak, diliyek kiri jo kanan, tampaklah si buruang nuri, inggok dikayu nan

sabatang, sadang maangirai-ngirai sayok, sadang malapeh-laapeh payah…. Lalu diambik sumpitan

gadang, sarato damak nan baipuah, disumpik buruang didahan.-

Satibo damak diateh, bagaluik jo bungo kambang, babeenda jo buah ranun, babega-bega jo awan. –

Mako samantaro buruang nak katangan, diwalakkan kalam sakutiko, mananti Sutan samantaro, lai

kadalam bana-tu stan ???….

PANGKA

Lah sampai dek St. Maruhun ?.-

ALEK

Sakiro alah ….

PANGKA

Sapanjang buah kabanaran Sutan tadi, lah susunan Adat jo limbago…. Kalau adat ado batangkai,

pusako ado batampuak, kok undang ado talinyo.- Mangabek undang jo sakato, mangabek kato jo

mupakaik, itulah bana nan kadituruik.- Ba-a nan kini: Lah tabik niat dek Sutan, tumbuah pangana

dalam hati, nak mambao kato jo ba-iyo, mancari bana nan sabuah; dek adat itu basuruah, kandak

undang nan ba-amalkan. – Mujua batimpo jo nan elok, tuah lah lakek dinan mulia, usahlah ragu

tantang itu, kami mananti baritonyo.- Sakian pambari dari ambo…

ALEK

Alhamdu lillah, mamakaikan ambo ……

ALEK

Sutan Sinaro???….

PANGKA

Ambo ….

ALEK

Batibokan juo sambah ka Sutan …

PANGKA

Lalukanlah ….

ALEK

Dek tinggi batang lamo karareh, dek panjang jalan, lamo kasampai, agak talaalai ambo mambaliakan

kato, karilahan juo pado Sutan.-

PANGKA

Yoooo lah

ALEK

Tu-mah lah Sutan liyek Sutan pandangi; taradok sambah jo titah, nan talewa kapado kami sialek, nan

pai sabondong, pulang satampuah, alah lah dikatangah—katapikan; ba-iyo-2 kami jo mamak, batido-

tido jo samo-gadang.- Mako buleklah jantuang dikalupak, buleklah kato jo mupakaik.- Ruponyo, nan

kamanjadi polongan-asok, sambungan –lidah, iyo tatapek dibadan diri ambo- Aratinyo bana, kok tibo

dikato kamanjawab gayuang kamanyambuik; atau sambah kabaulakkan, titah kaba-alekokan, kato

sapatah nak basabuik, rundiang sabuah nak katangah; Kadari ambo tarabiknyo… sungguah kadari

ambo tarabiknyo sutan, nan ibaraik urang mangaji. – Nyampang kok ndak tabacokan diayatnyo; nak

kanai tajuik jo tilawah, nan panjangnyo tasingkekkan, tibo disingkek tapanjangkan, tasadiak tabao

lalu, lafat batuka jo ma-ana, iyo batolong dek Sutan manyapo-maulangkan, jan badoso kito sabalik,

Sutan …..

PANGKA

Insya Allah …. Bacolah dek… Sutan sabalah sinan, nak kami simakkan dari siko.–

ALEK

Assalamualaikum ….

Palupuah batang malapari,

Pucuak manimpo aka jumbai

Dibao nak-rang kabatipuah

Sungguahpun ambo tagak baradiri

Bukanlah urang cadiak pandai

Ujuiknyo duduak nan basimpuah

Kasah ambun kasah biludu

Batanti bajaik tapi

Baturap jo banang sirah

Alah tahampai disandaran….

Mintak ampun ambo kapangulu

Nanan salirik duduak ditapi

Saedaran adok katangah

Jo sambah sajo dimuliakan

Pisau sirawik ulu sonsang

Saruangnyo tareh kayu jati

Ulunyo pangka kayu kamaik

Diambiak paracik buah

Takuik-ganta ambo mambilang

Pangulu banyak nan sati

Tuanku banyak nan kiramaik

Rang-gadang banyak nan batuah

Mulonyo jalo diserakkan

Kanai kulari nan bapalun

Mulonyo kato disambahkan

Manyusun jari mintak ampun

Mako mamintak ampunlah ambo, dari pado pambilangan Pangulu, malin mati jo dubalang, diateh

kaampek-jinih maratabat, nan mampunyoi kabasaran, didalam kampuang jo nagari. Amma ba’du

adopun kamudian dari pado itu, mako mamuji-mayanjuang-mamuhunkan sambahlah ambo, kabakeh

silang nan bapangka, pakarajaan nan bapokok; siyalah urang nan mahatok nan mahatun kakok-karajo

dirumah nangko, iyolah urang cakapan-biopari.—-

Kajirek tabang ramo-ramo

Inggok mancakam lidih saga

Tadabuak lalu katanah

Ketek indak disanjuang namo

Gadang indak disanjuang gala

Sambah jatuah katangah-tangah

PANGKA

Sabananyo ….

ALEK

Alah lah kami tukiakkan pandangan dakok, dilayangkan pandangan jauah, dilerengkan pandangan

karusuak; lah tibo bana dimakan patuik sutan, lah nyato manuruik alua:

Kok putiah indak babacak

Kok hitam indak bakuran

Janganlah cacek nan kanampak

Puji sanjungan batibokan…..

Kalau dituruik jo pidoman, tando dibaliak-dikarisai, batamu adat jo bidaran; nan bak mamang dinan

pandai:

Barakik biduak talenggang

Karucuik jo saliguri

Dalam rumik Sutan batenggang

Tando bamain aka-budi….

Apun ba-tu hanyo lai, salampih nan daripado itu; adat dunia kan baleh-mambaleh, sariat palu-

mamalu; adok kakami pulo kini: Pihak dikami koh nan datang, nanduduak ditanai lantai, nan salingka

barih ditapi, sabanja barih ditangah. Dek bacampua tuo jo mudo, nan tuo kok-nyo takilaf Stan, nan

muko kok-nyo tasasek.- Mungkin kabasuo salah cotok malatiangkan, salaah awai mahampehkan,

salah muluik mautangkan; takirai langkah kamasuak, takirah lenggang kalua, tasingik budi dinan

rami…. Mako nyampang basuo nan baitu Sutan :

Mambaiya kami panuah-panuah

Mamintak kurang banyak-banyak

Dilaiya kami mohon maaf

Dibatin ampun dimintak ….

Bunyi nak samo kami danga, rupo nak samo kami caliak, balabuah dek sutan jo bicaro, rundiang

dikarek dibukunyo, sakian dulu dari ambo ….

PANGKA

Lah sampai Sutan ? …..

ALEK

Hinggo itu ….

PANGKA

Diambo singkek sajo kajaweknyo.-

ALEK

Rancak singkek

PANGKA

Dek maaf gadang paidah, dek rila gadang munfaat, barila-rila kito disiko …. Kito luluihkan katanah

lakang, dihanyuikkan kalawik lapeh, nan batin dipulangkan pado Allah.

ALEK

Alhamdulillah …. Jadilah Sutan Sinaro?-

PANGKA

Manitah Sutan !.-

ALEK

Nak-nyo tuhua-tuhua sa-alahan, disisiak-sisiak sapalapah, ba-a kok kito tuhukan tantang maaf-

bamaaf, Sutan ?.-

PANGKA

Kito tuhuakan!!!.-